គណបក្សសង្រ្គោះជាតិមិនទាន់ឆ្លើយតបនឹងសំណើបក្សកាន់អំណាច រឿងឲ្យសុំកែតម្រូវខ្លឹមសារពាក្យស្លោក
គណបក្សប្រជាជនកម្ពុជាបានព្រមានប្តឹងគណបក្សសង្រ្គោះជាតិទៅកាន់តុលាការ ក្នុងករណីដែលគណបក្សប្រឆាំងដ៏ធំមួយនេះ មិនកែតម្រូវខ្លឹមសារពាក្យស្លោកថា “ដូរមេឃុំបម្រើបក្ស ដាក់មេឃុំបម្រើរាស្រ្ត”។ សម្រាប់គណបក្សកាន់អំណាច ពាក្យស្លោកនេះ មានចរិក ញុះញង់ បង្កហេតុ និងប្រមាថមើលងាយយ៉ាងធ្ងន់ធ្ងរ ដល់មន្ត្រីឃុំសង្កាត់នៅទូទាំងប្រទេស។ ប៉ុន្តែអ្នកនាំពាក្យគណបក្សសង្រ្គោះជាតិ បានអះអាងថា ពាក្យស្លោកនេះ មិនមែនសំដៅលើមេឃុំរបស់គណបក្សនយោបាយណាមួយនោះទេ។
ចុះផ្សាយនៅថ្ងៃ៖
ស្តាប់ - ០២:៥៤
នៅប៉ុន្មានម៉ោងក្រោយពីការថ្លែងរបស់លោកនាយករដ្ឋមន្រ្តី ហ៊ុន សែន នៅក្នុងពិធីចែកសញ្ញាប័ត្រដល់និស្សិតបញ្ចប់ការសិក្សានៅកោះពេជ្រពីម្សិលមិញ ដោយបានរិះគន់ទៅលើគោលនយោបាយអាទិភាព ៥ចំណុចរបស់គណបក្សសង្រ្គោះជាតិថា មានចរិតបង្កហេតុនោះ អ្នកនាំពាក្យគណបក្សកាន់អំណាចក៏បានចេញសេចក្តីថ្លែងការណ៍មួយទៀត ដោយទទូចឲ្យគណបក្សប្រឆាំងកែតម្រូវខ្លឹមសារពាក្យស្លោកនោះជាបន្ទាន់។ ជាពាក្យស្លោកថា “ដូរមេឃុំបម្រើបក្ស ដាក់មេឃុំបម្រើរាស្រ្ត ដែលសេចក្តីថ្លែងការណ៍របស់អ្នកនាំពាក្យគណបក្សប្រជាជនកម្ពុជាចាត់ទុកថាមានចរិតញុះញង់ បង្កហេតុ និងប្រមាថមើលងាយយ៉ាងធ្ងន់ធ្ងរដល់មន្រ្តីឃុំសង្កាត់ទូទាំងប្រទេស ដែលបានខិតខំបម្រើប្រជាជនស្របតាមតួនាទីរបស់ខ្លួន ដោយមិនមានការរើសអើងនិន្នាការនយោបាយសោះឡើយ។ សេចក្តីថ្លែងការណ៍នេះ បានព្រមានប្តឹងគណបក្សសង្រ្គោះជាតិទៅកាន់តុលាការ ក្នុងករណីដែលគណបក្សប្រឆាំងមួយនេះ មិនកែតម្រូវខ្លឹមសារនេះជាបន្ទាន់។
គួររំលឹកជូនថា តាមរយៈសមាជវិសាមញ្ញរបស់គណបក្សសង្រ្គោះជាតិកាលពីថ្ងៃទី ២ មីនា សប្តាហ៍មុន គណបក្សប្រឆាំងបានដាក់ចេញគោលនយោបាយអាទិភាព ៥ចំណុចសម្រាប់យុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់នៅពេលខាងមុខរួមមាន ការពង្រឹងសិទ្ធិអំណាចប្រជាពលរដ្ឋ, ការលើកកម្ពស់ជីវភាពប្រជាពលរដ្ឋ, ការផ្តល់សេវាសាធារណៈ សន្តិសុខ និងការទម្លាក់ថវិកា ៥០ម៉ឺនដុល្លារទៅដល់ឃុំសង្កាត់នីមួយៗ នៅពេលដែលគណបក្សសង្រ្គោះជាតិឈ្នះឆ្នោតជាដើម។ គោលនយោបាយអាទិភាពទាំង៥ គឺស្ថិតនៅក្រោមពាក្យស្លោកយ៉ាងខ្លីថា “ដូរមេឃុំបម្រើបក្ស ដាក់មេឃុំបម្រើរាស្រ្ត”។ បើតាមមន្រ្តីគណបក្សសង្រ្គោះជាតិថា សារនយោបាយនេះខ្លី និងងាយស្រួលចងចាំ។
ឆ្លើយតបទៅនឹងសេចក្តីថ្លែងការណ៍របស់គណបក្សកាន់អំណាច លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានលើកឡើងថា ខ្លឹមសារនេះមិនបានសំដៅដល់មេឃុំគណបក្សនយោបាយណាមួយនោះទេ។ លោកបានស្នើត្រលប់ទៅកាន់គណបក្សប្រជាជនវិញថាសុំឲ្យគណបក្សកាន់អំណាចពិនិត្យលើខ្លឹមសារនេះឡើងវិញ។ លោកថា ខ្លឹមសារនេះមិនខុសច្បាប់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ