ខុមហ្វ្រែលបដិសេធការចោទប្រកាន់ថា អុកឡុកការបោះឆ្នោត និងបង្កចលាចល
គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល នៅថ្ងៃទី១០ កក្កដា ម្សិលមិញ បានទាត់ចោលព័ត៌មាននានាដែលថា ខ្លួនមានបំណងអុកឡុកការបោះឆ្នោត និងបង្កចលាចលនៅក្រោយការបោះឆ្នោត។ សម្រាប់ខុមហ្វ្រែល បើការចោទប្រកាន់បែបនេះនៅតែកើតមាន ខ្លួននឹងឈប់ធ្វើសកម្មភាពទាក់ទងការបោះឆ្នោត ដោយដកសកម្មភាពឃ្លាំមើលរបស់ពលរដ្ឋស្ម័គ្រចិត្តនៅតាម ភូមិ ឃុំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
ការចោទប្រកាន់អង្គការខុមហ្វ្រែលថា អុកឡុក និងបង្កចលាចល អំឡុងពេលនិងក្រោយពេលបោះឆ្នោត កើតឡើងដោយសារតែ ខុមហ្វ្រែលដាក់ពង្រាយពលរដ្ឋស្ម័គ្រចិត្តនៅតាមភូមិ ឃុំ សង្កាត់មួយចំនួន ចន្លោះ២០០ទៅ៣០០នាក់។ ប៉ុន្តែ ខុមហ្វ្រែលបានគូសបញ្ជាក់នៅក្នុងសេចក្ដីប្រកាសព័ត៌មានចុះថ្ងៃទី១០ កក្កដា ថា សកម្មភាពរបស់ខ្លួនធ្វើឡើងដើម្បីចូលរួមពិនិត្យមើលការអនុវត្តសិទ្ធិ និងឆន្ទៈរបស់ប្រជាពលរដ្ឋ ដើម្បីឲ្យច្បាស់ថា គ្មានការគំរាមឲ្យពលរដ្ឋទៅបោះឆ្នោត ឬមិនទៅបោះឆ្នោត។ សម្រាប់អង្គការ ខុមហ្វ្រែល ការអនុវត្តសិទ្ធិនិងឆន្ទៈរបស់ពលរដ្ឋ គឺជាសិទ្ធិស្របទៅតាមរដ្ឋធម្មនុញ្ញរួមនឹងច្បាប់បោះឆ្នោត។
បន្ថែមពីលើការពន្យល់នេះ អង្គការខុមហ្វ្រែលសង្ឃឹមថា ការគំរាមកំហែងនឹងមិនកើតមានឡើងដល់កម្រិតដែលខុមហ្វ្រែលសម្រេចចិត្តដកខ្លួនចេញពីសកម្មភាពទាក់ទងការបោះឆ្នោតឡើយ។
លោក កន សាវាង្ស មន្ត្រីផ្នែកទំនាក់ទំនងនៃអង្គការខុមហ្វ្រែលបានប្រាប់វិទ្យុបារាំងអន្តរជាតិបន្ថែមថា ប្រសិនបើខុមហ្វ្រែលសម្រេចបញ្ឈប់សកម្មភាពដែលខ្លួនកំពុងធ្វើនេះ គឺមានន័យថា ការគំរាមកំហែងគឺមានរូបភាពធ្ងន់ធ្ងរ សម្រាប់ការងារឃ្លាំមើលការបោះឆ្នោតនៅកម្ពុជា។ ធ្ងន់ធ្ងរព្រោះថា គ្រាន់តែការងារឃ្លាំមើលអំពីសិទ្ធិបោះឆ្នោតក៏រងការចោទប្រកាន់ថា អុកឡុក និងបង្កចលាចលដែរ។ នេះបើតាមលោក កន សាវាង្ស។
ដោយឡែក អ្នកនាំពាក្យ គ.ជ.ប បានអះអាងជាថ្មីថា ការដកខ្លួនរបស់ស្ថាប័នណាមួយ មិនអាចរាំងស្ទះដំណើរការបោះឆ្នោត នៅថ្ងៃទី២៩ខែកក្កដាបានឡើយ។ គិតមកដល់ពេលនេះ មានអង្គការជាង១០០ បានចុះឈ្មោះសង្កេតការណ៍ដំណើរការបោះឆ្នោតនៅកម្ពុជា ដោយមានចូលរួមសង្កេតការណ៍ជាង៦ម៉ឺននាក់។ គ.ជ.ប រំពឹងថា ចំនួននេះនឹងកើនឡើងបន្ថែមទៀត។ សម្រាប់ គ.ជ.ប នេះជាសកម្មភាពមួយបង្ហាញពីពហុនិយមនៃលទ្ធិប្រជាធិបតេយ្យសម្រាប់ការបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ