មន្ត្រីសង្គ្រោះជាតិថា គ្មានការជួបជុំណាមួយនៅថ្ងៃបើកសវនាការលើបណ្ដឹងរំលាយបក្សទេ
ខណៈដែលក្រសួងមហាផ្ទៃត្រៀមកម្លាំងដើម្បីបង្ការ ការជួបជុំណាមួយនៅថ្ងៃបើកសវនាការលើបណ្ដឹងរំលាយគណបក្សសង្គ្រោះជាតិ នៅថ្ងៃទី១៦ខែវិច្ឆិកាខាងមុខ ពីខាងគណបក្សសង្គ្រោះជាតិឯណេះវិញបានអះអាងថា ទាំងគណបក្ស និងអ្នកគាំទ្របន្តរក្សាភាពអត់ធ្មត់រហូតដល់ហេតុការណ៍នេះរំលងផុត ដោយគ្មានការជួបជុំណាមួយនៅថ្ងៃ នោះឡើយ។
ចុះផ្សាយនៅថ្ងៃ៖
ស្តាប់ - ០១:៣១
គិតរហូតមកដល់ថ្ងៃទី១១វិច្ឆិកានេះ គណបក្សសង្គ្រោះជាតិនៅតែរក្សាជំហរមិនចាប់អារម្មណ៍ជាមួយនឹងកាលបរិច្ឆេទ ដែលតុលាការត្រូវបើកសវនាការលើបណ្ដឹងរំលាយបក្ស នៅថ្ងៃទី១៦វិច្ឆិកាខាងមុខ។
លោកម៉ៅ មុន្នីវណ្ណ ប្រធានស្តីទីគណៈកម្មាធិការប្រតិបត្តិគណបក្សសង្រ្គោះជាតិថ្លែងប្រាប់វិទ្យុបារាំងនៅថ្ងៃសៅរ៍នេះថា កុំថាឡើយការជួបជុំនៅភ្នំពេញ ចលនានៃការឡើងមកពីតាមខេត្តដើម្បីមកតាមដានសវនាការរំលាយគណបក្សនេះក៏គ្មានដែរ។ គ្មានការជួបជុំដោយសារគណបក្សសង្គ្រោះជាតិ និងអ្នកគាំទ្រជ្រើសរើសវិធីសាស្ត្រអត់ធ្មត់រហូតព្រឹត្តការណ៍រំលាយបក្សលេចចេញជារូបរាង។ នេះបើតាមលោក ម៉ៅ មុន្នីវណ្ណ។
ប្រឈមនឹងកាលៈទេសៈនេះ គណបក្សសង្គ្រោះជាតិនៅតែបន្តដំណើរចុះទៅមូលដ្ឋានជួបជាមួយអ្នកគាំទ្រ ល្គឹកណាបក្សមិនទាន់ត្រូវបានរំលាយ។ តាមការបញ្ជាក់ពីលោកម៉ៅ មុន្នីវណ្ណ មកដល់ពេលនេះទៅហើយក្ដីសង្ឃឹមរបស់លោកនៅតែគិតថា គណបក្សសង្គ្រោះជាតិនឹងមិនត្រូវបានរំលាយ ទោះក្រោមហេតុផលណាមួយក៏ដោយ។
ទន្ទឹមគ្នានេះ លោក ម៉ៅ មុន្នីវណ្ណ បានលើកឡើងពីបណ្ដាំលោក កឹម សុខា ប្រធានគណបក្សសង្គ្រោះជាតិពីពន្ធធនាគារមក ដែលជំរុញឲ្យមន្ត្រីចុះទៅតាមមូលដ្ឋានពន្យល់ពលរដ្ឋពីសិទ្ធិនៅក្នុងសង្គមប្រជាធិបតេយ្យ។
ជុំវិញសំណុំរឿងគណបក្សសង្គ្រោះជាតិនេះដែរ ចលនានៃការចាកចេញទៅចុះចូលជាមួយគណបក្សប្រជាជនកម្ពុជាមានចំនួន៦០នាក់ជាងប៉ុណ្ណោះ។ ចំណែកតួលេខដែលចុះផ្សាយថា មានអ្នកចុះចូល១០០នាក់ជាងត្រូវបានលោក ម៉ៅ មុន្នីវណ្ណ ពន្យល់ថា គ្រាន់តែជាអ្នកគាំទ្រធម្មតា មិនមែនជារចនាសម្ព័ន្ធរបស់គណបក្សសង្គ្រោះជាតិនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ