ស្តាប់ ថតទុក Podcast
  • 00h00 - 01h00 GMT
    កម្មវិធីព័ត៌មាន 18/11 00h00 GMT
  • 06h00 - 07h00 GMT
    កម្មវិធីព័ត៌មាន 18/11 06h00 GMT
  • 12h00 - 13h00 GMT
    កម្មវិធីព័ត៌មាន 17/11 12h00 GMT
general

លោក​ ហ៊ុន សែន ​ផ្តល់​កាដូ​ពិសេស​ផ្ទួនៗ​ឲ្យ​កម្មករ ​មុន​ពេល​ចុះ​ជួប​ដល់​រោងចក្រ​

media  
លោក​នាយករដ្ឋមន្រ្តី ​ហ៊ុន សែន ​ក្នុង​ពេល​សំណេះ​សំណាល​ជា​មួយ​កម្មករ​ជាង​៤​ពាន់​នាក់ ​នៅ​កោះ​ពេជ្រ ​នា​ថ្ងៃទី ​២០ ​សីហា ​ឆ្នាំ ​២០១៧។​ @facebook

​លោក​នាយក​រដ្ឋមន្ត្រី ​ហ៊ុន សែន ​នៅ​​ព្រឹក​មិញ​​នេះ ​បាន​ប្រកាស​​ផ្តល់​​កាដូ​​ពិសេស​​ដល់​ក​ម្មករ​-​កម្មការិនី​​រោងចក្រ​​កាត់ដេរ ​ឲ្យ​​ជិះ​​រថយន្ត​ក្រុង​​សាធារណៈ ​ដោយ​​ឥតគិត​ថ្លៃ ​ក្នុង​​រយៈ​២​ឆ្នាំ​។ ​ក្រៅ​ពី​​កាដូ​​ពិសេស​នេះ ​ប្រមុខ​​រដ្ឋាភិបាល​​កម្ពុ​ជា ​ក៏​បាន​​ប្រកាស​​ដែរ​​ថា ​ចាប់​ពី​​ខែ​មករា ​ឆ្នាំ​២០១៨ ​តទៅ ​កម្មករ​​នឹង​​ទទួល​បាន​​សេវា​​គាំពារ​​ផ្នែក​​សុខភាព​​ដោយ​​ឥតគិត​ថ្លៃ ​ត្បិត​​រាល់​​ការ​បង់ថ្លៃ​​លើ​​សេវា​​នេះ ​គឺ​ជា​​បន្ទុក​​របស់​​ថៅកែ​​រោងចក្រ​។ ​ 

គឺ​ចាប់ពី​ថ្ងៃទី២០ខែសីហា​នេះ​តទៅ រហូតដល់​ថ្ងៃទី២០ ខែសីហា ឆ្នាំ២០១៩ កម្មករ​-​កម្មការិនី​​រោងចក្រ​​កាត់ដេរ​ទាំងអស់​នៅ​កម្ពុជា នឹងត្រូវ​បានអនុញ្ញាត​ឲ្យ​ជិះ​រថយន្តក្រុង​សាធារណៈ​​ដោយ​ឥតគិតថ្លៃ​រយៈពេល២ឆ្នាំ។ កម្មករ-កម្មការិនី អាច​ទទួលបាន​សេវា​ពិសេស​​នេះ ដោយ​គ្រាន់តែ​បង្ហាញ​កាត​សម្គាល់​ខ្លួន​របស់​ពួកគេ​តែប៉ុណ្ណោះ។ នេះ​បើតាម​ការប្រកាស​របស់​លោកនាយក​រដ្ឋមន្ត្រី ហ៊ុន សែន នៅលើ​គណនេយ្យ​ហ្វេ​ស​បុក (Facebook) ​ផ្លូវការ​របស់លោក នៅ​ថ្ងៃទី ២០ សីហា នេះ ខណៈដែល​លោក​បាន​ជួប​សំណេះ​សំណាល​ដោយផ្ទាល់​ជាមួយ​កម្មករ-កម្មការិនី ជាង៤ពាន់​នាក់ នៅ​ទីក្រុង​កោះ​ពេ​ជ្យ។ ​បើតាម​លោកនាយក​រដ្ឋមន្ត្រី ហ៊ុន សែន ការផ្តល់ជូន​នេះ នឹង​ជួយ​សម្រួល​ដល់​ការចំណាយ​មួយចំនួន​របស់ កម្មករ-កម្មការិនី នៅក្នុង​ប្រទេស​កម្ពុជា។

ក្រៅពី​ការផ្តល់​ការដូ​ពិសេស​នេះ ប្រមុខ​រដ្ឋាភិបាល​កម្ពុ​ជា​ក៏បាន​ប្រកាស​ដែរ​ថា ចាប់ពី​ខែមករា ឆ្នាំ ២០១៨ ខាងមុខនេះ​តទៅ​កម្មករ-កម្មការិនី ទាំងអស់ នឹង​ទទួលបាន​ថ្លៃ​សេវា​ផ្នែក​គាំពារ​សុខភាព ដោយ​ភាគី​និយោជក​គឺជា​អ្នកទទួលខុសត្រូវ​បង់ថ្លៃ១០០%។ ហើយ​ថា ចាប់ពី​ឆ្នាំ ២០១៩ តទៅ កម្មករ-កម្មការិនី នឹង​ទទួលបាន​ប្រាក់​ចូលនិវត្តន៍ ដូចគ្នា​នឹង​មន្ត្រីរាជការ​រដ្ឋ​ផងដែរ។

សូមបញ្ជាក់ថា បច្ចុប្បន្ននេះ កម្ពុ​ជាមាន​កម្មករនិយោជិត​ជាង៧៤ម៉ឺន​នាក់ បាន​នឹង​កំពុង​បម្រើ​ការងារ​នៅក្នុង​វិស័យ​កាត់ដេរ​សំលៀកបំពាក់​និង​ដេរ​ស្បែកជើង ដោយបាន​ផ្តល់​ប្រាក់​​ឈ្នួល​ប្រមាណ​ជិត២ពាន​លាន​ដុល្លារ​អាមេរិក​ក្នុងមួយឆ្នាំ។ លោក ប៉ាវ ស៊ីណា ប្រធាន​​សម្ព័ន្ធ​សហជីព​ចលនា​កម្មករ​កាត់ដេរ​កម្ពុជា​បានចាត់ទុក​ដំណឹង​នេះ​ថា គឺជា​ដំណឹង​ល្អ​សម្រាប់​កម្មករ-កម្មការិនី​កម្ពុជា ពិសេស​នៅ​ក្នុងឱកាស​រដូវភ្លៀង​បែបនេះ។ លោក​បាន​ចាត់ទុកថា នេះ​ក៏​ជា​ផ្នែក​មួយ​នៃ​ការកាត់បន្ថយ​គ្រោះថ្នាក់​ចរាចរណ៍​របស់​កម្មករ-កម្មការិនី រោងចក្រ​កាត់ដេរ ក្នុងពេល​បច្ចុប្បន្ន​នេះដែ​រ។

សូម​បញ្ជាក់ដែរថា បច្ចុប្បន្ននេះ ទីក្រុង​ភ្នំពេញ​មាន​រថយន្តក្រុង​សាធារណៈ​ប្រមាណ​ជា​៦០​គ្រឿង កំពុង​ដាក់​ឲ្យ​ដំណើរ​រត់​លើ​កំណាត់​ផ្លូវ​ចំនួន៣ខ្សែ​ចាប់ពី​វេលា​ម៉ោង៥កន្លះ​ព្រឹក រហូត​ដល់​ម៉ោង​៨កន្លះ​យប់។ ហើយ​ចាប់ពី​ដើមខែ​កញ្ញា​ខាងមុខនេះ​តទៅ អាជ្ញាធរ​នឹង​បន្ថែម​​ខ្សែ​​រត់​ចំនួន២ខ្សែ​បន្ថែមទៀត បន្ទាប់ពី​អាជ្ញាធរ ឬ រដ្ឋ​ករ​ស្វយ័ត​ដឹកជញ្ជូន​សាធារ​ណៈ​​រថយន្ត​ក្រុងភ្នំពេញ ទើបតែ​ទទួលបាន​អំណោយ​រថយន្តក្រុង​ចំនួន ១០០​គ្រឿង​ ពី​រដ្ឋា​ភិបាល​​ចិន។​

អ្វី​ជាការ​កត់សំគាល់ដែរ ការប្រកាស​ពី​ការផ្តល់ជូន​កាដូផ្ទួនៗពី​ប្រមុខ​រដ្ឋាភិបាល​កម្ពុជា​ទៅ​​ដល់​​កម្មករ-កម្មការិនី​នៅពេលនេះ បានធ្វើ​ឡើង​ស្រប​ពេលដែល​ប្រមុខ​រដ្ឋាភិបាល​កម្ពុជា ​បានប្រកាស​ពី​គម្រោង​ជួប​សំណេះសំណាល​ជាមួយ​កម្មករ​នៅ​រាល់ថ្ងៃ​អាទិត្យ និង​ចុះ​សួរសុខទុក្ខ​ដល់​រោងចក្រ​នៅ​រៀងរាល់ថ្ងៃ​ពុធ។ គោលបំណង នៃ​ការជួបជុំ​នេះ គឺ​ដើម្បី​ស្វែង​យល់​​ពី​សុខទុក្ខ លក្ខខណ្ឌ​ការងារ ទំនាក់ទំនង​រវាង​ក​ម្មករ និយោជិត​ជាមួយ​និយោ​ជក ​និង​សំណូមពរ​នានា ដើម្បី​សម្រួល​ឲ្យ​កម្មករនិយោជិត​កាន់​តែមាន​លក្ខខណ្ឌ​ការងារ​ល្អ ​និង​មាន​ផលិតភាព​ការងារ​ប្រសើរ​ជាង​មុន៕​

ទាក់ទង​នឹង​ប្រធានបទ​នេះ
 
សូមអភ័យទោស យើងមិនអាច​ភ្ជាប់​ទៅ​ទំព័រ​ដែល​លោកអ្នក​ស្នើសុំ​បានទេ