តុលាការចេញដីកាកោះហៅលោក គឹម សុខ ខណៈមិត្តភ័ក្រ២នាក់របស់លោកត្រូវបានឃាត់ខ្លួន
តុលាការក្រុងភ្នំពេញ នៅល្ងាចម្សិលមិញនេះ បានចេញដីកាកោះហៅលោក គឹម សុខ ឲ្យចូលខ្លួនទៅកាន់តុលាការក្រុងភ្នំពេញ នៅព្រឹកថ្ងៃទី១៧កុម្ភៈចុងសប្តាហ៍នេះ និងបានបញ្ជាទៅកងកម្លាំងក្រសួងមហាផ្ទៃឲ្យឃ្លាំមើល ពីដំណើររបស់លោក កឹម សុខ កុំឲ្យចាកចេញពីប្រទេសកម្ពុជាជាបណ្តោះអាសន្ន។ ស្របពេលមានដីកាកោះហៅលោក គឹម សុខ នេះ អាជ្ញាធរក្រុងភ្នំពេញ ក៏បានឃាត់ខ្លួនមិត្តភ័ក្រពីរនាក់របស់លោកកាលពីយប់មិញនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
វាជាចំណាត់ការដូចផ្លេកបន្ទោល ពោលគឺដីកាកោះហៅអ្នកវិភាគនយោបាយមិនសំចៃមាត់លោក គឹម សុខ បានធ្លាក់មកនៅតែប៉ុន្មានម៉ោងប៉ុណ្ណោះ ក្រោយពីមានពាក្យបណ្តឹងពីលោក គី តិច មេធាវីតំណាងអាណត្តិរបស់លោកនាយករដ្ឋមន្ត្រី ហ៊ុន សែន កាលពីព្រឹកថ្ងៃទី១៣កុម្ភៈឆ្នាំ២០១៧នេះ។ យោងតាមដីកាកោះហៅនេះ លោក សៀង សុខ ព្រះរាជអាជ្ញារង អមសាលាដំបូងរាជធានីភ្នំពេញ បានអញ្ជើញលោក គឹម សុខ ក្នុងនាមជាជនសង្ស័យ ឲ្យចូលខ្លួនទៅកាន់តុលាការក្រុងភ្នំពេញ នៅវេលាម៉ោង៩ព្រឹក ថ្ងៃទី១៧កុម្ភៈ ចុងសប្តាហ៍នេះ ដើម្បីឆ្លើយដោះសាជុំវិញពាក្យបណ្តឹងរបស់លោក គី តិច ចុះថ្ងៃទី១៣កុម្ភៈ។ ដីកាកោះហៅនេះ ទើបតែត្រូវបានអាជ្ញាធរយកទៅបិទ នៅមុខផ្ទះរបស់លោក គឹម សុខ ស្ថិតនៅក្នុងខេត្តតាកែវ នៅព្រឹកថ្ងៃទី១៤ខែកុម្ភៈនេះ។
ក្រៅពីចេញដីកាកោះហៅហើយ ព្រះរាជអាជ្ញារងតុលាការក្រុងភ្នំពេញ ក៏បានចេញដីកាបង្គាប់ឲ្យមន្ត្រីនគរបាលយុត្តិធម៌ នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ ត្រួតពិនិត្យនៅតាមច្រកព្រំដែន ទាំងផ្លូវគោក ផ្លូវអាកាស និងផ្លូវទឹក ដោយហាមមិនឲ្យលោក គឹម សុខ ចាកចេញពីប្រទេសកម្ពុជាឡើយ។ បើយោងតាមដីកាបង្គាប់នេះ នេះគឺជាវិធានការចាំបាច់ដើម្បីជៀសវាងការរាំងស្ទះ ដល់នីតិវិធីនៃការស៊ើបអង្កេត និងការស្តាប់យកចម្លើយរបស់ជនសង្ស័យ។
គួរជំរាបជូនថា កាលពីយប់មិញនេះដែរ អ្នកស្និទលោក គឹម សុខ ពីរនាក់ ក៏ត្រូវបានអាជ្ញាធរខណ្ឌដូនពេញឃាត់ខ្លួនផងដែរ ក្រោយពីពួកគេពីរនាក់បានខ្ចីរថយន្តរបស់គេ ទៅដឹកលោក គឹម សុខ ចេញពីការិយាល័យវិទ្យុសំឡេងសហរដ្ឋអាមេរិក (VOA) ប្រចាំនៅទីក្រុងភ្នំពេញត្រលប់ទៅផ្ទះវិញ។ បើតាមការឲ្យដឹងពីលោក គឹម សុខ ថា មិត្តភ័ក្ររបស់លោកម្នាក់ ឈ្មោះ សៀង ជិន និងអ្នកជិតស្និទ្ធគាត់ម្នាក់ទៀត ត្រូវបានបញ្ជូនខ្លួនទៅកាន់អធិការដ្ឋាននគរបាលខណ្ឌដូនពេញតាំងពីយប់មិញមក។ លោក គឹម សុខ អះអាងថា លោក សៀង ជិន គ្រាន់តែជាអ្នករកស៊ីចិញ្ចឹមឆ្នាំងតូចតាចម្នាក់ប៉ុណ្ណោះ។ គាត់មិនដែលជាប់ពាក់ព័ន្ធការងាររបស់លោកឡើយ។ គេមិនទាន់ដឹងថា តើលោក សៀង ជិន ត្រូវបានឃាត់ខ្លួនក្នុងបទល្មើសអ្វីនៅឡើយទេ។
សូមបញ្ជាក់ដែរថា លោក គឹម សុខ អ្នកវិភាគនយោបាយនិងសង្គម ត្រូវបានលោកនាយករដ្ឋមន្ត្រី ហ៊ុន សែន ប្តឹងបន្ទាប់ពីអ្នកវិភាគរូបនេះបានថ្លែងចោទប្រកាន់ថា គណបក្សប្រជាជនកម្ពុជា ជាអ្នកសម្លាប់លោកបណ្ឌិតកែម ឡី។ លោកនាយករដ្ឋមន្ត្រីដែលបានប្តឹងលោក គឹម សុខ ដោយទាមទារឲ្យតុលាការកាត់ទោសតាមផ្លូវច្បាប់ និងទាមទារសំណងជំងឺចិត្តកន្លះលានដុល្លារ ឬ២០០០លានរៀល។ ឆ្លើយតបនឹងពាក្យបណ្តឹងនេះ លោក គឹម សុខ បានអះអាងថា លោកនឹងនៅតតាំងក្នុងរឿងក្តីនេះ ដោយមិនគេចខ្លួនជាដាច់ខាត។ ប៉ុន្តែលោកបានសំណូមពរកុំឲ្យអាជ្ញាធរប្រើប្រាស់កងកម្លាំងឃ្លាំមើលលោកច្រើនពេក ដែលនាំទៅដល់ការរំខានការបំពេញការងាររបស់លោក, ក្រុមគ្រួសាររលោក, រួមទាំងមិត្តភ័ក្ររបស់លោកផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ