ទូរទស្សន៍សង្គ្រោះជាតិ មានពន្លឺស្រពិចស្រពិល ខណៈមន្ត្រីគណបក្សរំពឹងទៅលើដីថ្មីមួយកន្លែងផ្សេងទៀត!
ទូរទស្សន៍ព្រះអាទិត្យ Sun TV បន្ទាប់ពីខកខានមិនអាចសាងសង់នៅលើដីចំនួន២កន្លែងរួចហើយ នៅពេលនេះ មន្ត្រីបក្សប្រឆាំងកំពុងតែរំពឹងទៅលើដីថ្មីមួយកន្លែង ផ្សេងទៀតក្នុងក្រុងភ្នំពេញ។ មន្ត្រីជាន់ខ្ពស់របស់បក្សសង្គ្រោះ ជាតិបានប្រាប់វិទ្យុបារាំងថា ដីថ្មីនេះជាអំណោយរបស់សប្បុរសជនដែល គាំទ្របក្សហើយគណបក្សកំពុងតែរត់ការ និងធ្វើបែបបទផ្ទេរកម្មសិទ្ធិដីធ្លី។
ចុះផ្សាយនៅថ្ងៃ៖
ទោះបីជាបង្ហើបថាមានដីថ្មីសម្រាប់សង់សងស្ថានីយទូរទស្សន៍ព្រះអាទិត្យហើយក្តីក៏មន្ត្រីជាន់ខ្ពស់បក្សសង្គ្រោះជាតិលោកអេងឆៃអ៊ាងសុំមិនបញ្ជាក់ឲ្យច្បាស់ថានៅម្តុំណាឬកន្លែងណាឲ្យប្រាកដនោះទេព្រោះបារម្ភពីការវាយស្មៅបង្អើលពស់។ ដូច្នេះលោកសុំលាក់ទីតាំងថ្មីសិនដោយត្រឹមតែបង្ហើបថាដីថ្មីនោះគឺស្ថិតនៅក្នុងក្រុងភ្នំពេញតែម្តង។ កន្លែងនោះ គឺទទួលបានពីសប្បុរសជនដែលមានសមានចិត្តទៅលើបក្សប្រឆាំងហើយពេលនេះបក្សកំពុងតែចាត់ចែងផ្ទេរកម្មសិទ្ធិ។
គួររម្លឹកជូនថាទូរទស្សន៍សង្គ្រោះជាតិ Sun TV បានទទួលអាជ្ញាប័ណ្ណពីក្រសួងព័ត៌មានតាំងតែពីថ្ងៃទី២៧ខែវិច្ឆិកាឆ្នាំ២០១៤ ប៉ុន្តែត្រូវបានជួបឧបសគ្គជាបន្តបន្ទាប់។ ដំបូងឡើយបក្សប្រឆាំងគ្រោងសាងសង់នៅទួលគោកតែក៏ត្រូវផ្អាកទៅវិញដោយសារតែមានការតវ៉ាមិនឲ្យលើកអង់តែន។ ក្រោយមកបក្សប្រឆាំង ក៏ប្តូរទៅទិញដីនៅក្រុងតាខ្មៅអស់ជាង១០ម៉ឺន៧ពាន់ដុល្លារតែក៏ត្រូវរាំងស្ទះដោយសារតែការផ្ទេរកម្មសិទ្ធិនិងរឿងហេតុផ្សេងៗទៀតដូចជាការទាមទារដកលុយវិញពីសំណាក់អ្នកចូលលុយពីមុនៗ។
សូមបញ្ជាក់ថា តាមគម្រោងដំបូង គឺបក្សប្រឆាំងគ្រោងចំណាយលុយ៣លានដុល្លារសម្រាប់បង្កើតទូរទស្សន៍ថ្មីនេះ ហើយក៏បានរៃអង្គាសប្រាក់ពីសប្បុរសជនទាំងក្នុងនិងក្រៅប្រទេសចំនួន៨០ម៉ឺនដុល្លារ។ លុយនេះ ត្រូវលោក អេង ឆៃអ៊ាង បញ្ជាក់ថា កំពុងតែតម្កល់ទុកនៅធនាគារនៅឡើយទេ។
ចំពោះអ្នកជំនាញប្រព័ន្ធផ្សព្វផ្សាយខ្លះ លើកឡើងថា លុយកាក់ដំណើរជារឿងលំបាកមួយ ហើយបញ្ហាធនធានមនុស្សនិងបច្ចេកទេស គឺជាចំណោទធំថែមទៀតសម្រាប់ទូរទស្សន៍នេះ។ ក៏ប៉ុន្តែលោក អេង ឆៃអ៊ាង បញ្ជាក់ថា បក្សបានត្រៀមខ្លះៗមកហើយ។
តាមប្រភពដដែល បើការផ្ទេរសិទ្ធិសម្រាប់ដីថ្មីបានសម្រេចហើយ បក្សនឹងដាក់ពាក្យស្នើសុំដំឡើងអង់តែនថែមទៀត ដែលនេះ ត្រូវលោក អេង ឆៃអ៊ាង មើលឃើញថា ក៏ជាការលំបាកថែមទៀត តែវាអាស្រ័យទៅលើដង្ហើមនៃសន្ទុះនយោបាយ។
ចំពោះពេលវេលាសាងសង់ទូរទស្សន៍នេះធ្វើឲ្យគណបក្សសង្គ្រោះជាតិផ្លាស់ប្តូរក្តីសង្ឃឹមជាច្រើនដងដូចជារំពឹងថានឹងសាងសងប៉ុស្តិ៍ទូរទស្សន៍ព្រះអាទិត្យនេះឲ្យជោគជ័យនៅចុង ឆ្នាំ២០១៥ តែត្រូវពន្យារពេល។ នៅពេលជិតដាច់ឆ្នាំ២០១៦នេះទៅហើយ ក៏នឹងត្រូវបន្តលើកពេលទៅទៀត។ ត្បិតយ៉ាងនេះក្តីមន្ត្រីបក្សប្រឆាំងធ្លាប់បានអះអាងថានឹងធ្វើឲ្យរួចរាល់នៅមុនការបោះឆ្នោតឃុំសង្កាត់ខែមិថុនា ឆ្នាំ២០១៧។ ជាមួយគ្នានេះលោក អេង ឆៃអ៊ាង លើកឡើងថាចំពោះពេលវេលាសម្រាប់សង់ឲ្យរួចរាល់អាចនឹងមានការបត់បែនទៅតាមស្ថានភាពនយោបាយ។
កន្លងទៅគេបានដឹងត្រួសៗពីរចនាសម្ព័ន្ធក្រុមហ៊ុនទូរទស្សន៍នេះ អ្នកគ្រប់គ្រង គឺជាភរិយារបស់អតីតសមាជិកព្រឹទ្ធសភាគណបក្សសមរង្ស៊ីលោក ហុង សុខហួរ។ លោក ហុង សុខហួរ ដែលកំពុងជាប់ឃុំនៅគុកព្រៃសរ។
មន្ត្រីបក្សសង្គ្រោះជាតិធ្លាប់ប្រាប់វិទ្យុបារាំងថា បើទូរទស្សន៍ព្រះអាទិត្យចេញជារូបរាង គឺនឹងផ្សាយព័ត៌មានពិតហើយនឹងមិនផ្សាយពាណិជ្ជកម្មស្រានិងបារីនោះទេ។ ហើយផ្តោតលើការអប់រំ លើកកម្ពស់ចំណេះដឹងអប់រំឲ្យសីលធម៌និងគុណធម៌។រឿងដែលទូរទស្សន៍នេះ នឹងផ្សាយមុនគេគឺ រឿងកាប់បំផ្លាញព្រៃឈើរឿងពុករលួយរឿងជម្លោះព្រំដែននិងជីវភាពវេទនារបស់កម្មករជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ