តុលាការកម្ពុជាបង្គាប់ឲ្យលោកសម រង្ស៊ីចូលខ្លួនមកបំភ្លឺរឿងប៉ុនប៉ងកាត់ដីឲ្យវៀតណាមនៅខែក្រោយ
ចៅក្រមស៊ើបសួរសាលាដំបូងរាជធានីភ្នំពេញបានចេញដីកាបង្គាប់ឲ្យលោកសម រង្ស៊ី ដែលជាប្រធានចលនាសង្រ្គោះជាតិចូលទៅកាន់តុលាការនៅព្រឹកថ្ងៃទី១៣ ខែសីហា ដើម្បីឆ្លើយបំភ្លឺទាក់ទងនឹងសំណុំរឿងប៉ុនប៉ងកាត់ទឹកដីខ្មែរឲ្យវៀតណាម។ ដីកាបង្គាប់ឲ្យចូលខ្លួននេះ ត្រូវបានកម្លាំងមានសមត្ថកិច្ចយកទៅបិទនៅទីស្នាក់ការអតីតបក្សសង្រ្គោះជាតិនៅព្រឹកថ្ងៃចន្ទនេះ។ ឆ្លៀតឱកាសនេះ វណ្ណ សុគន្ធា សូមរំឮកជូនលោកអ្នកឡើងវិញអំពីដំណើររឿងលោកសម រង្ស៊ីនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
សំណុំរឿងលោកសម រង្ស៊ី បានកើតឡើងកាលពីអំឡុងដើមឆ្នាំ២០១៨នេះ តាមរយៈការបែកធ្លាយវីដេអូមួយនៅតាមបណ្តាញសង្គមដោយបង្ហាញពីសកម្មភាពលោកសម រង្ស៊ី និងលោកកុក ស ដែលជាមេដឹកនាំជនជាតិភាគតិចវៀតណាមបានចុះហត្ថលេខារួមគ្នាមួយនៅលើទឹកដីសហរដ្ឋអាមេរិក កាលពីអំឡុងឆ្នាំ២០១៣កន្លងទៅ។ នៅក្នុងវីដេអូជាងមួយនាទីនេះ លោកសម រង្ស៊ី បានអះអាងថា នៅពេលគណបក្សសង្គ្រោះជាតិដឹកនាំរដ្ឋាភិបាល លោកនឹងកាត់ខេត្តរតនគិរី មណ្ឌលគិរី ស្ទឹងត្រែង និងក្រចេះឲ្យក្រុមជនជាតិភាគតិចវៀតណាម Degar (ម៉ុងតាញ៉ា) ដើម្បីគ្រប់គ្រងផ្តល់ស្វ័យភាព និងមានសិទ្ធិពេញលេញ អាចរស់នៅនិងមានសិទ្ធិដូចប្រជាជនកម្ពុជាដែរ។ គឺនៅត្រង់ចំណុចនេះហើយ ដែលរដ្ឋាភិបាលកម្ពុជាបានចោទលោកសម រង្ស៊ី ថាបានធ្វើទង្វើក្បត់ជាតិ។
ក៏ប៉ុន្តែលោកសម រង្ស៊ីវិញ បានបដិសេធការចោទប្រកាន់នេះដោយអះអាងថា ឯកសារដែលលោកចុះហត្ថលេខាជាមួយលោកកុក សនោះមានខ្លឹមសារចង់ឲ្យមានការទទួលស្គាល់សិទ្ធិស្របច្បាប់របស់ជនជាតិភាគតិចម៉ុងតាញ៉ា ដែលរស់នៅខេត្តភាគឦសានប្រទេសកម្ពុជា ដូចជាខេត្តមណ្ឌលគិរី រតនគិរី ក្រចេះ និងស្ទឹងត្រែង ពោល គឺមិនមែនជាការកាត់ដីឲ្យវៀតណាមអ្វីឡើយ។ សម្រាប់លោកសម រង្ស៊ី ការដែលរដ្ឋាភិបាលកម្ពុជាចោទប្រកាន់លោកបែបនេះ គឺគ្រាន់តែជាលេស ដើម្បីបង្ក្រាបលើអ្នកប្រជាធិបតេយ្យប៉ុណ្ណោះ។
បើទោះបីជាលោកសម រង្ស៊ីបដិសេធ ប៉ុន្តែក្រសួងមហាផ្ទៃកម្ពុជាវិញ នៅតែចាត់ទុកទង្វើរបស់លោកសម រង្ស៊ីនេះថា ក្បត់ជាតិហើយបានដាក់ពាក្យប្តឹងទៅកាន់តុលាការថែមទៀត។ តុលាការសាលាដំបូងរាជធានីភ្នំពេញ ក៏បានចាត់ការលើសំណុំរឿងនេះ ដោយកាលពីថ្ងៃទី០៧ ខែឧសភា ឆ្នាំ២០១៨ តុលាការបានដីកាកោះហៅលោក សម រង្ស៊ី ឲ្យចូលបំភ្លឺមកសាលាដំបូងរាជធានីភ្នំពេញម្តងរួចមកហើយ តែលោកសម រង្ស៊ីបដិសេធ។ ដោយសារតែលោកសម រង្ស៊ី មិនព្រមចូលខ្លួនដូច្នេះ ទើបតុលាការបានដីកាថ្មីនៅថ្ងៃចន្ទនេះដោយបង្គាប់ឲ្យលោកសម រង្ស៊ី ចូលខ្លួនតែម្តង។ ចំពោះដីកាថ្មីនេះ លោកសម រង្ស៊ី ដែលកំពុងស្នាក់នៅឯប្រទេសបារាំង មិនទាន់បញ្ចេញប្រតិកម្មបែបណាមួយនៅឡើយទេ។
សូមបញ្ជាក់ថា នេះមិនមែនជាសំណុំរឿងទីមួយរបស់លោកសម រង្ស៊ី នៅតុលាការកម្ពុជានោះទេ។ កន្លងមកលោកសម រង្ស៊ី បានរងនូវបណ្តឹងជាច្រើនពីសំណាក់ថ្នាក់ដឹកនាំរដ្ឋាភិបាល និងគណបក្សប្រជាជនកម្ពុជាមិនតិចជាង១០នោះទេ។ សំណុំរឿងមួយចំនួនត្រូវបានតុលាការកាត់ក្តីរួចរាល់ ហើយមួយចំនួនទៀតកំពុងស្ថិតក្នុងដៃតុលាការនៅឡើយ។ យ៉ាងណាក៏ដោយ លោកសម រង្ស៊ី បានបញ្ជាក់ម្តងជាពីរដងថា លោកមិនខ្វល់នឹងបណ្តឹងអស់ទាំងនោះទេ ហើយថា បើមានការប្តឹងលោកកាន់តែច្រើន គឺផ្តល់ឱកាសឲ្យលោកកាន់តែច្រើនផងដែរដើម្បីបកស្រាយពីការពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ