លោក កឹម សុខា ចាប់ផ្តើមចុះពង្រឹងមូលដ្ឋានឡើងវិញ ក្រោយខកខានជាងកន្លះឆ្នាំ
លោក កឹម សុខា ប្រធានស្តីទីគណបក្សសង្គ្រោះជាតិ បានចាប់ផ្តើមចុះមូលដ្ឋានសាជាថ្មី នៅថ្ងៃអាទិត្យចុងសប្តាហ៍នេះ ក្រោយពីលោកបានទទួលការលើកលែងទោសពីព្រះមហាក្សត្រកាលពីខែតុលាឆ្នាំ២០១៦។ ខេត្តព្រះសីហនុ និងខេត្តកំពតដែលស្ថិតនៅភាគនិរតីនៃកម្ពុជា គឺជាទឹកដីដំបូងគេដែលប្រធានស្តីទីគណបក្សប្រឆាំងបានធ្វើដំណើរទៅ។ ប៉ុន្តែដំណើរចុះមូលដ្ឋានលើកនេះ ហាក់បានធ្វើឡើងដោយស្ងាត់ៗ ពោលគឺមិនមានការជូនដំណឹងជាសាធារណៈដូចមុនៗនោះទេ។
ចុះផ្សាយនៅថ្ងៃ៖
ស្តាប់ - ០២:៣១
ដំណើរចុះទៅកាន់មូលដ្ឋានរបស់លោក កឹម សុខា លើកនេះ ហាក់កំពុងធ្វើឡើងដោយស្ងាត់ៗ ដោយផ្ដោតតែទៅលើការជួបជុំជាមួយក្រុមមេដឹកនាំថ្នាក់ខេត្ត ក្រុង ស្រុក ដើម្បីជ្រើសរើសបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ប្រចាំនៅខេត្តព្រះសីហនុតែប៉ុណ្ណោះ។ ប៉ុន្តែអ្វីជាការកត់សំគាល់ នេះគឺជាដំណើរចុះទៅកាន់មូលដ្ឋានជាលើកទី១ហើយរបស់លោក កឹម សុខា បន្ទាប់ពីលោកបានទទួលការលើកលែងទោសពីព្រះមហាក្សត្រកាលពីដើមខែតុលាឆ្នាំ២០១៦ នឹងក្រោយពីលោកបានឃុំខ្លួនឯងនៅក្នុងទីស្នាក់ការបក្សអស់រយៈពេលជិតកន្លះឆ្នាំ ដើម្បីគេចចេញពីការចាប់ខ្លួនរបស់អាជ្ញាធរកម្ពុជា ដែលបានចោទប្រកាន់លោកនៅក្នុងសំណុំរឿងផ្លូវភេទដ៏ចម្រូងចម្រាស់ជាមួយកញ្ញា ខុម ចាន់តារាទី ហៅស្រីមុំ ចាប់តាំងពីខែឧសភាឆ្នាំមុន។
នៅក្នុងជំនួបផ្ទៃក្នុងជាមួយថ្នាក់ដឹកនាំគណបក្សខេត្ត ក្រុង និងស្រុក ទូទាំងខេត្តព្រះសីហនុនៅថ្ងៃនេះ លោកកឹម សុខា បានផ្ដល់ឱកាសដោយសេរីដល់ថ្នាក់ដឹកនាំទាំងអស់បញ្ចេញមតិ អំពីចំណុចវិជ្ជមាន និងចំណុចអវិជ្ជមានក្នុងការងារចំពោះមុខរបស់ពួកគេ។ លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិបានឲ្យដឹងថា ដំណើររបស់លោក កឹម សុខា ទៅមូលដ្ឋានលើកនេះ គឺដើម្បីប្រមូលយកព័ត៌មានតែប៉ុណ្ណោះ ពោលគឺទាំងព័ត៌មានល្អ និងអាក្រក់ ដើម្បីត្រៀមចូលរួមការបោះឆ្នោតជ្រើសរើសក្រុមប្រឹក្សាឃុំសង្កាត់នាពេលខាងមុខ។ ដំណើររបស់លោក កឹម សុខា លើកនេះ នឹងមិនមានទេ ការជួបជុំវេទិកាមហាជន, ឬការថ្លែងសារនយោបាយនោះឡើយ។
សូមជំរាបជូនថា ទន្ទឹមនឹងដំណើរឆ្ពោះទៅកាន់មូលដ្ឋានរបស់លោក កឹម សុខា លើកនេះ គណៈកម្មាធិការអចិន្ត្រៃយ៍នៃរដ្ឋសភា ក៏គ្រោងនឹងបើកកិច្ចប្រជុំនៅថ្ងៃទី២៣មករាស្អែកនេះ ដើម្បីពិនិត្យលើសំណើរសុំធ្វើវិសោធនកម្មបទបញ្ជាផ្ទៃក្នុងរដ្ឋសភា តាមសំណើររបស់លោកនាយករដ្ឋមន្ត្រី ហ៊ុន សែន ដើម្បីលុបចោលតំណែងប្រធានក្រុមមតិភាគតិចនៅរដ្ឋសភាដែលមានឋានៈស្មើនាយករដ្ឋមន្ត្រីរបស់លោក កឹម សុខា នឹងបានព្រមានថា បើក្រុមតំណាងរាស្ត្រគណបក្សប្រឆាំងមិនចូលប្រជុំសភាទេ នោះគណបក្សទាំងពីរនឹងគ្មានជំនួបចរចារជាថ្មីនោះឡើយ។ ចំណែកលោក កឹម សុខា កាលពីម្សិលម្ងៃបានថ្លែងថា "បើគណបក្សកាន់អំណាច គេមិនត្រូវការជួបចរចាជាមួយយើង យើងត្រូវនាំគ្នាទៅនិយាយជាមួយប្រជាពលរដ្ឋនៅតាមមូលដ្ឋាន"វិញ។
សូមបញ្ជាក់ដែរថា ក្រៅពីដំណើរចុះទៅកាន់មូលដ្ឋានរបស់លោក កឹម សុខា នៅខេត្តព្រះសីហនុ និងខេត្តកំពតនាថ្ងៃអាទិត្យនេះ ក្រុមអ្នកតំណាងរាស្ត្រគណបក្សប្រឆាំង និងថ្នាក់ដឹកនាំជាច្រើនទៀត ក៏កំពុងដាក់មុខព្រួញចុះទៅកាន់មូលដ្ឋានផ្សេងៗទៀត ដើម្បីឆ្ពោះទៅរកការបោះឆ្នោតក្រុមប្រឹក្សាឃុំ-សង្កាត់អាណត្តិទី៤ នៅថ្ងៃទី៤ មិថុនា ឆ្នាំ២០១៧ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ