KTV កំពុងរំលោភសិទ្ធិអ្នកនិពន្ធយ៉ាងខ្លាំង!
នៅកម្ពុជាសព្វថ្ងៃនេះ កន្លែងកម្សាន្ត Karaoke ឬ KTV កំពុងដុះរីកដូចផ្សិត ហើយកន្លែងទាំងនោះ ក៏កំពុងតែរំលោភសិទ្ធិអ្នកនិពន្ធ យ៉ាងខ្លាំងណាស់។ ចំណែកអ្នកនិពន្ធ ដែលជាម្ចាស់កម្មសិទ្ធិ គួរប្រមូលចងក្រងគ្នា ដើម្បីទាមទារឲ្យកន្លែងសប្បាយទាំងនោះ ចូលរួមចំណែកបង់វិភាគទានសម្រាប់សិទ្ធិនិពន្ធ។ ធ្វើដូច្នេះ គឺក្រៅពីពង្រឹងច្បាប់ ហើយក៏អាចជួយលើកស្ទួយជីវភាពអ្នកនិពន្ធបានផងដែរ។ នេះបើតាមការលើកឡើងរបស់មន្ត្រីក្រសួងវប្បធម៌ នៅក្នុងសិក្ខាសាលាស្តីពី សិទ្ធិអ្នកនិពន្ធ និងសិទ្ធិប្រហាក់ប្រហែល នៅថ្ងៃទី ១៩តុលានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្នុងសិក្ខាសាលានេះ លោក លឹម យូសួរ អគ្គនាយករងរដ្ឋបាល និងហិរញ្ញវត្ថុ នៃក្រសួងវប្បធម៌ និងវិចិត្រសិល្បៈ បានថ្លែងថា មាន Karaoke KTV រាប់ម៉ឺនកន្លែងនៅទូទាំងប្រទេស ដែលកំពុងរំលោភបំពានយ៉ាងច្រើនចំពោះសិទ្ធិអ្នកនិពន្ធ និងសិទ្ធិប្រហាក់ប្រហែល តាមរយៈការធ្វើអាជីវកម្មលើបទចម្រៀងរាប់សិបពាន់បទ។ លោកបានសង្កត់ធ្ងន់ថា គឺមានតែអ្នកនិពន្ធទេ ដែលមានសិទ្ធិធ្វើអាជីវកម្មលើស្នាដៃរបស់ខ្លួន ក្រៅពីនោះ ទាល់តែសុំសិទ្ធិអ្នកនិពន្ធជាមុនសិន។
តាមប្រភពដដែល មិនត្រឹមតែកន្លែងកម្សាន្ត Karaokeតែមួយមុខទេ ដែលកំពុងបំពានសិទ្ធិនេះ គឺនៅមានអង្គការទូរផ្សាយ ទូរទស្សន៍ វិទ្យុ ក្រុមហ៊ុនទូរសព្ទ ក្រុមហ៊ុនអ៊ីនធើណិត កន្លែងប្រគំតន្រ្ដី បារ រង្គសាល សណ្ឋាគារ រោងកុន ផ្សារទំនើប និងកន្លែងថតចម្លង ជាដើម ក៏កំពុងតែកេញប្រវញ្ចលើសិទ្ធិអ្នកនិពន្ធ ទាំងដឹងខ្លួន និងមិនដឹងខ្លួនក្តី។
ជាដំណោះស្រាយ មន្ត្រីជាន់ខ្ពស់របស់ក្រសួងវប្បធម៌រូបនេះ បានក្រើនរម្លឹកដល់រាជការ និងមន្ទីរក្រោមឱវាទ ឲ្យចុះត្រួតពិនិត្យ និងសុំបង្កើនកិច្ចសហការជាមួយម្ចាស់កន្លែងទាំងអស់នោះ។ លោកឧទាហរណ៍ថា បើកន្លែងកម្សាន្តទាំងនោះ ផ្តល់វិភាគទានតែមួយកន្លែង ៥០ដុល្លារក្នុងមួយខែ ក៏អ្នកនិពន្ធខ្មែរមានជីវភាពគ្រាន់បើជាសព្វថ្ងៃនេះដែរ។
ថែមពីនេះ លោក លឹម យូសូរ ជំរុញលើកទឹកចិត្តឲ្យអ្នកនិពន្ធទាំងអស់រួបរួមគ្នា ចូលជាសមាជិកអង្គភាពគ្រប់គ្រងសិទ្ធិរួមរបស់ក្រសួង ដើម្បីមានកម្លាំងធំ និងរឹងមាំ សម្រាប់តាមដាន និងត្រួតពិនិត្យការអនុវត្តសិទ្ធិអ្នកនិពន្ធ និងសិទ្ធិប្រហាក់ប្រហែល។ បើតាមប្រភពដដែល កិច្ចការនេះ បើដំណើរការប្រព្រឹត្តទៅល្អ គឺនឹងធ្វើឲ្យអ្នកនិពន្ធមានទឹកមាត់លេប ហើយអាចផលិតស្នាដៃថ្មីច្រើន និងមានគុណភាពផងដែរ។
ត្បិតយ៉ាងនេះក្តី តែ អង្គភាពគ្រប់គ្រងសិទ្ធិរួម នៅមិនទាន់មានដំណើរការសកម្មភាពនៅឡើយទេ ដែលនេះត្រូវការកិច្ចសហការឲ្យសកម្មពីក្រសួងសាមី ក្រុមអ្នកនិពន្ធខ្លួនឯងផ្ទាល់ និងម្ចាស់ផលិតកម្មនានា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ