អង្គការសិទ្ធិមនុស្សអន្តរជាតិ ទទូចឲ្យកម្ពុជា បន្តស៊ើបអង្កេតករណីឃាតកម្មបាញ់សម្លាប់លោក កែម ឡី
អង្គការឃ្លាំមើលសិទ្ធិមនុស្សអន្តរជាតិ Human Right Watch (HRW) និងអង្គការអន្តរជាតិចំនួន២ផ្សេងទៀត បានចេញសេចក្តីថ្លែងការណ៍រួមគ្នាមួយ កាលពីថ្ងៃទី២៣មីនា ដោយទទូចសុំឲ្យរដ្ឋាភិបាលកម្ពុជា បន្តការស៊ើបអង្កេតលើករណីឃាត់កម្មបាញ់សម្លាប់លោក កែម ឡី អ្នកវិភាគនយោបាយនៅកម្ពុជា។ សេចក្តីថ្លែងការណ៍ បានធ្លាក់មក នៅប៉ុន្មានម៉ោងក្រោយពីតុលាការក្រុងភ្នំពេញ កាត់ទោសជនសង្ស័យម្នាក់ឈ្មោះ ជួប សម្លាប់ ដាក់ពន្ធនាគារអស់មួយជីវិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៨
សេចក្តីថ្លែងការណ៍របស់អង្គការឃ្លាំមើលសិទ្ធិមនុស្សអន្តរជាតិ (Human Right Watch) គណៈកម្មការអ្នកច្បាប់អន្តរជាតិ (ICJ) និងអង្គការលើកលែងទោសអន្តរជាតិ (Amnesty International) បានធ្វើឡើងរួមគ្នា កាលពីថ្ងៃទី២៣ មីនា ដោយបានបង្ហាញមន្ទិលសង្ស័យថា ការកាត់ទោសលើករណីឃាត់កម្មបាញ់សម្លាប់លោក កែម ឡី បានបន្សល់ទុកនូវសំណួរជាច្រើន។ នៅក្នុងសេចក្តីថ្លែងការណ៍រួមគ្នាមួយ អង្គការអន្តរជាតិទាំង៣ បានស្នើសុំឲ្យរដ្ឋាភិបាលកម្ពុជា គួរតែស៊ើបអង្កេតករណីនេះឡើងវិញ ជាពិសេសទាក់ទងទៅនឹងគន្លឹះសំខាន់ៗនៃចន្លោះប្រហោងដែលត្រូវបានបង្ហាញនៅក្នុងអង្គសវនាការកាលពីថ្ងៃទី ០១ មីនា។
គួរជំរាបជូនថា ប្រតិកម្មរបស់អង្គការអន្តរជាតិផ្នែកសិទ្ធិមនុស្សទាំងនេះ បានធ្វើឡើង ក្រោយពី តុលាការក្រុងភ្នំពេញ កាលពីថ្ងៃទី២៣ មីនា បានកាត់ទោសជនសង្ស័យតែម្នាក់គត់ ឈ្មោះ អឿត អាង ដែលអះអាងថា ឈ្មោះ ជួប សម្លាប់ ដាក់ពន្ធនាគារអស់មួយជីវិត ពីបទកាន់កាប់អាវុធខុសច្បាប់ និងឃាតកម្មគិតទុកជាមុន។ ជាសេចក្តីសម្រេចដែលធ្វើឡើង បន្ទាប់ពីតុលាការក្រុងភ្នំពេញ បានបើកសវនការកាត់ទោស កាលពីថ្ងៃទី០១ មីនា ហើយដែលអ្នកជំនាញផ្នែកសិទ្ធិមនុស្សបានរិះគន់ថា ការបង្ហាញភស្តុតាងរបស់អាជ្ញាធរកម្ពុជា មិនបានបង្ហាញព័ត៌មានគ្រប់គ្រាន់ អំពីការស៊ើបអង្កេតលើករណីនោះទេ។
លោក ឃីងស្លី អាប៊ត (Kingsley Abbott) ទីប្រឹក្សាជាន់ខ្ពស់ផ្នែកច្បាប់អន្តរជាតិរបស់គណៈកម្មការអ្នកច្បាប់អន្តរជាតិ (ICJ) ដែលបានចូលរួមនៅក្នុងដំណើរការកាត់ក្តីនេះ បានថ្លែងថា ដំណើរការស៊ើបអង្កេតហាក់បីដូចជា មានកង្វះខាតលើទិដ្ឋភាពសំខាន់ៗជាច្រើនចំណុច។ លោកអាប៊តបានបន្តថា ជនរងគ្រោះពីបទឧក្រិដ្ឋដ៏ធ្ងន់ធ្ងរនេះ រួមមាន ភរិយា និងកូនៗរបស់លោក កែម ឡី នឹងមិនទទួលបានយុត្តិធម៌ពិតប្រាកដនោះទេ លុះត្រាតែមានការស៊ើបអង្កេតដោយឯករាជ្យ មិនលំអៀង និងប្រកបដោយប្រសិទ្ធភាព ដើម្បីកំណត់ថា តើមានជនសង្ស័យដទៃទៀត ជាប់ពាក់ព័ន្ធនឹងករណីឃាតកម្មនេះដែរឬទេ។ ចំណែកលោក ហ្វីល រ៉ូប៊ឺតសុន (Phil Robertson) នាយករងអង្គការឃ្លាំមើលសិទ្ធិមនុស្សប្រចាំតំបន់អាស៊ីបានថ្លែងថា អាជ្ញាធរកម្ពុជា បានបរាជ័យក្នុងការស៊ើបអង្កេតលើករណីចន្លោះប្រហោងជាក់ស្ដែងជាច្រើន នៅក្នុងករណីនេះ។
ប៉ុន្តែយ៉ាងណាក៏ដោយ នៅក្នុងសេចក្តីសម្រេចកាលពីថ្ងៃទី ២៣មីនា តុលាការក្រុងភ្នំពេញបានបំបែកសំណុំស៊ើបអង្កេតឃាត់កម្មបាញ់សម្លាប់លោកកែម ឡី នេះ ទៅលើមនុស្សពីរនាក់ទៀត ដែលក្នុងនោះរួមមានអ្នកផ្ដល់អាវុធ និងអ្នកដែលបាននាំឲ្យជួប សម្លាប់ ស្គាល់លោក កែម ឡីជាដើម។ គិតត្រឹមថ្ងៃសៅរិ៍ទី២៥មីនា នៅមិនទាន់មានប្រតិកម្មតបតពីតុលាការកម្ពុជា ឬក្រសួងយុត្តិធម៌កម្ពុជាទៅនឹងសេចក្តីថ្លែងការណ៍នេះទេ។
សូមបញ្ជាក់ថា ក្រៅពីប្រតិកម្មរបស់អង្គការផ្នែកសិទ្ធិមនុស្សអន្តរជាតិធំៗទាំង៣ខាងលើនេះ ក្រុមអង្គការសង្គមស៊ីវិលកម្ពុជាចំនួន៦៦ ក៏បានចេញសេចក្តីថ្លែងការណ៍រួមគ្នាកាលពីថ្ងៃទី២៣មីនា ដោយទាមទារឲ្យមានការស៊ើបអង្កេតដោយឯករាជ្យឡើងវិញដែរ។ ក្រុមអង្គការសង្គមស៊ីវិលបានលើកឡើងថា ការស៊ើបអង្កេត និងការផ្តល់សក្ខីកម្មជុំវិញការសម្លាប់លោក កែម ឡី នៅមានការសង្ស័យជាច្រើនដែលពួកគេមិនអាចទទួលយកបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ