ពលរដ្ឋជិត១០០សហគមន៍ឡើងមកភ្នំពេញជួបជុំដាក់ញត្តិរកដំណោះស្រាយដីធ្លី
ពលរដ្ឋមកពីសហគមន៍ជិត១០០នៅក្នុងរាជធានីភ្នំពេញនិងតាមបណ្ដាលខេត្តបានជួបជុំគ្នានៅព្រឹកថ្ងៃចន្ទទី០៥តុលានេះ បំណងដាក់ញត្តិទៅស្ថាប័នពាក់ព័ន្ធដើម្បីជួយរកដំណោះស្រាយដីធ្លីជូនពួកគាត់ ក្នុងឱកាសទិវាសិទ្ធលំនៅដ្ឋានពិភពលោក។ ពលរដ្ឋជាច្រើនរយនាក់ដែលបានឡើងមកភ្នំពេញសុទ្ធតែអះអាងថា ពួកគាត់គឺជាជនរងគ្រោះពីការរំលោភបំពានដីធ្លីពីក្រុមហ៊ុនដោយគ្មានទទួលបានសំណងជាមួយនិងការបណ្ដេញចេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
រដ្ឋសភាជាតិ ក្រសួងមហាផ្ទៃ ក្រសួងដែនដី សាលារាជធានីភ្នំពេញ និង ខុទ្ទកាល័យលោកនាយករដ្ឋមន្ត្រី ហ៊ុន សែន គឺជាគោលដៅដែលពលរដ្ឋមកពីសហគមន៍នានាមានបំណងយកញត្តិទៅប្រគល់ជូនដើម្បីឲ្យស្ថាប័នទាំងនេះរកដំណោះស្រាយជូនពួកគាត់។ ខ្លឹមសារតែមួយដែលមានចារនៅក្នុងញត្តិត្រូវបានតំណាងសហគមន៍ដាក់ទៅកាន់រដ្ឋសភាមុនគេ។
ញត្តិនោះបានសសេរថា«ប្រជាពលរដ្ឋរស់នៅក្នុងរាជធានីភ្នំពេញច្រើនជាង១០ភាគរយត្រូវបានជម្លៀសចេញពីលំនៅដ្ឋានរបស់ខ្លួនក្នុងរយៈពេលពីរទសវត្សចុងក្រោយនេះ ហើយកំពុងរស់នៅក្នុងតំបន់ក្រីក្រជាមួយជីវភាពលំបាក់។ ហើយការជម្លៀសចេញពីលំនៅដ្ឋានរបស់ខ្លួនក្រោមហេតុផលដើម្បីការអភិវឌ្ឍ កែលម្អសោភ័ណភាពទីក្រុង ការរៀចំសណ្ដាប់ធ្នាប់ សន្តិសុខ និង សុវត្ថិភាពសង្គម»។ ដូច្នេះនៅក្នុងឱកាសទិវាសិទ្ធលំនៅស្ថាននេះ នេសហគមន៍ស្នើទៅរដ្ឋាភិបាលនិងស្ថាប័នពាក់ព័ន្ធដទៃទៀតធ្វើការអភិវឌ្ឍន៍គឺសម្រាប់ទាំងអស់គ្នា និងបញ្ឈប់នូវការបណ្ដេញចេញដោយបង្ខំ ការប្រើប្រាស់អំពើហឹង្សាលើប្រជាពលរដ្ឋនិងបញ្ឈប់ការប្រើប្រាស់ប្រព័ន្ធតុលាការ គាបសង្គត់ប្រជាពលរដ្ឋ។
ទោះយ៉ាងណាការដាក់ញត្តិសម្រេចបញ្ចប់ត្រឹមរដ្ឋសភាដោយសារតែស្ថាប័នពាក់ព័ន្ធបបញ្ជូនតំណាងរបស់ខ្លួនមកទទួលញត្តិ។ ហើយម្យ៉ាងទៀតក៏ដោយសារកម្លាំងសមត្ថកិច្ចបានឡោមព័ទ្ធជិតជាមួយនិងការបិទផ្លូវជុំវិញរដ្ឋសភាមិនឲ្យប្រជាពលរដ្ឋហែញត្តិចេញដោយស្ថិតក្រោមលេសថា រក្សាសណ្ដាប់ធ្នាប់សាធារណៈ។
លោក ឆាន់ មុន្នី តំណាងពលរដ្ឋមកពី ស្រុកបវិល ខេត្តបាត់ដំបង ដែលបានយកញត្តិទៅដាក់ដោយផ្ទាល់នៅគណៈកម្មការទី១នៃរដ្ឋសភាឲ្យដឹងថា គណៈកម្មការសភាបានទទួលយកញត្តិហើយតែនៅមិនទាន់បានការឆ្លើយតបដោយសារអវត្តមានលោក អេង ឆៃអៀង ដែលជាប្រធាន។ តំណាងពលរដ្ឋដដែល អះអាងថា សហគមន៍របស់គាត់មាទំនាស់ដីធ្លីជាមួយអាជ្ញាធរគ្រប់ជាន់ថ្នាក់នៅក្នុងស្រុកបវិល។
ពលរដ្ឋរងគ្រោះដោយផ្ទាល់មកពីសហគមន៍ឡពាងនិងសហគមន៍ដទៃទៀត និយាយក្នុងលក្ខខណ្ឌមិនបញ្ចេញឈ្មោះឲ្យដឹងថា គាត់មិនទទួលបានសំណងអ្វីទាំងអស់ពីក្រុមហ៊ុនអភិវឌ្ឍន៍ ។ ស្ថានភាពរបស់គាត់កំពុងប្រឈមក៏ដូចជាអ្នកភូមិដទៃទៀតកំពុងប្រទះគឺខ្វះខាតដីធ្វើស្រែ ជាប់បំពុលធនាគារ កង្វះការហូបចុក និង ការធ្វើចំណាកស្រុកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ