លោកនាយករដ្ឋមន្ត្រី៖ បក្សកាន់អំណាចបន្តអនុវត្តវប្បធម៌សន្ទនា យ៉ាងស្មោះស
ប្រធានគណបក្សប្រជាជនកម្ពុជាក្នុងថ្ងៃ៧មករា ដែលគណបក្សនេះចាត់ទុកថាជាថ្ងៃជ័យជំនះលើរបបប្រល័យពូជសាសន៍ប៉ុលពតនោះ បានលើកឡើង ថាគណបក្សប្រជាជនកម្ពុជាបន្តអនុវត្តយ៉ាងស្មោះសនូវវប្បធម៌សន្ទនាជាមួយគណបក្ស ដែលមានអាសនៈក្នុងរដ្ឋសភា និងព្រឹទ្ធសភា។ ការលើកឡើងរបស់លោកនាយករដ្ឋមន្ត្រី ធ្វើឡើងក្រោយពីគណបក្ស ដែលមានអាសនៈក្នុងសភា ទាំងពីរឲ្យតម្រុយនៃការងាកទៅជជែកគ្នាពីបញ្ហានយោបាយ ដែលបានកើតឡើងនារយៈពេលចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
លោកហ៊ុន សែន ក្នុងនាមជាប្រធានគណបក្សប្រជាជនកម្ពុជា បានថ្លែងនៅចំពោះមុខសមាជិកសមាជិកាពីគ្រប់ខេត្តក្រុង ថាគណបក្សនេះបន្តអនុវត្តយ៉ាងស្មោះសនូវវប្បធម៌សន្ទនាជាមួយ គណបក្ស ដែលមានអាសនៈក្នុងរដ្ឋសភា និងព្រឹទ្ធសភា តាមគោលការណ៍នៃលទ្ធិប្រជាធិបតេយ្យ។ តាមរយៈសុន្ទរកថាក្នុងពិធីមីទ្ទិញរំឭកខួបលើកទី៣៨ នៃទិវាជ័យជំម្នះ៧មករានោះ ប្រធានគណបក្សកាន់អំណាចរូបនេះបានបញ្ជាក់ទៀតថា ភាពមិនស្មោះត្រង់ ការប្រើពាក្យសម្តីអសុរសវាយប្រហារគ្នា និងការញុះញង់បង្ក បញ្ឆេះឲ្យមានការគុំកួនចងកំហឹងនឹងគ្នា គឺមិនអាចរក្សាអាយុជីវិតនៃវប្បធម៌សន្ទនាបានឡើយ។
ការលើកឡើងពីការបន្តអនុវត្តយ៉ាងស្មោះសរនូវវប្បធម៌សន្ទនារបស់លោក នាយករដ្ឋមន្ត្រីហ៊ុន សែននៅថ្ងៃទី០៧ មករា គឺក្រោយពេលដែល លោកស ខេង ថ្នាក់ដឹកនាំតំណាងរាស្រ្តគណបក្សកាន់អំណាច បានបង្ហាញគម្រោងជួបគណបក្សសង្គ្រោះជាតិក្រោយថ្ងៃទី១១មករា។ ការផ្ដល់សញ្ញាវិជ្ជមានយ៉ាងដូច្នេះបន្ទាប់ពីលោក កឹម សុខា ប្រធានថ្នាក់ដឹកនាំគណបក្សសង្គ្រោះជាតិបានផ្ញើលិខិតទៅកាន់លោក ស ខេង កាលពីថ្ងៃទី៥មករា ដើម្បីរកពេលវេលាសមស្របណាមួយជួបគ្នាដោះស្រាយបញ្ហាដែលសេសសល់ ឲ្យបានក្នុងខែមករានៃឆ្នាំថ្មីនេះ។
សាស្ត្រាចារ្យវិទ្យាសាស្ត្រនយោបាយ លោក សូរ ចន្ថា បានថ្លែងប្រាប់វិទ្យុបារាំងអន្តជាតិថា ចាប់តាំងពីបង្កើតវប្បធម៌សន្ទនានេះមក គឺគណបក្សកាន់អំណាចតែងតែប្រកាសបន្តវប្បធម៌សន្ទនា ប៉ុន្តែបើតាមការពិនិត្យជាក់ស្តែងគឺមិនមានវប្បធម៌សន្ទានដែលស្មោះត្រង់ទេ។ លោកបញ្ជាក់ថាវប្បធម៌សន្ទនាកន្លងមកគឺបានបង្កប់នូវយុទ្ធសាស្ត្រ និងល្បែងនយោបាយនៅក្នុងនោះ ដែលធ្វើឲ្យដៃគូម្ខាងទៀតចុះខ្សោយ។
លោកអេង ឆៃអ៊ាង មន្ត្រីជាន់ខ្ពស់គណបក្សសង្រ្គោះជាតិថាលោករីករាយ ដែលគណបក្សនយោបាយទាំងពីរបន្តវប្បធម៌សន្ទនាជាមួយគ្នា ដើម្បីដោះស្រាយបញ្ហារួមរបស់ប្រទេសជាតិ។ លោកបញ្ជាក់ថាវប្បធម៌សន្ទនាស្មោះស ឬមិនស្មោះស គឺទុកឲ្យសាធារណៈមតិជាអ្នកវាយតម្លៃ ចំណែកគណបក្សសង្រ្គោះជាតិមិនមានល្បិចអ្វីនោះទេ ហើយអ្វីដែលសំខាន់គឺគណបក្សប្រឆាំងចង់ចូលរួមជជែកដោះស្រាយបញ្ហា ដែលជាផលប្រយោជន៍សង្គម។
គួរជំរាបជូនថា វប្បធម៌សន្ទនា ត្រូវបានផ្តួចផ្តើមបង្កើតឡើងដោយលោកនាយករដ្ឋមន្ត្រីហ៊ុន សែន ប្រធានគណបក្សប្រជាជនកម្ពុជា និងលោកសម រង្ស៊ី ប្រមុខគណបក្សសង្គ្រោះជាតិ ក្រោយពីគណបក្សជាប់ឆ្នោតទាំងពីរបានចាប់ដៃគ្នាបិទបញ្ចប់ជម្លោះនយោបាយកាលពីថ្ងៃទី២២ ខែកក្កដា ឆ្នាំ២០១៤។ តាមរយៈវប្បធម៌សន្ទនានេះគណបក្សទាំងពីរក៏បានសម្រេចនូវកិច្ចការជាតិធំៗជាមួយគ្នាដូចជា ការធ្វើវិសោធនកម្មច្បាប់បោះឆ្នោត និង បទបញ្ជាផ្ទៃក្នុងនៃរដ្ឋសភាជាដើម។ ជាមួយគ្នានេះ បញ្ហានយោបាយមួយចំនួន ក៏ត្រូវបានដោះស្រាយតាមរយៈវប្បធម៌សន្ទនានេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ