របាយការណ៍៖ ជាមធ្យមប្រជាជនកម្ពុជាម្នាក់ ប្រើថង់ប្លាស្ទិកអស់២០០ថង់ក្នុងមួយខែ
សហភាពអឺរ៉ុប (EU) សហការជាមួយក្រសួងបរិស្ថានក្រោមការអនុវត្តរបស់អង្គការ Fondazione ACRA បានសម្ពោធជាផ្លូវការនៅថ្ងៃនេះ នូវយុទ្ធនាការបរិស្ថាន “បញ្ចូលទំនិញក្នុងថង់តែមួយ។ ជាយុទ្ធនាការដើម្បីកាត់បន្ថយការប្រើប្រាស់ថង់ប្លាស្ទិកនៅតាមទីផ្សារមួយចំនួននៅក្នុងប្រទេសកម្ពុជា។ យោងតាមរបាយការណ៍ ជាមធ្យមប្រជាជនកម្ពុជាម្នាក់ ប្រើប្រាស់ថង់ប្លាស្ទិកអស់ចំនួន២០០ថង់ក្នុងមួយខែ ដែលស្មើប្រមាណជា២៧០០ថង់ក្នុងមួយឆ្នាំ។
ចុះផ្សាយនៅថ្ងៃ៖
ស្តាប់ - ០១:៣២
តាមការស្រាវជ្រាវបានបង្ហាញថា ផ្សារលក់អាហារនៅក្នុងប្រទេសកម្ពុជា គឺជាប្រភពនៃការចែកចាយថង់ប្លាស្ទិកធំជាងគេនៅក្នុងប្រទេស ដែលក្នុងនោះប្រជាជនកម្ពុជាម្នាក់ ជាមធ្យមបានប្រើប្រាស់ថង់ប្លាស្ទិកអស់ចំនួន២០០ថង់ក្នុងមួយខែ ដែលស្មើប្រមាណជា២៧០០ថង់ក្នុងមួយឆ្នាំ។ នេះបើផ្អែកតាមរបាយការណ៍ដែលត្រូវបានបង្ហាញ នៅក្នុងពិធីសម្ភោធយុទ្ធនាការ “កាត់បន្ថយការប្រើប្រាស់ថង់ប្លាស្ទិក” របស់អង្គការ Fondazione ACRA កាលពីព្រឹកថ្ងៃទី១៤តុលានេះ។
លោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជាបានថ្លែងថា ការប្រើប្រាស់ហួសកំរិតនៃថង់ប្លាស្ទិច មិនត្រឹមតែបានបំពុលបរិស្ថានប៉ុណ្ណោះទេ ប៉ុន្តែវាធ្វើអោយប៉ះពាល់ដល់សុខភាពមនុស្សនិងបរិស្ថានថែមទៀត។ ដូច្នេះសហភាពអឺរ៉ុប បានលើកទឹកចិត្តដល់អ្នកគ្រប់គ្នា ជួយកាត់បន្ថយការប្រើប្រាស់ថង់ប្លាស្ទិចអោយបានច្រើនតាមលទ្វភាពដែលអាចធ្វើបាន។
ចំណែកលោក អ៊ាង សុផល្លែត តំណាងក្រសួងបរិស្ថានបានលើកឡើងថា យុទ្ធនាការថ្ងៃនេះ គឺជាផ្នែកមួយនៃគោលនយោបាយនិងផែនការសកម្មភាពរបស់ក្រសួងបរិស្ថាន ហើយទាក់ទងនឹងការគ្រប់គ្រងសំណល់ថង់ប្លាស្ទិកឱ្យកាន់តែមានប្រសិទ្ធិភាពនោះ ក្រសួងបានរៀបចំសេចក្តីព្រាងអនុក្រឹត្យដែលគ្រោងនឹងចេញឆាប់ៗក្នុងពេលខាងមុខនេះ។
សូមបញ្ជាក់ថា យុទ្ធនាការដែលមានឈ្មោះថា “បញ្ចូលទំនិញនៅក្នុងថង់តែមួយ” ដែលគេរំពឹងថា នឹងអាចកាត់បន្ថយសំណល់ថង់ប្លាស្ទិកបានច្រើននៅក្នុងក្រុងនិងទីប្រជុំជននោះ នឹងអនុវត្តនៅផ្សារចំនួន៥ក្នុងទីក្រុងភ្នំពេញ នឹងផ្សារចំនួន២ក្នុងក្រុងសៀមរាប និងផ្សារចំនួន១ នៅក្រុងព្រះសីហនុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ