ព្រឹត្តិការណ៍អូឡាំពិកឆ្នាំ២០១៦បានបើកសម្ពោធជាផ្លូវការ ដោយមានអត្តពលិកជាង១ម៉ឺននាក់ចូលរួម
ព្រឹត្តិការណ៍កីឡាអូឡាំពិករដូវក្តៅឆ្នាំ២០១៦ បានបើកសម្ពោធជាផ្លូវការហើយនៅព្រឹកថ្ងៃសៅរិ៍ទី៦សីហានេះ ម៉ោងនៅក្នុងប្រទេសកម្ពុជា ត្រូវនឹងពេលយប់ ម៉ោងនៅក្នុងប្រទេសប្រេស៊ីល។ ព្រឹត្តិការណ៍ដែលមានអត្តពលិកជាង១ម៉ឺននាក់ មកពី២០៧ប្រទេសចូលរួមនេះ ក៏មានអត្តពលិកកម្ពុជាចំនួន៦រូបផងដែរ។ តាមកម្មវិធី កីឡាហែលទឹកកម្ពុជា នឹងត្រូវចាប់ផ្តើមប្រកួតដំបូង នៅថ្ងៃទី៩សីហាតទៅ។
ចុះផ្សាយនៅថ្ងៃ៖
ស្តាប់ - ០២:៤២
ក្រោមពន្លឺភ្លើងកាំជ្រូចដែលបានបាញ់ចម្រុះគ្នា ចេញពីពហុកីឡាដ្ឋានMaranaca នាទីក្រុង Rio de Janeiro នៃប្រទេសប្រេស៊ីលជាសញ្ញាថា ព្រឹត្តិការណ៍អូឡាំពិករដូវក្តៅលើកទី៣១ត្រូវបានបើកសម្ពោធជាផ្លូវការហើយ នៅព្រឹកថ្ងៃសៅរិ៍នេះ ត្រូវនឹងពេលយប់ម៉ោងនៅក្នុងប្រទេសប្រេស៊ីល។ មានអត្តពលិកប្រមាណជាង១ម៉ឺននាក់ តំណាងឲ្យប្រទេសចំនួន ២០៧ បានចូលរួមនៅក្នុងពិធីបើកការប្រកួតនេះ ក្នុងនោះក៏មានអត្តពលិកកម្ពុជានិងគណៈប្រតិភូកម្ពុជាចូលរួមផងដែរ ដោយពួកគេបានលើកទង់ជាតិដើរគ្រវីនៅចំពោះមុខគណៈអធិបតីនិងទស្សនិកជនជាង១០ម៉ឺននាក់។ ទង់ជាតិកម្ពុជាត្រូវបានផ្តល់កិត្តិយសកាន់ដោយកីឡាការិនីតេក្វាន់ដូរកម្ពស់ខ្ពស់ ស៊ន សៀវម៉ី ក្នុងឯកសណ្ឋានប្រពៃណីពណ៌ស្វាយយ៉ាងស្រស់ស្អាត។
សូមបញ្ជាក់ថា ព្រឹត្តិការណ៍អូឡាំពិករដូវក្តៅនៅទីក្រុងរីយ៉ូ ដែលមានរយៈពេល១៦ថ្ងៃ ចាប់ពីថ្ងៃទី៥ដល់ថ្ងៃទី២១សីហានេះ មានកីឡាករ-កីឡាការិនីជាង១ម៉ឺននាក់ តំណាងឲ្យ២០៧ប្រទេសចូលរួម ដើម្បីប្រជែងយកមេដាយលើ២៨ប្រភេទកីឡា។ នៅថ្ងៃដំបូងនៃពិធីបើកការប្រកួតនៅថ្ងៃនេះ មិនមានការប្រកួតនៅឡើយទេ។ គួរជំរាបជូនដែរថា កម្ពុជាបានបញ្ជូនអត្តពលិកចំនួន៦រូប លើ៤ប្រភេទវិញ្ញាសារចូលរួមប្រកួត នៅក្នុងព្រឹត្តិការណ៍កីឡាអូឡាំពិករដូវក្តៅនៅទីក្រុងរីយ៉ូនេះ រួមមាន ផ្នែកកីឡាហែកទឹក២នាក់, ចំបាប់១នាក់, អត្តពលកម្ម២នាក់, និងតេក្វាន់ដូ១នាក់។
យោងតាមកម្មវិធីនៃការប្រកួត កីឡាករហែលទឹកកម្ពុជា ពូ សុវិជ្ជា នឹងប្រកួតដំបូងនៅថ្ងៃទី៩សីហា នាវេលាម៉ោង១រសៀលម៉ោងនៅក្នុងប្រទេសប្រេស៊ីល ត្រូវនឹងម៉ោង១១យប់ម៉ោង នៅក្នុងប្រទេសកម្ពុជា លើវិញ្ញាសាហែលទឹកចម្ងាយ១០០ម៉ែត្រសេរី។ បន្ទាប់មកនៅថ្ងៃទី១២សីហា កីឡាការិនី ហែម តុនវិទីនី នឹងប្រកួតលើវិញ្ញាសាហែលទឹកចម្ងាយ៥០ម៉ែត្រសេរី។ ជាបន្តបន្ទាប់មកទៀត កីឡាការិនីលី ណារី នឹងប្រកួតលើវិញ្ញាសាររត់ម៉ារ៉ាតុង នៅថ្ងៃទី១៤ សីហា,កីឡាការិនី ចូវ សុធារ៉ា នឹងប្រកួតលើវិញ្ញាសារបោកចំបាប់ទម្ងន់៤៨គីឡូក្រាម នៅថ្ងៃទី១៧ សីហា។ ហើយថ្ងៃទី២០ សីហា វេលាម៉ោង១រសៀលគឺជាការប្រកួតរបស់កីឡាការិនីតេក្វាន់ដូ ស៊ន សៀវម៉ី លើវិញ្ញាសាតេក្វាន់ដូទម្ងន់លើស៦៧គីឡូក្រាម (+67Kg) និងចុងក្រោយគឺជាការប្រកួតរបស់អត្តពលកម្ម នីកូហ៊ីរ៉ូស៊ី ជនជាតិជប៉ុនដែលរត់តំណាងឲ្យកម្ពុជាលើវិញ្ញាសាររត់ប្រណាំង នៅថ្ងៃទី២១សីហា។
ក្រុមអ្នកជំនាញផ្នែកកីឡារំពឹងទុកថា កម្ពុជានឹងទទួលបានមេដាយជាលើកដំបូងពីព្រឹត្តិការណ៍កីឡាអូឡាំពិកនៅទីក្រុង Rio de Janeiro នៃប្រទេសប្រេស៊ីលនេះ តាមរយៈកីឡាការិនីតេក្វាន់ដូ ស៊ន សៀវម៉ី។ នាងគឺជាម្ចាស់មេដាយមាស Asian Games ឆ្នាំ២០១៤ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ