ការបង្គាប់ឲ្យកម្ទេចមាន់ជល់៩២ក្បាលនៅកម្ពុជាបង្កការរិះគន់ និងសំណួរជាច្រើន
សាធារណជនបាននាំគ្នារិះគន់ ជុំវិញចំណាត់ការរបស់តុលាការ ក្នុងករណីបង្គាប់ឲ្យកម្ទេចមាន់ជល់៩២ក្បាល តាមរយៈការអារកសម្លាប់ ដែលមាន់ទាំងនេះ ទើបបង្ក្រាបបានកាលពីពេលថ្មីៗនេះនៅឃុំ អរិយក្សត្រ ខេត្តកណ្ដាល។ ក្នុងនោះគេសង្កេតឃើញថា ការរិះគន់មានចាប់តាំងពីបញ្ញវន្ត រហូតដល់ពលរដ្ឋសាមញ្ញ ដែលប្រតិកម្មទាំងនេះ ធ្វើឡើងតាមរយៈបណ្ដាញសង្គមហ្វេសបុក។ ប៉ុន្តែយ៉ាងណាក៏ មន្ត្រីតុលាការអះអាងថា អ្វីដែលខ្លួនបានធ្វើគឺមានមូលហេតុ។
ចុះផ្សាយនៅថ្ងៃ៖
ស្តាប់ - ០១:៥៣
សំណួរជាច្រើនបានចោទសួរថា តើមាន់ខុសអ្វី? នៅកម្ពុជាមានទោសប្រហារជីវិតហើយឬ?សម្លាប់មាន់ដើម្បីបំភ័យសត្វសេក ឬយ៉ាងណា? មាន់អាចនាំគ្នាបាតុកម្មបង្អត់អាហារដើម្បីតវ៉ានឹងទោសប្រហារជីវិតនេះ? នេះគឺជាការចោទសួររបស់សាធារណជន លាយឡំ និងការរិះគន់ដែលធ្វើឡើងតាមរយៈបណ្ដាញសង្គម។ បន្ថែមលើនេះ ក៏មានដែរ ការដាក់រូបភាពធៀបរវាងការថែរក្សាមាន់ជល់នៅប្រទេសគេ និងការអារកសម្លាប់មាន់ជល់នៅក្នុងប្រទេសកម្ពុជា។
ឆ្លើយតបនឹងការរិះគន់នេះ មន្រ្តីតុលាការខេត្តកណ្ដាលបាននិយាយទៅតាមដីកាសម្រេចរបស់ខ្លួនថា មូលហេតុដែលឈានដល់ការកម្ទេចមាន់ជល់៩២ក្បាលនេះ គឺមានការលំបាកនៅក្នុងការថែរក្សា ចំណាយប្រាក់ច្រើនក្នុងការថែទាំ និងដើម្បីបង្ការកុំឲ្យមានបទល្មើសកើតមានជាថ្មី ។ ម្យ៉ាងទៀតក៏ដើម្បីពន្លឿននីតិវិធីនៃការស៊ើបសួរឲ្យបានឆាប់រហ័ស។
ចំណែក លោក ជិន ម៉ាលីន អ្នកនាំពាក្យក្រសួងយុត្តិធម៌មានការចម្លែកចិត្តបន្តិចដែរ នៅពេលឃើញករណីនេះកើតឡើង ។ ប៉ុន្តែយ៉ាងណាក៏ដោយ លោកបានឯកភាព នឹងហេតុផលរបស់តុលាការព្រោះតុលាការសម្រេចឲ្យកម្ទេចមាន់ចោលនេះ គឺបានផ្អែកទៅលើស្ថានភាពជាក់ស្ដែង។ ស្របពេលមានការចោទសួរអំពីការបំផ្លាញភស្តុតាងដែរទេជុំវិញ ករណីអារកមាន់នេះ? លោកជិន ម៉ាលីន អះអាងថា អាចមានការបកស្រាយផ្សេងគ្នា។ ប៉ុន្តែសម្រាប់អ្នកនាំពាក្យរូបនេះគឺ មិនបានបំផ្លាញទេព្រោះថា ការកម្ទេចសត្វមាន់នេះមានដីកាសម្រេចពីតុលាការដោយបានបញ្ជាក់ហេតុផលយ៉ាងច្បាស់។
គួររម្លឹកថា ការកម្ទេចចោលនូវមាន់ជល់ទាំងនេះ ធ្វើឡើង បន្ទាប់ពីម្ចាស់សង្វៀនបញ្ចល់មាន់ដែលគេដឹងថា ជាក្មួយប្រសារលោកនាយករដ្ឋមន្ត្រី ហ៊ុន សែន ឈ្មោះថៃ ផានី ត្រូវបានតុលាការសម្រេចចេញដីកា ឃុំខ្លួនកាលពីពេលថ្មីៗនេះ។ ករណីនេះ ត្រូវបានគេរាយការណ៍ថា មានជាប់ពាក់ព័ន្ធចាប់តាំងពីមេឃុំ មេភូមិ អ្នកកាសែត ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ