បក្សប្រឆាំងរៀបចំការបោះឆ្នោតជ្រើសតាំងប្រធាននិងអនុប្រធាននាសប្ដាហ៍ក្រោយ
គណបក្សសង្គ្រោះជាតិ នឹងរៀបចំសមាជវិសាមញ្ញគណបក្ស នៅថ្ងៃទី២ខែមីនា សប្ដាហ៍ក្រោយនេះ នៅទីស្នាក់ការកណ្ដាលចាក់អង្រែលើ។ សមាជវិសាមញ្ញនេះ មានរបៀបវារៈចំនួន៣សំខាន់៖ ទី១ អបអរសាទរបញ្ជីបេក្ខជនឈរឈ្មោះក្រុមប្រឹក្សាឃុំសង្កាត់របស់គណបក្សសង្គ្រោះជាតិ។ ទី២៖ បោះឆ្នោតជ្រើសតាំងប្រធាននិងអនុប្រធានគណបក្ស។ និងទី៣៖ ពិភាក្សានិងអនុម័តសារនយោបាយសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់។ នេះបើតាមលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍គណបក្ស នាល្ងាចថ្ងៃសុក្រនេះ។ ការរៀបចំសមាជវិសាមញ្ញរបស់បក្សប្រឆាំងដើម្បីជ្រើសតាំងប្រធាននិងអនុប្រធានបក្សនាពេលនេះ ធ្វើឡើងបន្ទាប់ពីលោក សម រង្ស៊ី លាលែងពីតំណែងប្រធានបក្ស និងស្របពេលដែលមានព័ត៌មានលេចលឺថា បក្សប្រឆាំងនឹងរៀបចំក្បាលម៉ាស៊ីនដឹកនាំថ្មី ក្រោមរូបមន្តប្រធាន១ អនុប្រធាន៣៖ ក្នុងនោះ លោក កឹម សុខា ជាប្រធាន អមដោយអនុប្រធានចំនួន៣រូប គឺលោកស្រី ជូឡុង ស៊ូមូរ៉ា លោក យឹម សុវណ្ណ និងលោក ប៉ុល ហំម។ នេះបើតាមការព័ត៌មានចចាមអារាម ដែលត្រូវបដិសេធចោលដោយគណបក្សប្រឆាំង។
ចុះផ្សាយនៅថ្ងៃ៖