គ្រោះធម្មជាតិសម្លាប់ពលរដ្ឋកម្ពុជា៣៤នាក់និងរបួស៧៧នាក់
យ៉ាងហោចណាស់មនុស្ស៣៤នាក់បានស្លាប់ដោយសារខ្យល់កន្ត្រាក់និងរន្ទះបាញ់គិតត្រឹមខែមេសា ឆ្នាំ២០១៦នេះ។ លោក ញឹម វណ្ណដា អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយបានបញ្ជាក់ប្រាប់វិទ្យុបារាំងថា ចំនួនអ្នកស្លាប់មានការកើនឡើងខ្លាំងនៅខែមេសា ដែលបណ្ដាលឲ្យមានអ្នកស្លាប់ជាង២០នាក់។
ចុះផ្សាយនៅថ្ងៃ៖
ស្តាប់ - ០១:៤០
គិតត្រឹមខែមេសាឆ្នាំ២០១៦នេះ មានមនុស្ស៣៤នាក់ស្លាប់ដោយសារគ្រោះមហន្តរាយធម្មជាតិនៅកម្ពុជា។ ក្នុងនោះខ្យល់កន្ត្រាក់បានកើតមាន១១៥ករណី មនុស្សស្លាប់៧នាក់ របួស២៧នាក់ ខូចខាតផ្ទះជិត១ពាន់ខ្នង ផ្ទះបាក់បែកនិងរបើកដំបូលមានជិត៥ពាន់ខ្នង។ ដោយឡែកមនុស្ស២៧នាក់ស្លាប់ដោយសាររន្ទះបាញ់ និង មានរបួស៥០នាក់ ។
លោក ញឹម វណ្ណដា អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយចាត់ទុកថា ចំនួនអ្នកស្លាប់មានការកើនឡើងខ្ពស់ជាងឆ្នាំទៅក៏ព្រោះតែនៅឆ្នាំនេះខ្យល់កន្ត្រាក់និងរន្ទះបាញ់មានភាពឃោឃៅ។ លោកថា បញ្ហានេះរដ្ឋាភិបាលបានត្រៀមបង្កាទុកជាមុនដែរ ប៉ុន្តែនៅមិនអាចទប់ស្កាត់ឈ្នះ។
ដោយឡែកទាក់ទងស្ថានភាពអាកាសធាតុទូទៅ លោក ញឹម វណ្ណដា បានគូសបញ្ជាក់ថា រដូវវស្សាបានចូលមកដល់ហើយដែល បញ្ហាខ្វះខាតទឹកប្រើប្រាស់នៅកម្ពុជាមានភាពធូរស្រាលឡើងវិញជាបណ្ដើៗហើយ។ ប៉ុន្តែភាគីពាក់ព័ន្ធមិនបានទម្លាក់ដៃក្នុងការចុះចែកទឹកនោះទេ ។ លោក ញឹម វណ្ណដា ទទួលស្គាល់ថា យុទ្ធនាការចុះចែកទឹករបស់រដ្ឋាភិបាលនៅមិនទាន់ផ្គាប់ចិត្តប្រជាពលរដ្ឋបាននៅឡើយទេពោលគឺដោះស្រាយបានត្រឹមតែទឹកផឹកប៉ុណ្ណោះនៅសល់ទឹកធ្វើស្រែមិនទាន់គ្រប់គ្រាន់។
សូមបញ្ជាក់ថា គ្រោះមហន្តរាយដែលនាំឲ្យកម្ពុជាជួបភាព រាំងស្ងួតនៅពេលថ្មីៗ បានប៉ះពាល់ដល់ប្រជាជនកម្ពុជាប្រមាណចំនួន ២លាន ៥សែននាក់។ ក្រៅពីប៉ះពាល់ដល់មនុស្សហើយ គ្រោះរាំងស្ងួតក៏បានសម្លាប់សត្វរាប់រយក្បាល ត្រីរាប់សិបតោន និងបណ្តាលឲ្យមានភ្លើងឆេះព្រៃរាប់រយហិចតា។ ក្នុងនោះបានបង្កផលប៉ះពាល់ដល់ប្រជាជនរស់នៅក្នុងស្រុក និងក្រុងចំនួន ៩៣ និងឃុំ សង្កាត់ចំនួន ៣២៧ ទៅទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ