កម្ពុជា-ឥណ្ឌូនេស៊ី គ្រោងចុះអនុស្សារណៈថ្មីស្តីពីការពង្រីកកិច្ចសហប្រតិបត្តិការយោធា
រដ្ឋមន្ត្រីក្រសួងការពារជាតិឥណ្ឌូនេស៊ីលោក Ryamizard Ryacudu កំពុងបំពេញទស្សនកិច្ចរយៈពេល៣ថ្ងៃនៅក្នុងប្រទេសកម្ពុជា។ នៅថ្ងៃផ្តើមទស្សនកិច្ចនៅកម្ពុជានេះ លោកបានជួបជាមួយរដ្ឋមន្ត្រីការពារជាតិកម្ពុជាលោក ទៀ បាញ់ និងបន្តមកនឹងជួបជាមួយនាយករដ្ឋមន្ត្រីកម្ពុជាលោក ហ៊ុន សែន ផងដែរ។ ជាដំណើរទស្សនកិច្ច ដែលផ្តោតសំខាន់ទៅលើការពង្រីកកិច្ចសហប្រតិបត្តិការផ្នែកយោធារវាងប្រទេសទាំងពីរ។ បន្ថែមលើនេះ ភាគីទាំងពីរ គ្រោងនឹងចុះហត្ថលេខាលើអនុស្សារណៈយោគយល់ថ្មី (MOU) ដើម្បីពង្រីកកិច្ចសហប្រតិបត្តិការយោធាបន្ថែមទៀត។
ចុះផ្សាយនៅថ្ងៃ៖
ស្តាប់ - ០១:៥៧
គម្រោងនៃការចុះហត្ថលេខាលើអនុស្សារណៈយោគយល់គ្នា (MoU) ថ្មី រវាងយោធានៃប្រទេសទាំងពីរ នៅមិនទាន់ធ្វើឡើង នៅក្នុងដំណើរទស្សនកិច្ចរបស់រដ្ឋមន្ត្រីការពារជាតិឥណ្ឌូនេស៊ីលោក Ryamizard Ryacudu នេះទេ។ ប៉ុន្តែវានឹងកើតឡើង នៅពេលខាងមុខឆាប់ៗនេះ ពោលគឺនៅបន្ទាប់ពីក្រុមការងារយោធាទាំងពីរ ធ្វើសេចក្តីព្រាងឯកសារចប់សព្វគ្រប់។ នេះបើតាមការបញ្ជាក់ពីលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិកម្ពុជា។ លោកនាយឧត្តមសេនីយ៍បានថ្លែងថា កម្ពុជាចង់បានការពង្រីកកិច្ចសហប្រតិបត្តិការយោធាជាមួយឥណ្ឌូនេស៊ីបន្ថែមទៀត ពិសេសលើការបណ្តុះបណ្តាលយោធា រួមទាំងការបំពាក់សំភារៈយោធា និងជាពិសេសគឺការបង្កើនចំនួនយោធាកម្ពុជា ទៅហ្វឹកហាត់នៅក្នុងប្រទេសឥណ្ឌូនេស៊ីជាដើម។
គួរជំរាបជូនថា ចាប់តាំងពីក្រោយការបោះឆ្នោតជាតិអាណត្តិទី១ ឆ្នាំ១៩៩៣មក ឥណ្ឌូនេស៊ីបានដើរតួនាទីសំខាន់ក្នុងការជួយហ្វឹកហ្វឺនដល់កងទ័ពជើងគោកកម្ពុជា ពិសេសគឺកងអង្គរក្សកម្ពុជាប្រមាណជា៤០០នាក់រួចមកហើយ ហើយជារៀងរាល់ឆ្នាំ ឥណ្ឌូនេស៊ីតែងតែបានបញ្ជូនគ្រូឧទ្ទេសចំនួន៥នាក់ ឲ្យមកបង្ហាត់បង្រៀនដល់កងយោធាកម្ពុជាថែមទៀត។
សូមបញ្ជាក់ថា រដ្ឋមន្ត្រីការពារជាតិឥណ្ឌូនេស៊ី លោក Ryamizard Ryacudu បានមកដល់ប្រទេសកម្ពុជាកាលពីល្ងាចថ្ងៃទី៩សីហា ក្នុងដំណើរទស្សនកិច្ចរយៈពេល៣ថ្ងៃនៅកម្ពុជាចាប់ពីថ្ងៃទី៩ដល់ថ្ងៃទី១១សីហា។ នៅថ្ងៃដំបូងនៃការផ្តើមទស្សនកិច្ចនៅថ្ងៃនេះ លោកបានជួបជាមួយលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីការពារជាតិកម្ពុជា ដែលបានផ្តោតលើសភាពការសន្តិសុខនៅក្នុងតំបន់និងពិភពលោក និងការជំរុញកិច្ចសហប្រតិបត្តិការការពារសន្តិភាពនៅក្នុងប្រទេសនីមួយៗផងដែរ។ បន្ទាប់ពីនេះ លោកនឹងជួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាពបន្តទៀត។
លោក Ryamizard Ryacudu បានឡើងកាន់តំណែងជារដ្ឋមន្ត្រីការពារជាតិឥណ្ឌូនេស៊ីចាប់តាំងពីខែតុលាឆ្នាំ២០១៤មក គឺនៅក្នុងរដ្ឋបាលរបស់ប្រធានាធិបតីឥណ្ឌូនេស៊ី លោក Joko Widodo៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ