អង្គការសង្គមស៊ីវិលពីរ ប្រកាសមិនដាក់អ្នកសង្កេតការណ៍បោះឆ្នោត ក្រោយបិទបន្ទប់ស្ថានការណ៍បោះឆ្នោត
អង្គការសង្គមស៊ីវិលចំនួនពីរ បានប្រកាសមិនចុះឈ្មោះដាក់អ្នកសង្កេតការណ៍ចូលរួមឃ្លាំមើលការបោះឆ្នោតជាតិ ដែលនឹងធ្វើឡើង នៅថ្ងៃទី ២៩ ខែកក្កដា ខាងមុខនេះទេ។ យ៉ាងណាក៏ដោយ អ្នកនាំពាក្យ គ.ជ.ប អះអាងថា នៅមានអង្គការសមាគមជាច្រើនទៀត កំពុងរៀបចំដាក់ពាក្យចូលរួមសង្កេតការណ៍បោះឆ្នោត។
ចុះផ្សាយនៅថ្ងៃ៖
ស្តាប់ - ០២:៥១
អង្គការឃ្លាំមើលការបោះឆ្នោតសំខាន់ៗទាំងពីរនោះ រួមមាន គណៈកម្មាធិការដើម្បីការបោះឆ្នោតដោយសេរី និងយុត្តិធម៌ ហៅកាត់ថា ខុមហ្វ្រែល (Comfrel) និងអង្គការនិចហ្វិច ដោយបានលើកមូលហេតុថា បារម្ភពីសុវត្ថិភាពក្រោយពីការបិទបន្ទប់ស្ថានការណ៍សម្រាប់ឃ្លាំមើលការបោះឆ្នោត និងថា ការបោះឆ្នោតជាតិនៅខែកក្កដាខាងមុខនេះ នឹងធ្វើឡើងដោយមិនមានការប្រកួតប្រជែងគ្នាខ្លាំងក្លានោះទេ។
តាមរយៈសារព័ត៌មានក្នុងស្រុក អង្គការខុមហ្រ្វែលបានអះអាងថា អង្គការរបស់ខ្លួនបានសម្រេចមិនចូលរួមក្នុងការសង្កេតការណ៍ការបោះឆ្នោតជ្រើសរើសតំណាងរាស្ត្រអាណត្តិទី៦នេះឡើយ ដោយថា រដ្ឋាភិបាលបានព្រមានទៅលើបន្ទប់ស្ថានការណ៍ ដែលជំរុញឲ្យក្រុមអ្នកសង្កេតការណ៍មកពីអង្គការសង្គមស៊ីវិលនានាមានក្ដីបារម្ភចំពោះសុវត្ថិភាពរបស់ពួកគេ។ បន្ទប់ស្ថានការណ៍ឃ្លាំមើលការបោះឆ្នោត ដែលប្រមូលផ្ដុំទៅដោយអង្គការសង្គមស៊ីវិលជិត៤០ ត្រូវបានក្រសួងមហាផ្ទៃព្រមានចាត់វិធានការតាមផ្លូវច្បាប់ ក្រោយពីការបោះឆ្នោត-សង្កាត់ឆ្នាំ២០១៧ បន្ទាប់ពីលោកនាយករដ្ឋមន្រ្តី ហ៊ុន សែន បានបញ្ជាឲ្យរដ្ឋមន្ត្រីក្រសួងមហាផ្ទៃ លោក ស ខេង ពិនិត្យមើលផ្លូវច្បាប់ ដោយលោកនាយករដ្ឋមន្រ្តីបានភ្ជាប់ថា ជាមូលដ្ឋានបញ្ជាឲ្យមាន «បដិវត្តន៍ពណ៌» នៅកម្ពុជា។
ដោយឡែក លោក សំ គន្ធាមី ប្រធានអង្គការនិចហ្វិចបានថ្លែងថា អង្គការរបស់លោក ក៏នឹងមិនចុះឈ្មោះដាក់អ្នកសង្កេតការណ៍បោះឆ្នោតលើកនេះដែរ ដោយសារថា ការបោះឆ្នោតជាតិខាងមុខនេះ នឹងគ្មានការប្រកួតប្រជែងខ្លាំងក្លានោះទេ បើទោះបីជាមានគណបក្សនយោបាយជាច្រើនបានទៅចុះឈ្មោះចូលរួមការបោះឆ្នោតក្តី។
ការប្រកាសរបស់អង្គការសង្គមស៊ីវិលទាំងពីរនេះ បានធ្វើឡើងស្របពេលដែល គ.ជ.ប. បានបិទបញ្ចប់ការចុះបញ្ជីឈ្មោះគណបក្សនយោបាយកាលពីថ្ងៃទី ១៤ ឧសភា ដោយមានគណបក្សនយោបាយចំនួន២០បានចុះឈ្មោះ តែគ្មានគណបក្សសង្រ្គោះជាតិនោះឡើយ។ សម្រាប់អង្គការ Comfrel ការបោះឆ្នោតបែបប្រជាធិបតេយ្យសេរីពហុបក្ស គឺត្រូវមានការចូលរួមពីគណបក្សច្រើន និងក្រុមសង្គមស៊ីវិលឯករាជ្យ។ ប៉ុន្តែអ្វីដែលរិតតែចាំបាច់បំផុត គឺត្រូវមានការចូលរួមពីគណបក្សប្រឆាំង ដើម្បីឲ្យការប្រកួតប្រជែងមានលក្ខណៈស្របច្បាប់។
ទោះជាយ៉ាងនេះក្តី លោក ឌឹម សុវណ្ណារុំ អ្នកនាំពាក្យគណៈកម្មាធិការជាតិរៀបចំការបោះឆ្នោត មិនបង្ហាញការភ្ញាក់ផ្អើលចំពោះការសម្រេចចិត្តរបស់ក្រុមអង្គការសង្គមស៊ីវិលទាំងពីរនេះឡើយ។ បើតាមលោក ឌឹម សុវណ្ណារុំ នៅមានអង្គការសង្គមស៊ីវិលជាតិ និងអន្តរជាតិជាច្រើនទៀត កំពុងត្រៀមខ្លួននិងបានកំពុងត្រៀមខ្លួនចុះឈ្មោះចូលរួមសង្កេតការណ៍បោះឆ្នោត នៅថ្ងៃទី ២៩ ខែកក្កដាខាងមុខ។
សូមបញ្ជាក់ថា ការទទួលចុះឈ្មោះក្រុមអ្នកសង្កេតការណ៍ជាតិនិងអន្តរជាតិ បានចាប់តាំងពីថ្ងៃទី២៣ ខែមេសា រហូតទៅដល់ថ្ងៃទី ២៥ ខែកក្កដាខាងមុខ។ យ៉ាងណាក៏ដោយ នេះជាលើកដំបូងហើយ ដែលអង្គការសង្គមស៊ីវិលសំខាន់ៗទាំងពីរនេះ បានបដិសេធចូលរួមក្នុងកិច្ចដំណើរការសង្កេតការណ៍បោះឆ្នោតចាប់តាំងពីឆ្នាំ១៩៩៨មក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ