តុលាការកំពូលសម្រេចបន្តឃុំខ្លួន លោក កឹម សុខា ដដែល
តុលាការកំពូលសម្រេចបន្តឃុំខ្លួន លោក កឹម សុខា ប្រធានអតីតគណបក្សសង្រ្គោះជាតិ ដដែល បន្ទាប់ពីបើកសវនាការជំនុំជម្រះលើបណ្តឹងប្រឆាំងនឹងការពន្យារពេលឃុំខ្លួន នៅព្រឹកថ្ងៃចន្ទនេះ។ ប៉ុន្តែសវនាការនេះ មិនមានវត្តមានលោក កឹម សុខានោះទេ។
ចុះផ្សាយនៅថ្ងៃ៖
លោកផែង ហេង មេធាវីម្នាក់ក្នុងចំណោមមេធាវីផ្សេងទៀតដែលការពារក្តី លោក កឹម សុខា បានប្រាប់វិទ្យុបារាំងRFIថា ក្នុងនាមជាមេធាវីលោកមានការសោកស្តាយចំពោះការសម្រេចរបស់តុលាការកំពូលនៅពេលនេះ។ សោកស្តាយដោយសារតែកូនក្តីលោកមិនបាននៅក្រៅឃុំ។ ការសម្រេចបន្តឃុំខ្លួនលោក កឹម សុខា ដោយតុលាការកំពូលនៅពេលនេះគឺធ្វើឡើងដូចគ្នានឹងសាលាឧទ្ធរណ៍ និងសាលាដំបូងរាជធានីភ្នំពេញនោះដែរ។
សូមបញ្ជាក់ថា លោក កឹម សុខា ត្រូវបានសមត្ថកិច្ចចាប់ខ្លួនកាលពាក់កណ្តាលយប់ថ្ងៃទី០៣ខែកញ្ញា ឆ្នាំ២០១៧និងបញ្ជូនទៅឃុំខ្លួន នៅពន្ធនាគារត្រពាំងផ្លុង ជាង៨ខែមកហើយ ក្រោមការចោទប្រកាន់ពីរដ្ឋាភិបាលថា «ក្បត់ជាតិ» ជុំវិញវីដេអូឃ្លីបនៃការថ្លែងរបស់លោកនៅក្នុងប្រទេសអូស្ត្រាលី កាលពីឆ្នាំ២០១៣។
ទាក់ទងនឹងរឿង លោក កឹម សុខា ត្រូវបានក្រសួងការបរទេសអាមេរិក កត់សំគាល់នៅក្នុងរបាយការណ៍របស់ខ្លួនស្តីពីបញ្ហាសិទ្ធិមនុស្សនៅក្នុងឆ្នាំ២០១៧ ដែលចេញផ្សាយកាលពីថ្ងៃទី២០ មេសា។ របាយការណ៍នេះ បានចាត់ទុកការចាប់ខ្លួន លោកកឹម សុខា ថាដោយធ្វើឡើង «ដោយបំពាន»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ