សភាអឺរ៉ុបស្នើកម្ពុជាឲ្យទម្លាក់ចោលគម្រោងច្បាប់ពីរ
សំឡេងប្រឆាំងនឹងគម្រោងច្បាប់ពីររបស់កម្ពុជា៖ ទី១គឺសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល និងទី២គឺសេចក្តីព្រាងច្បាប់ស្តីពីសហជីព បានលាន់ខ្ទរខ្ទារដល់សភាសហភាពអឺរ៉ុប ។ អង្គការនីតិប្បញ្ញត្តិនៃ២៨ប្រទេសនេះបានបញ្ចេញ«សំណើដំណោះស្រាយរួម»មួយដែលគាំទ្រអ្នកតវ៉ាជំទាស់នឹងឆន្ទៈរបស់រដ្ឋាភិបាល និងរដ្ឋសភាកម្ពុជាទាំងស្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
គឺនៅចំថ្ងៃសិក្ខាសាលាពិគ្រោះយោបល់លើសេចក្តីព្រាងច្បាប់ស្តីពីសមាគម និងអង្គការមិន មែនរដ្ឋាភិបាល រៀបចំដោយរដ្ឋសភាកម្ពុជានៅថ្ងៃពុធតែម្តង ដែលសភាសហភាពអឺរ៉ុបបានបញ្ចេញ«សំណើដំណោះស្រាយរួម»ទាក់ទងនឹងគម្រោងច្បាប់នេះផង និងគម្រោងច្បាប់ស្តីពីសហជីពផង។
សភាសហភាពអឺរ៉ុបទាំងមូលបានធ្វើសំណើមួយចំនួនចំពោះរដ្ឋាភិបាលកម្ពុជា ក្នុងចំណោមនោះមានជាអាទិ៍៖ ទម្លាក់ចោលដាច់ខាតនូវសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល ព្រមទាំងសេចក្តីព្រាងច្បាប់ស្តីពីសហជីព, ទទួលស្គាល់«តួនាទីស្របច្បាប់ និងមានប្រយោជន៍»របស់សង្គមស៊ីវិល សហជីព និងគណបក្សនយោបាយប្រឆាំងដែល«រួមចំណែកដល់ការអភិវឌ្ឍន៍សេដ្ឋកិច្ច និងនយោបាយជាទូទៅនៅកម្ពុជា», ផ្សាយសេចក្តីព្រាងច្បាប់ស្តីពីសហជីពបច្ចុប្បន្ន និងពិគ្រោះជាមួយអ្នកជំនាញ និងសមាជិកសហជីព «ដើម្បីកែតម្រូវឱ្យស្របតាមអនុសញ្ញាអន្តរជាតិលេខ៨៧ស្តីពីសេរីភាពសហជីព និងសិទ្ធិបង្កើតសហជីព ព្រមទាំងអនុសញ្ញាអន្តរជាតិលេខ៩៨ស្តីពីសិទិ្ធប្រមូលផ្តុំ និងសិទ្ធិចរចាជាសមូហភាព», និងធ្វើតាមមតិរបស់អ្នករាយការណ៏ពិសេសអង្គការសហប្រជាជាតិទទួលបន្ទុកសិទ្ឋិមនុស្សដែលថ្លែងថា«ច្បាប់ប្រភេទនេះគួរអនុម័តតែនៅពេលណាបានពិគ្រោះយោបល់ប្រកបដោយការចូលរួមពេញលេញ ដោយបើកចំហរគ្រប់គ្រាន់ ដើម្បីធានាថា គ្រប់ភាគីពាក់ព័ន្ធមានឯកភាពលើខ្លឹមសារ(...)»។
សភាសហភាពអឺរ៉ុបដែលយល់ឃើញថា «ភាពស្វាហាប់នៃសង្គមស៊ីវិលកម្ពុជា» ជាពិសេសសកម្មជនការពារសិទ្ធិដីធ្លី សមាជិកសហជីព អ្នកសារព័ត៌មាន និងសមាជិកគណបក្សប្រឆាំង «មានតួនាទីស្ថាបនាជាសំខាន់» ហើយថា«កម្ពុជាប្រឈមនឹងការខាតបង់ប្រាក់សម្រាប់ទ្រទ្រង់គម្រោងអភិវឌ្ឍន៍ពី៦០០លានទៅ៧០០លានដុល្លារអាមេរិកក្នុងមួយឆ្នាំ បន្ទាប់ពីការអនុម័តសេចក្ដីព្រាងច្បាប់ស្តីពីអង្គការមិនមែនរដ្ឋាភិបាល(...)»។
សំណើរបស់សភាសហភាពអឺរ៉ុបគឺជាការបន្ទរតាមសំឡេងរបស់សមាគម និងអង្គការមិនមែនរដ្ឋាភិបាលមួយចំនួននៅកម្ពុជា ដែលបានពិនិត្យឃើញថា សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល និងសេចក្តីព្រាងច្បាប់ស្តីពីសហជីព រឹតត្បិតសេរីភាពបញ្ចេញមតិ និងសិទ្ធិបង្កើតសមាគម និងអង្គការមិនមែនរដ្ឋាភិបាល។
អ្នកនាំពាក្យរដ្ឋសភាកម្ពុជាបានអះអាងថា មិនទាន់បានទទួល«សំណើរដំណោះស្រាយរួម»របស់សភាសហភាពអឺរ៉ុបនេះនៅឡើយទេ ប៉ុន្តែលោក ឈាង វុន ដែលជាប្រធានគណកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មានផង បានគូសបញ្ជាក់ថា «សភាកម្ពុជាអត់ស្តាប់បង្គាប់សភាអឺរ៉ុបទេ» ហើយថាសំណើរបស់សភាអឺរ៉ុបគឺ«ទទួលយកអត់បានទេ»។
សេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល បានឆ្លងផុតដៃរបស់រដ្ឋាភិបាលកម្ពុជាទៅហើយ បន្ទាប់វាត្រូវបានបញ្ជូនមករដ្ឋសភាកម្ពុជានៅថ្ងៃទី០៥ ខែមិថុនា ឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ