កម្ពុជាផ្តើមមានកូនរដូវប្រាំងរយៈពេលខ្លី ក្រោយពីទទួលរងគ្រោះដោយទឹកជំនន់
កម្ពុជាផ្តើមមានកូនរដូវប្រាំងរយៈពេលខ្លី ចាប់ពីថ្ងៃនេះ រហូតដល់ថ្ងៃទី ៩ ខែសីហា ឆ្នាំ២០១៧។ កូនរដូវប្រាំងនេះ នឹងធ្វើឲ្យរាជធានីភ្នំពេញ និងខេត្តក្រុងចំនួន៥ទៀតស្ថិតនៅភាគនិរតី រងផលប៉ះពាល់។ ប្រឈមនឹងបញ្ហារយៈពេលខ្លីនេះ ក្រសួងធនធានទឹក និងឧត្តុនិយម បានចេញសេចក្តីជូនដំណឹងមួយ ដោយអំពាវនាវឲ្យប្រជាពលរដ្ឋនៅក្នុងខេត្តក្រុងទាំងនោះរក្សាទឹកទុកឲ្យបានល្អ ជាពិសេសគឺកសិករ។ ការកើតមាននូវកូនរដូវប្រាំងក្នុងរដូវវស្សាឆ្នាំនេះ គឺបន្ទាប់ពីកម្ពុជាទទួលរងគ្រោះទឹកជំនន់ដោយទឹកភ្លៀងនាសប្តាហ៍នេះ ដែលបណ្តាលឲ្យមនុស្សពីរនាក់ស្លាប់បាត់បង់ជីវិត និងលិចលង់ផ្ទះសំបែងនិងដំណាំប្រជាពលរដ្ឋរាប់រយហិចតា។
ចុះផ្សាយនៅថ្ងៃ៖
ផ្អែកតាមសេចក្តីជូនដំណឹងរបស់ក្រសួងធនធានទឹក និង ឧត្តុនិយមកម្ពុជា ចុះថ្ងៃទី ២៨ កក្កដា ថា បន្ទាប់ពីព្យុះទី៨ឈ្មោះ “សុនកា” បានបន្ថយឥទ្ធិពលទៅ ព្យុះថ្មីមួយទៀត ដែលមានឈ្មោះថា “នេសាទ” នឹងមានឥទ្ធិពលមកលើកម្ពុជាវិញម្តង។ ព្យុះទី៩ដែលនាំមកនូវខ្យល់មូសុងនិរតី ហើយដែលកំពុងកើតឡើងនៅលើមហាសមុទ្រប៉ាស៊ីហ្វិកនោះ នឹងធ្វើប្រទេសកម្ពុជាកើតមាននូវកូនរដូវប្រាំងរយៈពេលខ្លី គឺចាប់ពីថ្ងៃទី ២៩ ខែកក្កដានេះតទៅ រហូតដល់ថ្ងៃទី ០៩ ខែសីហា ឆ្នាំ២០១៧។
តាមរយៈសេចក្តីជូនដំណឹងនេះ ក្រសួងធនធានទឹក និងឧត្តុនិយម បានអំពាវនាវឲ្យប្រជាពលរដ្ឋដែលរស់នៅរាជធានីភ្នំពេញ និងខេត្តក្រុងចំនួន៥ទៀត រួមមាន ខេត្តកំពត កែប តាកែវ កំពង់ស្ពឺ និងខេត្តកណ្ដាល ឲ្យរក្សាទឹកទុកឲ្យបានល្អ ជាពិសេស គឺប្រជាកសិករ។ បើតាមសេចក្តីជូនដំណឹងនេះ ឥទ្ធិពលព្យុះទី៩នេះ នឹងបង្កឲ្យរាជធានី និងខេត្តក្រុងទាំងនេះ រួមទាំងបណ្ដាខេត្តមួយចំនួនទៀត ស្ថិតនៅតំបន់ទំនាបកណ្ដាល និងតំបន់ខ្ពង់រាប នឹងមានភ្លៀងធ្លាក់ពីតិចទៅមធ្យម ដែលសឹងតែមិនអាចរាប់ថា ជាភ្លៀងនោះផង។ ចំណែកនៅតំបន់មាត់សមុទ្រឯណោះវិញ អាចនឹងមានភ្លៀងធ្លាក់ពីមធ្យមទៅច្រើន។ នេះបើយោងតាមការបញ្ជាក់បន្ថែមពីលោក ចាន់ យុត្ថា អ្នកនាំពាក្យក្រសួងធនធានទឹក និងឧត្តុនិយមកម្ពុជា។
គួរជំរាបជូនថា ការប្រកាសពីការកើតមាននូវកូនរដូវប្រាំងរយៈពេលខ្លីនេះ គឺខណៈដែលខេត្តក្រុងចំនួន៧នៃប្រទេសកម្ពុជា ទើបតែទទួលរងការវាយប្រហារដោយគ្រោះទឹកជំនន់ទឹកភ្លៀង ក្នុងនោះរួមមាន ខេត្តព្រះវិហារ ខេត្តឧត្តរមានជ័យ, កំពត កំពង់ធំ រតនគិរី ត្បូងឃ្មុំ និងខេត្តព្រះសីហនុ ជាដើម។ ប៉ុន្តែខេត្តព្រះវិហារ និងខេត្តឧត្តរមានជ័យ គឺរងផលប៉ះពាល់ធ្ងន់ធ្ងរជាងគេ។ នៅខេត្តព្រះវិហារ ក្រៅពីលិចលង់ស្រុកចំនួនប្រាំ ក៏បណ្តាលឲ្យស្ត្រីម្នាក់និងកុមារម្នាក់ស្លាប់បាត់បង់ជីវិតផងដែរ។ ចំណែកនៅក្នុងខេត្តឧត្តរមានជ័យវិញ ជំនន់ទឹកភ្លៀងបានប៉ះពាល់ដល់ស្រុកចំនួនពីរដោយបានជន់លិចផ្ទះប្រជាពលរដ្ឋចំនួន៧០២ខ្នង ដីស្រែ១០៣២ហិកតា និងផលដំណាំផ្សេង២៧៩ហិកតា និងបាក់បង្កាន់ដៃស្ពានបង្ហៀទឹកបឹងតាម៉ុកឲ្យរងការខូចខាតផងដែរ។
យ៉ាងណាក៏ដោយ លោក ចាន់ យុត្ថា អ្នកនាំពាក្យក្រសួងធនធានទឹកបានបញ្ជាក់ថា ស្ថានភាពទឹកជំនន់ទឹកភ្លៀងបានធូស្រាលវិញហើយ ខណៈដែលការជុសជុលទៅលើហេដ្ឋារចនាសម្ព័ន្ធដែលរងការខូចខាត ក៏ចាប់ផ្តើមធ្វើដំណាលគ្នានេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ