សង្គ្រោះជាតិ ប្ដឹងអាជ្ញាធរខណ្ឌដូនពេញ ករណីបកស្ទីកឃ័របក្ស ក្នុងថ្ងៃឃោសនាបោះឆ្នោត
គណបក្សសង្គ្រោះជាតិបានសម្រេចដាក់ពាក្យប្ដឹងអាជ្ញាធរខណ្ឌដូនពេញ ទៅកាន់គណៈកម្មាធិការរៀបចំការបោះឆ្នោតរាជធានីភ្នំពេញ ករណីដែលអាជ្ញាធរបានចុះកាត់ ដកស្លាក និងបកស្ទីកឃ័ររបស់គណបក្ស កាលពីថ្ងៃទី ២៧ឧសភា ដែលស្ថិតនៅក្នុងថ្ងៃឃោសនាបោះឆ្នោត។ សម្រាប់គណបក្សប្រឆាំង នេះគឺជាការរំលោភច្បាប់បោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ពាក្យបណ្តឹងរបស់គណបក្សសង្គ្រោះជាតិ បានធ្វើឡើងភ្លាមៗ ពោលគឺបន្ទាប់ពីអាជ្ញាធរខណ្ឌដូនពេញ បានចុះទៅបក និងដកយកស្លាកឃោសនារបស់គណបក្សសង្គ្រោះជាតិ ដែលមានបិទនៅលើបង្គោលភ្លើងនិងដើមឈើ។ ពាក្យបណ្តឹងរបស់គណបក្សសង្គ្រោះជាតិក្នុងទម្រង់ ១២០២ បានលើកឡើងថា ទង្វើរបស់អាជ្ញាធរបានធ្វើលើសពីខ្លឹមសារច្បាប់ ត្រង់មាត្រា ៦៩ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សា ឃុំ/សង្កាត់ ដែលបានហាមមិនឲ្យលើក ឬបិទ តែនៅបរិវេណឬអាគាររដ្ឋតែប៉ុណ្ណោះ។
គួរជំរាបជូនថា កាលពីថ្ងៃទី២៧ឧសភា អាជ្ញាធរខណ្ឌដូនពេញ ដឹកនាំដោយលោក សុខ ពេញវុធ ជាអភិបាលខណ្ឌ បានចុះទៅកាត់ និងដកស្លាកឃោសនារបស់គណបក្សសង្គ្រោះជាតិ ដោយអាជ្ញាធរបានអះអាងថា សង្គ្រោះជាតិ បានបំពានច្បាប់របស់គណៈកម្មាធិការជាតិរៀបចំការបោះឆ្នោត ដែលបានហាមមិនឲ្យគណបក្សនយោបាយយកស្លាកទៅបិទនៅតាមដើមឈើ និងបង្គោលភ្លើងជាដាច់ខាត។ ប៉ុន្តែលោក ហង់ ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានលើកឡើងថា នីតិវិធីនៃការឃោសនាបោះឆ្នោត គ.ជ.ប បានហាមប្រាមមិនឲ្យមានការបិទស្ទីកឃ័រ និងបដាតែនៅតាមអគាររបស់រដ្ឋតែប៉ុណ្ណោះ។ ក៏ប៉ុន្តែចំពោះការបិទផ្សាយនៅតាមដើមឈើ និងបង្គោលភ្លើងនោះ គឺ គ.ជ.ប មិនមែនជាអ្នកចេញបម្រាមនោះឡើយ។
ជុំវិញករណីនេះ បន្ទប់ស្ថានការណ៍សម្រាប់ការបោះឆ្នោត ដែលជាបណ្តុំក្រុមអង្គការសង្គមស៊ីវិលធ្វើការដើម្បីឃ្លាំមើលការបោះឆ្នោតនៅកម្ពុជាបានចាត់ទុកថា ករណីនេះ គឺជាការរិតត្បិតសិទ្ធិសេរីភាពក្នុងការឃោសនាបោះឆ្នោតរបស់គណបក្សនយោបាយនៅតាមទីសាធារណៈ។
លោក សំ គន្ធាមី អ្នកនាំពាក្យបន្ទប់ស្ថានការណ៍សម្រាប់ការបោះឆ្នោតនេះ បានវាយតម្លៃជាបឋមថា យុទ្ធនាការឃោសនានាប៉ុន្មានថ្ងៃមកនេះ មិនមានភាពស្មើគ្នានោះទេ នោះបើគិតទាំងប្រព័ន្ធឃោសនា និងការបិទផ្សាយខិតប័ណ្ណនៅតាមទីសាធារណៈនេះ។
សូមបញ្ជាក់ថា ករណីនេះ ក៏កំពុងកើតឡើងចំពោះគណបក្សសង្គ្រោះជាតិ នៅក្នុងខណ្ឌសែនសុខ ស្ថិតនៅភាគខាងលិចទីក្រុងភ្នំពេញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ