មហោស្រពភាពយន្តខ្លីចតុមុខ ២០១៧ បញ្ចាំងភាពយន្តខ្លី១៥៨រឿងដោយឥតគិតថ្លៃ
មហោស្រពភាពយន្តខ្លីចតុមុខឆ្នាំ២០១៧ បានចាប់ផ្ដើមហើយនៅថ្ងៃទី២៦តុលានេះ។ ព្រឹត្តិការណ៍នេះ នឹងបន្តអូសបន្លាយរហូតដល់ថ្ងៃទី២៩តុលាខាងមុខ ដោយមានចាក់បញ្ចាំងខ្សែភាពយន្តខ្លីចំនួន១៥៨រឿង ដោយឥតគិតថ្លៃ នៅតាមរោងភាពយន្តនិងសាលនានាចំនួន១១កន្លែងទូទាំងប្រទេស។
ចុះផ្សាយនៅថ្ងៃ៖
ស្តាប់ - ០២:០៩
មហោស្រពភាពយន្តខ្លីចតុមុខ ធ្វើឡើងដើម្បីផ្ដល់ឱកាសឲ្យយុវជននិងយុវនារីខ្មែរ ដែលស្រឡាញ់វិស័យភាពយន្ត បញ្ចេញស្នាដៃនិងទទួលដឹងព័ត៌មានកាន់តែច្រើនអំពីវិស័យភាពយន្ត។ ព្រឹត្តិការណ៍នេះ រៀបចំដោយក្រុមកុនខ្មែរកូនខ្មែរ សហការណ៍ជាមួយស្ថាប័នពាក់ព័ន្ធដទៃទៀត ពិសេសគឺរោងភាពយន្តនិងសាលបញ្ចាំងភាពយន្តសំខាន់ៗនៅទូទាំងប្រទេស។
ភាពយន្តខ្លីថ្មីៗនិងល្អៗមកពីបណ្ដាប្រទេសនៅក្នុងតំបន់និងពិភពលោកចំនួន៣០ប្រទេស ត្រូវបានប្រមែប្រមូលយកមកចាក់បញ្ចាំងជូនដោយឥតគិតថ្លៃ ដើម្បីបង្ហាញស្នាដៃផលិតកុនរបស់កូនខ្មែរឲ្យអន្ដរជាតិបានស្គាល់។ លោក ជា សុខហ៊ី ប្រធានមហោស្រពភាពយន្តខ្លីចតុមុខ សង្ឃឹមថា ព្រឹត្តិការណ៍នេះ នឹងផ្ដល់បទពិសោធន៍នៃការផលិតភាពយន្តដល់យុវជននិងយុវនារីខ្មែរ ក្នុងគោលដៅពង្រឹងនិងពង្រីកវិស័យភាពយន្តខ្មែរឲ្យកាន់តែរីកចម្រើន នាថ្ងៃអនាគត។
សូមជម្រាបជូនថា នៅក្នុងមហោស្រពភាពយន្តខ្លីចតុមុខឆ្នាំនេះ ខ្សែភាពយន្តយ៉ាងហោចណាស់១៥៨រឿង នឹងត្រូវចាក់បញ្ចាំងជូនសាធារណៈជនទស្សនា។ ក្នុងនោះ ភាពយន្តខ្មែរដែលជាប់ប្រកួតមានចំនួន២៨រឿង ភាពយន្តបរទេសជាប់ប្រកួតចំនួន១០៣រឿង និងភាពយន្តសម្រាប់បញ្ចាំងពិសេសចំនួន២៧រឿង។ ខ្សែភាពយន្តទាំងអស់នេះ នឹងត្រូវចាក់បញ្ចាំងនៅតាមរោងភាពយន្តនិងសាលសំខាន់ៗ ចំនួន១១ ដូចជា៖ សាលចតុមុខ រោងភាពយន្ត Legend ទាំង៣ទីតាំង, រោងភាពយន្ត Major Cineplex, រោងភាពយន្ត Prime Cineplex, សាលបូផាណា, កោះពេជ្រ, ផ្ទះមេត្តា, សាលសាលាបារាំង, និងសាលបារាយអណ្ដែតក្រុងសៀមរាប។
គួរកត់សម្គាល់ថា គិតត្រឹមឆ្នាំ២០១៧នេះ មហោស្រពភាពយន្តខ្លីចតុមុខ ប្រារព្ធធ្វើឡើងបាន៦លើកហើយ។ ក្រុមអ្នករៀបចំកម្មវិធីបានលើកឡើងថា មហោស្រពភាពយន្តខ្លីចតុមុខ បានទទួលការទទួលស្គាល់និងគាំទ្រកាន់តែច្រើនឡើងៗ ទាំងពីសំណាក់ផលិតករភាពយន្តជាតិនិងផលិតករភាពយន្តអន្ដរជាតិ តាមរយៈកំនើនឥតឈប់ឈរនៃការផ្ញើភាពយន្តមកចូលរួម។ នៅឆ្នាំនេះ ភាពយន្តអន្ដរជាតិ ដែលបានផ្ញើមកមហោស្រពភាពយន្តខ្លីចតុមុខមានចំនួនជាង៣ពាន់រឿង ខណៈភាពយន្តជាតិមាន៤៩រឿង។ ប៉ុន្តែមានភាពយន្តខ្លីតែ១៥៨រឿងប៉ុណ្ណោះ ដែលត្រូវបានសម្រិតសម្រាំងជ្រើសយកមកចាក់បញ្ចាំងជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ