គ.ជ.ប មិនបានលើករឿងលោកនី ចរិយា ជជែកជាមួយគណៈប្រតិភូមូលនិធិកូហ្វីអាណាន់
នៅព្រឹកថ្ងៃចន្ទនេះ គណៈកម្មាធិការជាតិរៀបចំការបោះឆ្នោត(គ.ជ.ប) បានជួបពិភាក្សាការងារជាមួយគណៈប្រតិភូមូលនិធិកូហ្វីអាណាន់។ ការពិភាក្សាគ្នានោះ បានផ្តោតជាសំខាន់តែទៅលើស្ថានភាពនៃការរៀបចំការបោះឆ្នោត និងលទ្ធិប្រជាធិបតេយ្យនៅក្នុងប្រទេសកម្ពុជាប៉ុណ្ណោះ។ ចំណែកករណីលោកនី ចរីយា អគ្គលេខាធិការរងគ.ជ.ប មិនត្រូវបានភាគីទាំងពីរនេះលើកមកពិភាក្សាគ្នានោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
លោកហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត បានថ្លែងប្រាប់អ្នកកាសែតក្រោយពីបញ្ចប់កិច្ចពិភាក្សាជាមួយប្រតិភូមូលនិធិកូហ្វីអាណាន់ ថា គណៈកម្មាធិការជាតិរៀបចំការបោះឆ្នោតគ្រាន់តែបង្ហើបប្រាប់រឿងលោកនី ចរិយា ត្រូវបានចាប់ខ្លួនដល់ប្រតិភូមូលនិធិកូហ្វីអាណាន់ប៉ុណ្ណោះ ប៉ុន្តែភាគីទាំងពីរមិនបានពិភាក្សាគ្នាស៊ីជម្រៅណាមួយនោះទេជុំវិញរឿងនេះ។ លោកថា គ.ជ.ប ជាស្ថាប័នអព្យាក្រិត។ ដូច្នេះគ.ជ.ប មិនលូកដៃចូលទៅក្នុងដែនសមត្ថកិច្ចរបស់ស្ថាប័នណាមួយនោះឡើយ។
ចំណែកលោក Alan Boss នាយកប្រតិបត្តិមូលនិធិកូហ្វីអាណាន់វិញ បានបញ្ជាក់ថា លោកទើបតែមកដល់ប្រទេសកម្ពុជា ដូច្នេះលោកមិនបានដឹងច្បាស់អំពីករណីចាប់ខ្លួន និងឃាត់ខ្លួនមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតនេះទេ។ តែទោះយ៉ាងណា ភាគីទាំងពីរ អាចនឹងពិភាក្សាគ្នាអំពីរឿងនេះឡើងវិញ បន្ទាប់ពីប្រតិភូមូលនិធិកូហ្វីអាណាន់ជួបពិភាក្សាជាមួយបណ្តាអង្គការសង្គមស៊ីវិលនៅក្នុងប្រទេសកម្ពុជា។ នេះបើតាមការបញ្ជាក់បន្ថែមពីលោកហង្ស ពុទ្ធា។
គួរជម្រាបជូនថា លោកនី ចរិយា អតីតមន្ត្រីសិទ្ធិមនុស្ស និងជាអគ្គលេខាធិការរងគណៈកម្មាធិការជាតិរៀបចំការបោះឆ្នោតដែលទើបចូលកាន់តំណែងមិនទាន់ទាំងបានប៉ុន្មានផងនោះ កំពុងត្រូវបានឃុំបណ្តោះអាសន្ននៅក្នុងពន្ធនាគារ។ លោកត្រូវបានតុលាការក្រុងភ្នំពេញ ចោទប្រកាន់ពីបទ “សមគំនិតក្នុងរឿងសូកប៉ាន់សាក្ស៊ី” នៅក្នុងសំណុំរឿងអាស្រូវស្នេហាដល់ស្មុគស្មាញរវាងកញ្ញាខុម ចាន់តារាទី ហៅស្រីមុំ និងលោកកឹម សុខា ប្រធានស្តីទីគណបក្សសង្រ្គោះជាតិ។
ក្រោមហេតុផលថា មិនចង់លូកដៃចូលកិច្ចការរបស់ស្ថាប័នដទៃ មកទល់នឹងពេលនេះគណៈកម្មាធិការជាតិរៀបចំការបោះឆ្នោតមិនបានចាត់វិធានការតាមនិតីវិធីច្បាប់ណាមួយ ដើម្បីជួយដល់លោកនី ចរិយានោះទេ។ ក៏ប៉ុន្តែបើតាមលោកហង្ស ពុទ្ធា នៅពេលខាងមុខនេះ លោក គួយ ប៊ុនរឿន អនុប្រធាន គ.ជ.ប នឹងដឹកនាំអ្នកច្បាប់ចំនួន ៤រូប និងសមាជិក គ.ជ.ប ៣រូបទៀត ដើម្បីទៅសួរសុខទុក្ខ លោក នី ចរិយា នៅក្នុងពន្ធនាគារក្រុងភ្នំពេញ(PJ)។
ក្រៅពីករណីលោកនី ចរិយានេះ លោក រ៉ុង ឈុន សមាជិកគ.ជ.ប កូតាខាងគណបក្សសង្រ្គោះជាតិក៏ត្រូវបានតុលាការធ្វើការសើរើករណីអំពើហិង្សានៅផ្លូវវ៉េងស្រេងផងដែរ។ គឺចៅក្រមស៊ើបសួរសាលាដំបូងរាជធានីភ្នំពេញ បានចេញលិខិតជូនដំណឹងមួយចុះថ្ងៃទី២៦ ខែមេសា ទៅកាន់លោក រ៉ុង ឈុន ដោយបានបញ្ជាក់ប្រាប់ថាសំណុំរឿងរបស់លោក ត្រូវបានបញ្ជូនទៅធ្វើការជំនុំជម្រះ។
គណៈកម្មាធិការជាតិរៀបចំបោះឆ្នោត បានអះអាងថា ទោះបីជាមន្ត្រីជាន់ខ្ពស់ទាំងពីររបស់ខ្លួននេះ កំពុងប្រឈមបញ្ហាផ្លូវច្បាប់ក៏ដោយ ក៏មិនអាចប៉ះពាល់ដល់ដំណើរការរបស់គ.ជ.បនោះដែរ ព្រោះថា គ.ជ.បនៅពេលបច្ចុប្បន្ននេះ គឺជាគ.ជ.បកំណែទម្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ