លោក ហង់ ជួនណារ៉ុន៖ ក្រសួងអប់រំគ្រោងបង្កើតនាយកដ្ឋានថ្មីមួយ ដើម្បីពង្រឹងការប្រលងបាក់ឌុបឆ្នាំក្រោយ
ចុះផ្សាយនៅថ្ងៃ៖
ស្តាប់ - ១២:១៩
ភ្ញៀវប្រចាំថ្ងៃរបស់វិទ្យុបារាំងអន្តរជាតិ RFI នៅរាត្រីនេះ គឺលោក ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ឆ្លើយតបនឹងសំណួររបស់វិទ្យុបារាំងអន្តរជាតិ លោក ហង់ ជួនណារ៉ុន បានឲ្យដឹងថា ក្រោមនយោបាយកំណែរទម្រង់លើវិស័យអប់រំ ក្រសួងគ្រោងនឹងដាក់ឲ្យសាកល្បងចំពោះការផ្លាស់ប្តូរម៉ោងបង្រៀនរបស់លោកគ្រូអ្នកគ្រូនៅថ្នាក់បឋមសិក្សាពីបង្រៀនមួយពេលទៅជាបង្រៀនពេញមួយថ្ងៃវិញ។ ការសាកល្បងជំហានដំបូង នឹងធ្វើឡើងនៅសាលាបឋមសិក្សាចំនួន៣ នៅក្នុងខេត្តសៀមរាប និងខេត្តកំពង់ចាម ដោយបន្ថែមប្រាក់ខែដល់គ្រូបង្រៀនប្រមាណជា៦០%។ ការណ៍នេះ គឺដើម្បីឆ្លើយតបទៅនឹងរបាយការណ៍ថា សិស្សថ្នាក់ទី៦ប្រមាណជា៣០ទៅ៤០% មិនទាន់ចេះអានភាសាខ្មែរ។ ដោយឡែកលើលទ្ធផលនៃការប្រលងបាក់ឌុបថ្មីៗនេះវិញ លោក ហង់ ជួនណារ៉ុន បានសាទរចំពោះសិស្សដែលប្រលងជាប់បាននិទ្ទេស A កាន់តែកើនឡើងពីឆ្នាំទៅមួយឆ្នាំ។ ហើយដើម្បីរក្សានិរន្តរភាពនេះ ក្រសួងគ្រោងនឹងស្នើបង្កើតនាយកដ្ឋានប្រលងដាច់ដោយឡែកមួយ ដើម្បីពង្រឹងការប្រលងបាក់ឌុបនៅឆ្នាំក្រោយ។