សង្គមស៊ីវិល ព្រមានពីគ្រោះថ្នាក់លើផ្លូវជាតិលេខ៤ថា មានទំហំកាន់តែធំ បើមិនប្រញាប់ដោះស្រាយ
ចុះផ្សាយនៅថ្ងៃ៖
ស្តាប់ - ១០:៥១
ភាគីពាក់ព័ន្ធកត់សម្គាល់ថា គ្រោះថ្នាក់ចរាចរណ៍ធំៗលើផ្លូវជាតិលេខ៤ កើតមានញឹកញាប់នៅប៉ុន្មានឆ្នាំចុងក្រោយនេះ។ ជាក់ស្ដែងកាលពីថ្ងៃទី៨មិថុនា មនុស្ស១០នាក់បានស្លាប់នៅក្នុងហេតុការណ៍នេះ និងបណ្ដាលឲ្យរថយន្តបីគ្រឿងឆាបឆេះផងដែរ។ ក្រៅពីហេតុការណ៍នេះ កំណាត់ផ្លូវជាតិលេខ៤ តាមរយៈគ្រោះថ្នាក់ចរាចរណ៍ដដែលនេះ ក៏បានបង្កឲ្យមានករណីស្លាប់ជាបន្តបន្ទាប់ផងដែរ។ អ្នកជំនាញផ្នែកចរាចរណ៍មើលឃើញថា មួយផ្នែកដែលនាំឲ្យករណីគ្រោះថ្នាក់ចរាចរណ៍កើតមានញឹកញាប់លើផ្លូវជាតិលេខ៤នេះ ព្រោះជាផ្លូវសេដ្ឋកិច្ច រថយន្តតូចធំចរាចរណ៍ចេញចូលជាប់មិនដាច់ តាមរយៈការដឹកទំនិញទៅលក់នៅបរទេស ដោយឆ្លងកាត់កំពង់ផែក្រុងព្រះសីហនុ។ បើតាមសង្គមស៊ីវិលនិងអ្នកធ្វើការផ្នែកចរាចរណ៍បានមូលមាត់គ្នាថា ផ្លូវជាតិលេខ៤ ត្រូវប្រញាប់ដោះស្រាយ បើពុំដូច្នោះការស្លាប់ដោយសារគ្រោះថ្នាក់ចរាចរណ៍នឹងមានទំហំកាន់តែធំ។