គណបក្សសង្គ្រោះជាតិលើកស្លាកតស៊ូមតិទាមទារដោះលែងលោក កឹម សុខា
គណបក្សសង្គ្រោះជាតិ បានប្រកាសលើកស្លាកតស៊ូមតិគ្រប់ស្នាក់ការរបស់បក្សនេះនៅទូទាំងប្រទេសកម្ពុជា ដើម្បីទាមទាររកយុត្តិធម៌ជូន លោក កឹម សុខា ប្រធានគណបក្សប្រឆាំង។ ការប្រកាសដូច្នេះបានធ្វើឡើងដោយលោក ស៊ុន ឆៃ មន្ដ្រីជាន់ខ្ពស់របស់គណបក្សសង្គ្រោះជាតិ នៅក្នុងសន្និសីទកាសែតនៅស្នាក់ការកណ្ដាលគណបក្សសង្គ្រោះជាតិនៅសង្កាត់ ចាក់អង្រែលើ រាជធានីភ្នំពេញ នៅព្រឹកថ្ងៃទី ២៥ កញ្ញា នេះ។
ចុះផ្សាយនៅថ្ងៃ៖
ស្តាប់ - ០២:២១
ស្លាកសញ្ញា ដែលគ្រោងនឹងដាក់នៅតាមទីស្នាក់ការគណបក្សប្រឆាំងទូទាំងប្រទេសនោះ គឺមានទំហំប្រហែល ២ ម៉ែត្រ បួនជ្រុង ផ្ទៃពណ៌ខៀវចាស់ នៅចំកណ្ដាល មានរំលេចរូបលោក កឹម សុខា ស្លៀកឯកសណ្ឋាន ខោខ្មៅ អាវ (ស) និង មួកពណ៌ស កំពុងឈរសើចលើកដៃរា ពីលើរថយន្ដនាំមុខក្បួនឃោសនាបោះឆ្នោត ដែលមានអ្នកហែរហមតាមក្រោយរាប់រយនាក់ និងមានអក្សរខ្មែរ និងអង់គ្លេសពណ៌សពីរបន្ទាត់នៅពីក្រោមរូបភាព។ អក្សរខ្មែរនោះបានសរសេរថា ត្រូវដោះលែង លោកប្រធាន កឹម សុខា ជាបន្ទាន់ដោយគ្មានលក្ខខណ្ឌ។ ស្លាកសញ្ញាតស៊ូមតិរបស់គណបក្សសង្គ្រោះជាតិនេះហើយ ដែលត្រូវបានលើកបញ្ឈរដោយក្រុមតំណាងរាស្ដ្រ បក្សប្រឆាំងកាលពីព្រឹកមិញនៅខាងមុខស្នាក់ការកណ្ដាលរបស់គណបក្សនេះ ។
លោក ស៊ុន ឆៃ មន្ដ្រីជាន់ខ្ពស់របស់គណៈបក្សសង្គ្រោះជាតិលើកឡើងថា ស្លាកសញ្ញានេះ នឹងត្រូវលើកបញ្ឈរនៅគ្រប់ស្នាក់ការទាំងអស់របស់គណបក្សសង្គ្រោះជាតិ ក្នុងប្រទេសកម្ពុជា។ លោកថា ការលើកស្លាកសញ្ញានេះ ជាការសម្ដែងការតស៊ូមតិរបស់គណបក្សប្រឆាំងដើម្បីជម្រុញឲ្យមានភាពយុត្តិធម៌ជូន លោក កឹម សុខា ដែលកំពុងជាប់ឃុំនៅពន្ធនាគារក្នុងខេត្តត្បូងឃ្មុំ ក្រោមបទចោទ ក្បត់ជាតិ។
ក្រៅពីការលើកស្លាកតស៊ូមតិ លោក ស៊ុន ឆៃ ក៏បានអំពាវនាវឲ្យតុលាការគ្រោងកាត់ក្ដីលោក កឹម សុខា ត្រូវប្រកាន់ខ្ជាប់នូវគោលការណ៍អព្យាក្រឹត្យ មិនលំអៀង។ បើតាមមន្ដ្រីជាន់ខ្ពស់គណបក្សប្រឆាំងរូបនេះ ប្រសិនបើតុលាការអនុវត្តការងាររបស់ខ្លួនប្រកបដោយឯករាជ្យ និងតាមគោលការណ៍ច្បាប់ឲ្យបានត្រឹមត្រូវនោះ លោកថា ប្រធានគណបក្សសង្គ្រោះជាតិ នឹងគ្មានទោស។ លោក ស៊ុន ឆៃ ក៏ស្នើឲ្យតុលាការនាំខ្លួនលោក កឹម សុខា មកចូលរួមក្នុងសវនាការដោយផ្ទាល់នៅថ្ងៃទី២៦ កញ្ញា ដែរ ដោយលោកថា សមត្ថកិច្ចមានលទ្ធភាពគ្រប់គ្រាន់ដើម្បីធានាសុវត្ថិភាពលោក កឹម សុខា។ ជាថ្មីម្ដងទៀត មន្ដ្រីជាន់ខ្ពស់គណបក្សសង្គ្រោះជាតិរូបនេះ បានចាត់ទុកថា សវនាការកាត់ក្ដីដែលអវត្តមាន លោក កឹម សុខា ជាការអនុវត្តដោយ”ខុសច្បាប់” ។
លោក ស៊ុន ឆៃ ក៏បានប្រកាសដែរថា ក្រុមសភារបស់បក្សប្រឆាំង នឹងទៅចូលរួមស្ដាប់សវនាការ សាលាឧទ្ធរណ៍នេះដែរ នៅថ្ងៃស្អែក ដើម្បីតាមដានការអនុវត្តច្បាប់របស់ស្ថាប័នតុលាការ។
គួររម្លឹកថា សាលាឧទ្ធរណ៍នឹងបើកសវនាការលើសំណុំរឿងលោក កឹម សុខា នៅថ្ងៃទី២៦ ស្អែក តាមបណ្ដឹងជំទាស់របស់ក្រុមមេធាវីលោក កឹម សុខា អំពីការសម្រេចឃុំខ្លួនលោក កឹម សុខា របស់សាលាដំបូងរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ