បក្សប្រជាជនកម្ពុជា ដាក់ទិសដៅចំៗដើម្បីពង្រឹងអំណាចបក្សឆ្ពោះទៅរកការបោះឆ្នោតខាងមុខ
នៅមិនដល់មួយឆ្នាំទៀតទេ ការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤ នឹងមកដល់ ពោលគឺ ចំថ្ងៃអាទិត្យ ទី៤ ឧសភា ២០១៧។ គណបក្សកាន់អំណាច កាន់ត្រៀមខ្លួនរួចហើយ ដើម្បីពង្រឹងគណបក្សឆ្ពោះទៅរកជោគជ័យ នៅពេលបោះឆ្នោត។ ការដាក់ទិសដៅចំៗ ដោយពន្លឿននីតិវិធីតុលាការ បានរងការរិះគន់មួយចំនួន តែបក្សកាន់អំណាចចាត់ទុកថា មតិទាំងនោះគ្រាន់តែជា សម្តីនយោបាយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ចាប់ពីពេលនេះតទៅ ទិសដៅភារកិច្ចជាក់លាក់របស់គណបក្សប្រជាជនកម្ពុជា នាឆមាសទី២ ឆ្នាំ២០១៦ គឺជម្រុញការអនុវត្តនីតិវិធីរបស់តុលាការអោយបានលឿន ដោយមិនផ្អឹបទុកឡើយ។ បើតាម អ្នកនាំពាក្យគណបក្សប្រជាជនកម្ពុជា លោក សុខ ឥសាន ការពន្លឿននីតិវិធីតុលាការ មិនត្រឹមតែមានឥទ្ធិពលដល់សំណុំរឿងផ្លូវច្បាប់របស់មេបក្ស និងមន្រ្តីបក្សសង្រ្គោះជាតិប៉ុណ្ណោះទេ ថែមទាំងប្រជាជនទូទៅផងដែរ។ លោក ចាត់ទុកមតិរិះគន់ ដែលថាបក្សកាន់អំណាចធ្វើអោយបក្សប្រឆាំងចុះខ្សោយ ដោយប្រើប្រាស់ប្រព័ន្ធតុលាការ គ្រាន់តែជា វោហានយោបាយប៉ុណ្ណោះ។
មន្រ្តីជាន់ខ្ពស់គណបក្សសង្រ្គោះជាតិ លោក អេង ឆៃអ៊ាង យល់ថា បក្សសង្គ្រោះជាតិកំពុងរងភាពអយុត្តិធម៌ដោយប្រព័ន្ធតុលាការ តែភាពរងគ្រោះទាំងនេះ នឹងទាក់ទាញសម្លេងគាំទ្រពីប្រជាពលរដ្ឋច្រើនទៀត។ លោក បន្ថែមថា ការប្រើប្រាស់អំណាច ឬមធ្យោបាយណាមួយ ដើម្បីធ្វើបាបគូប្រជែង តាមរយៈការចាប់អ្នករិះគន់ដាក់ពន្ធនាគារ នាំអោយ មតិសាធារណជនជាតិ និងអន្តរជាតិ មិនអាចទទួលយកបានឡើយ។
ទោះបីជាយ៉ាងណាក្តី អ្នកនាំពាក្យគណបក្សប្រជាជនកម្ពុជា លោក សុខ ឥសាន ពន្យល់ថា វាជារឿងធម្មតាទេ សម្រាប់ការមានប្រៀបរបស់បក្សកាន់អំណាច ខណៈបក្សប្រឆំាងកំពុងតែខ្សោយ ហើយពិការក្បាលម៉ាស៊ីន។ ក្នុងដំណាក់កាលដែលគណបក្សនីមួយៗសុទ្ធតែ កម្តៅសាច់ដុំរៀងៗខ្លួន ឆ្ពោះទៅរកជោគជ័យក្នុងការបោះឆ្នោតឆ្នាំខាងមុខ គណបក្សកាន់អំណាចនឹងពង្រឹងខ្លួនកាន់តែខ្លាំង ដើម្បីរារាំងការពន្លាអំណាចពីគូប្រជែង។ អ្នកនាំពាក្យបក្សប្រជាជនកម្ពុជា បន្ថែមថា សមាជិកជាន់ខ្ពស់របស់គណបក្សប្រជាជនកម្ពុជា សុទ្ធតែបានជ្រាបពីស្មារតី និងការតាស់តឿនទាំងនេះ ក្នុងកិច្ចប្រជុំបូកសរុបលទ្ធផល និងដាក់ទិសដៅការងារឆ្នាំ២០១៦ កាលពីថ្ងៃអង្គារ នៅទីស្នាក់ការកណ្តាលបក្សប្រជាជនកម្ពុជា។
ចំពោះលោក អេង ឆៃអ៊ាង មន្រ្តីជាន់ខ្ពស់បក្សសង្រ្គោះជាតិ បញ្ជាក់ថា គោលដៅរបស់បក្សឆ្ពោះទៅការបោះឆ្នោតខាងមុខ គឺចង់ឃើញដំណោះស្រាយនយោបាយមួយ ដើម្បីអោយការបោះឆ្នោតអាចទទួលយកបានពីគ្រប់ភាគីពាក់ព័ន្ធ។ លោក ថ្លែងថា បក្សសង្រ្គោះជាតិ ចង់បានការបោះឆ្នោតសេរី និងយុត្តិធម៌ ហើយមានការទទួលស្គាល់ពីអន្តរជាតិ។
ការថ្លែងរបស់លោក អេង ឆៃអ៊ាង ដូច្នេះធ្វើឡើងចំពេលដែល ប្រធានគណបក្សសង្គ្រោះជាតិ លោក សម រង្ស៊ី កំពុងរស់ភៀសខ្លួន នៅក្រៅប្រទេស ដោយស្ពាយជាមួយនឹងបណ្តឹងយ៉ាងតិចប្រាំ ដែលប្តឹងដោយមន្រ្តីរដ្ឋាភិបាល។ អនុប្រធានគណបក្សសង្រ្គោះជាតិ តំណាងរាស្រ្ត និងសកម្មភាពបក្សមួយចំនួន ក៏កំពុងរងបណ្តឹងក្នុងដៃតុលាការផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ