ពលករខ្មែរដែលរួចជីវិតដោយការហែលកាត់មហាសាគរ បានធ្វើមាតុភូមិនិវត្តន៍នារសៀលនេះ
លោក វឿន វ៉ុន ពលករខ្មែរដែលរួចផុតជីវិត ដោយសារការហែលឆ្លងកាត់មហាសាគរ ហើយត្រូវបានជួយសង្គ្រោះនោះ នឹងធ្វើដំណើរមកដល់មាតុប្រទេសវិញ នៅរសៀលថ្ងៃអាទិត្យទី ១៤ ឧសភានេះ បន្ទាប់ពីមានការជួយសម្របសម្រួលពីស្ថានឯកអគ្គរាជទូតកម្ពុជាប្រចាំនៅប្រទេសសិង្ហបុរី។រឿន វ៉ុន ជាកម្មករទូកនេសាទថៃរយៈពេល៤ឆ្នាំ បានសម្រេចចិត្តលោតចូលទឹកសមុទ្រចម្ងាយជាង៣០០គីឡូម៉ែត្រពីចំណុចកើតហេតុទៅកាន់ច្រាំង បន្ទាប់ពីមានការប៉ងសម្លាប់ពីថៅកែទូកនេសាទថៃ កាលពីថ្ងៃទី ១០ ឧសភា។
ចុះផ្សាយនៅថ្ងៃ៖
ស្តាប់ - ០២:២៧
លោក វឿន វ៉ុន ពលករខ្មែរធ្វើការជាកម្មករនៅលើទូកនេសាទថៃម្នាក់ទៀត ត្រូវបានជួយគេសង្គ្រោះ និងបានធ្វើដំណើរមកដល់ប្រទេសកម្ពុជាវិញ នៅរសៀលថ្ងៃអាទិត្យទី ១៤ ឧសភានេះ តាមជើងយន្តហោះ Jetstar បន្ទាប់ពីមានការជួយអន្តរាគមន៍ពីស្ថានឯកអគ្គរាជទូតកម្ពុជាប្រចាំនៅប្រទេសសង្ហបុរី។ នេះបើតាមការបញ្ជាក់ពីលោក ជុំ សុន្ទរី អ្នកនាំពាក្យក្រសួងការបរទេសកម្ពុជា។
គួរជំរាបជូនថា លោក វឿន វ៉ុន ពលករខ្មែរធ្វើការនៅលើទូកនេសាទថៃបានសម្រេចចិត្តលោតចេញពីទូកនេសាទថៃ កាលពីថ្ងៃទី ១០ ឧសភា ដើម្បីគេចចេញពីការតាមសម្លាប់ពីអ្នកធ្វើការនៅលើទូកនេសាទ។ លោកបានហែលឆ្លងកាត់មហាសាគរដ៏ធំល្វឹងល្វើយដោយប្រើធុងស្ពេត្រូតែមួយគត់។ បើតាមការបញ្ជាក់ពី លោកអនុនាវីឯកកម្ពុជាម្នាក់ឈ្មោះ ម៉ៅ សុវណ្ណដានាយនាវីប្រចាំការព័ត៌មានសន្តិសុខលម្ហសមុទ្រ នៅមជ្ឈមណ្ឌលប្រមូលផ្ដុំនិងចែកចាយព័ត៌មានប្រចាំនៅប្រទេសសឹង្ហបុរីហៅកាត់ថា )IFC)បានរាយការណ៍ប្រាប់សារព័ត៌មានក្នុងស្រុកថា ភាគីកម្ពុជាបានទទួលយកបុរសនេសាទខ្មែរម្នាក់ ពីនាវាកងទ័ពជើងទឹកប្រ៊ុយណេ នៅវេលាម៉ោង ២ រសៀល ថ្ងៃទី១៣ឧសភាម្សិលមិញ ក្រោមកិច្ចសហការរវាងមន្ត្រីស្ថានទូតកម្ពុជា ជាមួយសេនានុពន្ធ័យោធាប្រ៊ុយណេ នឹងមន្ត្រីប៉ូលីសអន្តោប្រវេសន៍សឹង្ហបុរីថែមទៀត។
បើតាមការបញ្ជាក់ពីលោកអនុនាវីឯក ម៉ៅ សុវណ្ណដា ដដែលថា មុនឈានទៅដល់ការជួយសង្គ្រោះពលករខ្មែរម្នាក់នេះបាន គឺដោយសារតែកងនាវាកងទ័ពជើងទឹកព្រុយណេ ដែលកំពុងធ្វើដំណើរឆ្ពោះមកប្រទេសសិង្ហបុរី បានឆ្លងកាត់ព្រំដែនទឹកប្រទេសម៉ាឡេស៊ី ស្ថិតនៅភាគពាយ័ព្យនៃកោះ Sarawak ប្រមាណ១៧៥គីឡូម៉ែត្រ ហើយក៏បានប្រទះឃើញមានមនុស្សអណ្តែតនៅលើផ្ទៃទឹកសមុទ្រដ៏ធំល្វឹងល្វើយនេះ ហើយក៏បានជួយសង្គ្រោះ និងបានបញ្ជូនមកកាន់ប្រទេសសិង្ហបុរីតែម្តង។ ករណីនេះអាចចាត់ទុកថា ជាករណីដ៏កម្រមួយ និងជាសំណាងរបស់បុរសជនជាតិខ្មែររូបនេះ។
លោក ជុំ សុន្ទរី អ្នកនំាពាក្យក្រសួងការបរទេសកម្ពុជា បានបញ្ជាក់ថា លោក វឿន វ៉ុន អាយុ៣៦ឆ្នាំ មកពីខេត្តសៀមរាប បានស្នាក់នៅស្ថានទូតកម្ពុជាប្រចាំនៅប្រទេសសិង្ហបុរីកាលពីយប់មិញ មុនពេលធ្វើមាតុភូមិនិវត្តន៍មកដល់ប្រទេសកម្ពុជាវិញនៅរសៀលថ្ងៃនេះ។ លោក ជុំ សុន្ទរី បានអំពាវនាវកុំឲ្យពលរដ្ឋខ្មែរទៅធ្វើការជាកម្មករទូកនេសាទថៃ ដែលជាប្រភេទការងារគ្រោះថ្នាក់បំផុតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ