សង្រ្គោះជាតិសុំអន្តរាគមន៍ពីព្រះមហាក្សត្រ កុំឲ្យឡាយព្រះហត្ថលេខាលើវិសោធនកម្មច្បាប់ថ្មី
ក្រុមអ្នកតំណាងរាស្រ្តគណបក្សសង្រ្គោះជាតិ នៅរសៀលថ្ងៃទី ១៩កក្កដា នេះ បានផ្ញើលិខិតមួយច្បាប់ទៅកាន់ព្រះមហាក្សត្រ ដើម្បីសុំអន្តរាគមន៍កុំឲ្យព្រះអង្គ ឡាយព្រះហត្ថលេខា លើវិសោធនកម្មច្បាប់ស្តីពីគណបក្សនយោបាយ។ លិខិតរបស់គណបក្សសង្រ្គោះជាតិបានលើកឡើងពីក្តីបារម្ភរបស់ខ្លួនថា ច្បាប់នេះ នឹងធ្វើឲ្យប៉ះពាល់ដល់លទ្ធិប្រជាធិបតេយ្យនៅកម្ពុជា និងជាពិសេសប៉ះពាល់ដល់ការបោះឆ្នោតជាតិនៅឆ្នាំក្រោយ។
ចុះផ្សាយនៅថ្ងៃ៖
ស្តាប់ - ០២:៣៧
លិខិតសុំអន្តរាគមន៍ពីព្រះមហាក្សត្រ ត្រូវបានបញ្ជូនទៅកាន់ព្រះបរមរាជវាំងនៅរសៀលថ្ងៃទី ១៩ កក្កដានេះ ដោយបានលើកឡើងពីក្តីព្រួយបារម្ភយ៉ាងតិចចំនួន២ចំណុច ប្រសិនបើព្រះមហាក្សត្រឡាយព្រះហត្ថលេខាដាក់ឲ្យប្រើប្រាស់ នូវវិសោធនកម្មច្បាប់ដ៏ចម្រូងចម្រាស់នេះ។ ប៉ុន្តែអ្នកវិភាគនៅរាជបណ្ឌិតសភាកម្ពុជា បានលើកឡើងថា ព្រះមហាក្សត្រមិនអាចបដិសេធបានទេ។
នៅក្នុងលិខិតថ្វាយព្រះមហាក្សត្រ បរមនាថ នរោត្តម សីហមុនី នេះ ក្រុមអ្នកតំណាងរាស្រ្តគណបក្សសង្រ្គោះជាតិចំនួន៥៥រូបបានចាត់ទុកវិសោធនកម្មច្បាប់នេះថា បានដើរផ្ទុយពីព្រះរាជបំណងរបស់អតីតព្រះមហាក្សត្រ នរោត្តម សីហនុ ដែលចង់ឲ្យខ្មែររួបរួមគ្នា និងជាច្បាប់ដែលរំលោភបំពានលើរដ្ឋធម្មនុញ្ញដែលជាច្បាប់កំពូលត្រង់មាត្រា ៣៥ វាក្យខណ្ឌទី១ ដែលបានចែងថា “ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌ប្រទេសជាតិ”។ បន្ថែមលើនេះ លិខិតនេះក៏បានទូលថ្វាយព្រះមហាក្សត្រថា វិសោធនកម្មច្បាប់នេះ មិនស្របតាមគោលការណ៍នីតិរដ្ឋ ហើយផ្ទុយពីគោលការណ៍ប្រជាធិបតេយ្យ សេរី ពហុបក្ស ដែលធានាដោយរដ្ឋធម្មនុញ្ញនៃព្រះរាជាណាចក្រកម្ពុជា និងថា ជាវិសោធនកម្មច្បាប់ដែលមានចរិតនយោបាយ និងគាបសង្កត់ទៅលើសិទ្ធិបុគ្គល និងគូប្រជែងនយោបាយ ដែលអាចបណ្តាលឲ្យប៉ះពាល់ដល់ការបោះឆ្នោតនាពេលខាងមុខ។
គួរជំរាបជូនថា លិខិតសុំអន្តរាគមន៍ពីព្រះមហាក្សត្រនេះ បានធ្វើឡើង បន្ទាប់ពីវិសោធនកម្មច្បាប់ដ៏ចម្រូងចម្រាស់នេះ ត្រូវបានរដ្ឋសភា និងព្រឹទ្ធសភាអនុម័តរួច កាលពីថ្ងៃទី ១៨ កក្កដា។ បើតាមនីតិវិធី វិសោធនកម្មច្បាប់នេះ នឹងត្រូវបញ្ជូនបន្តទៅក្រុមប្រឹក្សាធម្មនុញ្ញដើម្បីប្រកាសធម្មនុញ្ញភាព មុនពេលថ្វាយព្រះមហាក្សត្រឡាយព្រះហត្ថលេខា ដើម្បីប្រកាសឲ្យប្រើប្រាស់។
យ៉ាងណាក៏ដោយ ក្រុមបញ្ញាវ័ន្តនៅរាជបណ្ឌិតសភាកម្ពុជា ដែលបានលើកយកវិសោធនកម្មច្បាប់ស្តីពីគណបក្សនយោបាយមកពិភាក្សានៅថ្ងៃនេះ បានកត់សំគាល់ថា ព្រះមហាក្សត្រនឹងមិនអាចជួយគណបក្សប្រឆាំងបានទេ។ លោក សុខ ទូច អនុប្រធានរាជបណ្ឌិតសភាកម្ពុជា បានលើកឧទាហរណ៍នាពេលកន្លងមកថា នៅពេលព្រះមហាក្សត្រអវត្តមានពីក្នុងប្រទេស នោះ ប្រមុខរដ្ឋស្តីទី ដែលមានប្រធានព្រឹទ្ធសភា និងបន្តបន្ទាប់មកមានប្រធានរដ្ឋសភា និងអនុប្រធានជាដើម នឹងចុះហត្ថលេខាជំនួសព្រះអង្គ។ ចំណែកលោក ឌុច ពិសិដ្ឋ តំណាងអ្នកឃ្លាំមើលបញ្ហាសង្គមនិងនយោបាយនៅកម្ពុជា បានលើកឡើងនៅក្នុងវេទិកាដែលមិនមានការចូលរួមពីតំណាងគណបក្សសង្រ្គោះជាតិនេះដែរថា តាមបទពិសោធន៍នៃការអនុម័តច្បាប់ដែលមិនមានការចូលរួមពីបក្សប្រឆាំងបែបនេះ ព្រះមហាក្សត្រតែងតែយាងទៅក្រៅប្រទេសដើម្បីពិនិត្យព្រះរាជសុខភាព ដោយទម្លាក់ការទទួលខុសត្រូវនេះទៅប្រមុខរដ្ឋស្តីទីវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ