សិល្បៈកែច្នៃរបស់ខ្មែរ៧ប្រភេទបង្ហាញខ្លួននៅក្នុងពិព័រណ៍បារាំងពីរសប្ដាហ៍
ស្ថានទូតបារាំងប្រចាំនៅកម្ពុជា ប្រកាសរៀបចំកម្មវិធីពីរសប្ដាហ៍នៅភ្នំពេញ ដើម្បីចូលរួមអបអរមិត្តភាព បារាំង-កម្ពុជា ចាប់ពីថ្ងៃទី១៧ដល់៣០ខែមីនា។ នៅក្នុងអំឡុងពេលនៃការរៀបចំទស្សនីយភាពនេះ សិល្បៈកែច្នៃរបស់ខ្មែរ៧ប្រភេទ នឹងបង្ហាញខ្លួន សម្រាប់ការទស្សនាកំសាន្តដល់សាធារណៈជនខ្មែរនិងបរទេសផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
សិល្បៈកែច្នៃរបស់ខ្មែរទាំង៧ប្រភេទនោះរួមមានៈ សត្វគោព្រៃកែច្នៃចេញពីច្រវ៉ាក់ម៉ូតូនិងគ្រឿងម៉ាស៊ីនចាស់ៗមួយចំនួនទៀត , ការសូន្យរូបមនុស្សបង្ហាញពីផលវិបាកនៃជនភៀសខ្លួនខ្មែរ មុនសម័យប៉ុលពល និងការសូនរូបរុក្ខជាតិផ្លែឈើទាលចេញពីដើមផ្ដៅ ជាដើម។ ក្នុងចំណោមរូបភាពដែលបានរៀបរាប់ទាំងនេះ សុទ្ធតែបង្កប់អត្ថន័យនៅក្នុងជីវភាពរស់នៅរបស់ពលរដ្ឋខ្មែរ។
លោក ឯម រៀម ដែលស្នាដៃសិល្បៈរបស់គាត់ទទួលបានការចាប់អារម្មណ៍ជាងគេ តាមរយៈ ការយករុក្ខជាតិផ្ដៅមកច្នៃជាផ្លែឈើទាល ដែលផ្លែឈើទាលនេះមានប្រភពមកពីខេត្តសៀមរាបបានអះអាងថា លោកចង់បំផុសឲ្យពលរដ្ឋខ្មែរមកប្រើប្រាស់ផលិតផលផ្ដៅ។ លោក ឯម រៀម កត់សម្គាល់ថា ទម្លាប់ពលរដ្ឋខ្មែរស្ទើរតែទាំងស្រុងមើលរំលងគុណភាពវត្ថុធាតុដើមនៅស្រុក ដោយឲ្យតម្លៃទៅលើរបស់ប្រើកែច្នៃពីខាងក្រៅមកវិញ។ បើតាមលោក ឯម រៀម ផ្ទុយពីជនជាតិខ្មែរ ជនបរទេសបែរជាចាប់អារម្មណ៍ផលិតផលរបស់ខ្មែរទៅវិញ ពិសេសគឺការច្នៃរុក្ខជាតិផ្ដៅទៅជារបស់ប្រើប្រាស់អ្វីមួយ។
ចំណែកស្ថានទូតបារាំងនឹងបង្ហាញពី វប្បធម៌ សិប្បកម្ម និងសហគ្រិនភាពរបស់វិនិយោគទុនបារាំង។ បើផ្អែកតាមខ្លឹមសារសន្និសីទកាសែតនៅព្រឹកថ្ងៃទី១៥មីនានេះ នៅក្នុងកម្មវិធីបារាំងពីរសប្ដាហ៍នៅភ្នំពេញ ក៏មានដែរការបង្ហាញមុខម្ហួបរបស់ប្រទេសប្រចាំនៅភោជនីយដ្ឋានមួយចំនួននៅភ្នំពេញ និងសៀមរាប។ ក្រៅពីបង្ហាញមុនម្ហូបមានការប្រគុំតន្ត្រី និងកិច្ចពិភាក្សាទៅលើការវិនិយោគរបស់ក្រុមហ៊ុនបារាំងប្រចាំនៅកម្ពុជា។
សូមបញ្ជាក់ថា ក្រុមហ៊ុនបារាំងដែលកំពុងធ្វើវិនិយោគនៅកម្ពុជាមានចំនួន៤០០ក្រុមហ៊ុន។ ហើយបារាំងគឺប្រទេសទី១នៅក្នុងទ្វីបអឺរ៉ុប ដែលមានក្រុមហ៊ុនមកវិនិយោគច្រើនជាងគេនៅកម្ពុជា។ ចំណែកទំហំពាណិជ្ជកម្មរវាងបារាំង និងកម្ពុជាមានការកើនឡើង៣៦ភាគរយនៅក្នុងឆ្នាំ២០១៦ដោយគិតជាទឹកប្រាក់មានចំនួន៩៤០លានអឺរ៉ូ។ បើតាមស្ថានទូតបារាំង ការនាំចូលពីកម្ពុជាទៅបារាំងមានចំនួនច្រើនជាង បារាំងនាំចូលមកកម្ពុជា។ លោកស្រី អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំនៅកម្ពុជា បញ្ជាក់ថាកម្មវិធី២សប្តាហ៍នៅកម្ពុជាពេលនេះ គឺជាការពង្រឹងនូវទំនាក់ទំនងរវាងកម្ពុជាបារាំងបន្ថែមទៀត ជាពិសេសមានការទាក់ទាញវិនិយោគិនបារាំងកាន់តែច្រើនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ