លិខិតក្លែងក្លាយស្តីពីការតែងតាំងភរិយាលោក សម រង្ស៊ី ត្រូវបានផ្សព្វផ្សាយ ខណៈសង្គ្រោះជាតិត្រៀមរើសក្បាលម៉ាស៊ីនថ្មី
ស្របពេលដែលគណបក្សសង្គ្រោះជាតិ គ្រោងរៀបចំធ្វើសមាជបោះឆ្នោតជ្រើសរើសក្បាលម៉ាស៊ីនដឹកនាំគណបក្សថ្មី នៅថ្ងៃទី២មិនាខាងមុខនេះ លិខិតអនាមឹកមួយត្រូវបានផ្សព្វផ្សាយនៅតាមបណ្តាញសង្គមហ្វេសបុក។ ជាលិខិតដែលមានចុះហត្ថលេខារបស់លោក សម រង្ស៊ី ផ្ញើទៅកាន់លោក កឹម សុខា ដែលស្នើឲ្យតែងតាំងលោកស្រី ជូឡុង សូមូរ៉ា ភរិយារបស់លោក សម រង្ស៊ី ធ្វើជាអនុប្រធានគណបក្សសង្គ្រោះជាតិថ្មី។ ប៉ុន្តែអ្នកនាំពាក្យគណបក្សសង្គ្រោះជាតិបានអះអាងថា ជាលិខិតក្លែងក្លាយ។
ចុះផ្សាយនៅថ្ងៃ៖
ស្តាប់ - ០២:០០
លិខិតដែលមន្ត្រីគណបក្សប្រឆាំងបានចាត់ទុកថា ជាក្លែងក្លាយនេះ ត្រូវបានគេចែកចាយពេញបណ្តាញសង្គមហ្វេសបុក ហើយត្រូវបានបណ្តាញសារព័ត៌មានក្នុងស្រុកមួយចំនួន យកមកចុះផ្សាយផង។ ប៉ុន្តែលោក យ៉ែម បុញ្ញឬទ្ធិ អ្នកនាំពាក្យគណបក្សសង្គ្រោះជាតិបានអះអាងថា ជាលិខិតក្លែងក្លាយ បន្ទាប់ពីការផ្ទៀងផ្ទាត់រួចមក។
លិខិតដែលមានស្នាមចុះហត្ថលេខារបស់លោក សម រង្ស៊ី ពីទីក្រុងប៉ារីសប្រទេសបារាំង ហើយដែលមន្ត្រីគណបក្សប្រឆាំងចាត់ទុកថា ក្លែងក្លាយនេះ បានផ្ញើជូនលោក កឹម សុខា ដែលបច្ចុប្បន្នជាប្រធានស្តីទីគណបក្ស ឲ្យជ្រើសតាំងភរិយារបស់លោក សម រង្ស៊ី គឺលោកស្រី ជូឡុង សូមូរ៉ា ជាអនុប្រធានគណបក្សសង្គ្រោះជាតិ នៅក្នុងសមាជវិសាមញ្ញគណបក្សសង្គ្រោះជាតិនាថ្ងៃទី ២មិនាឆ្នាំ២០១៧ខាងមុខ។ ប៉ុន្តែ អ្នកនាំពាក្យគណបក្សង្គ្រោះជាតិ លោក យ៉ែម បុញ្ញឬទ្ធិ បានចាត់ទុកថា នេះជាលិខិតក្លែងក្លាយ ដែលត្រូវបានគេផ្សព្វផ្សាយឡើង ក្នុងចេតនាមិនល្អមកលើគណបក្សសង្គ្រោះជាតិ។ ប៉ុន្តែសម្រាប់គណបក្សប្រឆាំងមួយនេះ មិនបានចាប់អារម្មណ៍ទៅលើលិខិត ដែលមិនផ្លូវការនេះទេ។
អ្វីជាការកត់សំគាល់ នេះមិនមែនជាលើកទី១ទេ ដែលលិខិតក្លែងក្លាយបែបនេះបានលេចចេញឡើង ស្របពេលដែលគណបក្សប្រឆាំងកំពុងរៀបចំបោះឆ្នោតជ្រើសតាំងប្រធាននិងអនុប្រធានគណបក្សថ្មី។ កាលពីថ្ងៃទី១០កុម្ភៈ ពោលគឺក្រោយពីការប្រកាសលាឈប់ពីប្រធានគណបក្សសង្គ្រោះជាតិរបស់លោក សម រង្ស៊ី លិខិតក្លែងក្លាយមួយក៏ត្រូវបានផ្សព្វផ្សាយឡើង នៅតាមបណ្តាញសង្គមហ្វេសបុក ដែលមានខ្លឹមសាថា លោក សម រង្ស៊ី បានស្នើទៅកាន់គណៈកម្មាធិការអចិន្ត្រៃយ៍និងគណៈកម្មាធិការនាយករបស់គណបក្សសង្គ្រោះជាតិ ដើម្បីជ្រើសតាំងភរិយាលោក សម រង្ស៊ី ឲ្យធ្វើជាប្រធានគណបក្សជំនួសលោក សម រង្ស៊ី។ ប៉ុន្តែ នៅមួយថ្ងៃក្រោយមក លោក សម រង្ស៊ី បានបំភ្លឺតាមបណ្តាញសង្គមហ្វេសបុករបស់លោកថា លោកមិនមានគម្រោងរៀបចំឲ្យភរិយារបស់លោក ឬកូនរបស់លោកណាម្នាក់ មកដឹកនាំគណបក្សសង្គ្រោះជាតិជំនួសលោកនោះទេ។
សូមបញ្ជាក់ថា បើគ្មានការប្រែប្រួលទេ គណបក្សសង្គ្រោះជាតិ នឹងរៀបចំធ្វើសមាជវិសាមញ្ញរបស់ខ្លួនដើម្បីបោះឆ្នោតជ្រើសរើសប្រធាននិងអនុប្រធានថ្មី នៅថ្ងៃទី ២មិនា សប្តាហ៍ក្រោយ បន្ទាប់ពីការលាឈប់របស់លោក សម រង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ