នាយករដ្ឋមន្ត្រីស្នើសុំប្រមុខរដ្ឋស្តីទីបញ្ឈប់គោរមងារឧកញ៉ា៧៥នាក់ នៅក្នុងជួរកងទ័ព
ទីបំផុតចំនួនឧកញ៉ា នៅក្នុងក្របខ័ណ្ឌក្រសួងការពារជាតិត្រូវបានកំណត់ហើយគឺចំនួន៧៥នាក់ ដែលចំនួននេះត្រូវបានប្រមុខរដ្ឋាភិបាលកម្ពុជា ដាក់ក្នុងបញ្ជីស្នើទៅប្រមុខរដ្ឋស្តីទីសុំបញ្ឈប់គោរមងារ។ ការស្នើបញ្ចប់គោរមងារឧកញ៉ានេះ ធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំគណៈកម្មាធិការកណ្តាលរបស់គណបក្សប្រជាជនកម្ពុជា កាលពី ខែសីហា ឆ្នាំ២០១៩ កន្លងទៅ បានដាក់បញ្ជាមិនឲ្យកងកម្លាំងប្រដាប់អាវុធមានជាប់ពាក់ព័ន្ធនឹងគោរមងារដ៏ខ្ពង់ខ្ពស់មួយនេះ។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងលិខិតផ្ញើជូនលោក សាយ ឈុំ ប្រមុខរដ្ឋស្តីទីកាលពីសប្តាហ៍មុន ហើយអ្នកកាសែតទើបតែទទួលបាននៅថ្ងៃនេះ លោកនាយករដ្ឋមន្ត្រី ហ៊ុន សែន បានរាយឈ្មោះច្បាស់ៗនូវថ្នាក់ដឹកនាំក្នុងជួរកងយោធពលខេមរភូមិន្ទសរុបចំនួន៧៥នាក់ ដែលត្រូវបានស្នើឲ្យបញ្ឈប់ពីគោរមងារជាឧកញ៉ា។
ក្នុងចំណោម មន្ត្រីយោធាជាន់ខ្ពស់ ដែលបោះបង់ចោលគោរមងារឧកញ៉ាទាំងនេះ ក្នុងនោះមានថ្នាក់នាយឧត្តមសេនីយ៍ចំនួន៦រូប ដែលគេស្គាល់ច្រើនគឺនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិ និងនាយឧត្តមសេនីយ៍ សែម សុវណ្ណនី អគ្គនាយកមជ្ឈមណ្ឌលជាតិគ្រប់គ្រងកងកម្លាំងរក្សាសន្តិភាព បោសសំអាតមីន និងកាកសំណល់សង្គ្រាម។
ក្រៅពីនេះ គឺជាមន្ត្រីយោធាដែលមានឋានន្តរស័ក្តិថ្នាក់ឧត្តមសេនីយ៍ឯក ឧត្តមនាវីឯក ឧត្តមសេនីយ៍ទោ ឧត្តមសេនីយ៍ត្រី រហូតដល់វរសេនីយ៍ទោ ដែលសុទ្ធសឹងជាអ្នកមានមុខងារជាអគ្គនាយក អគ្គនាយករង អគ្គលេខាធិការរង មេបញ្ជាការរង នាយរងសេនាធិការ និងជំនួយការ នៃកងពល និងអង្គភាពយោធាផ្សេងៗ នៅក្នុងក្របខ័ណ្ឌក្រសួងការពារជាតិ។
ជាការកត់សម្គាល់ថ្នាក់ដឹកនាំ និងមន្ត្រីយោធា ដែលមានឋានន្តរស័ក្តិសំខាន់ៗ បានស្ម័គ្រចិត្តលះបង់គោរមងារឧកញ៉ាចោល ដោយជ្រើសរើសយកតួនាទីយោធាតែមួយ ក្រោយការប្រកាសរបស់លោកនាយករដ្ឋមន្ត្រី ហ៊ុន សែន កាលពីខែមុន។ រីឯអ្នកដែលសុខចិត្តជ្រើសរើសយកគោរមងារឧកញ៉ា ដោយលះបង់ចោលតំណែងកងទ័ពវិញ គឺមិនត្រូវបានបង្ហាញដោយក្រសួងការពារជាតិឡើយ។
ដោយឡែក ក្រសួងមហាផ្ទៃវិញ គេនៅមិនទាន់ដឹងច្បាស់លាស់នៅឡើយពីចំនួនមន្ត្រីនគរបាល ដែលសុខចិត្តលះបង់គោរមងារជាឧកញ៉ាចោល។ ក៏ប៉ុន្តែកាលពីពេលថ្មីៗនេះ អ្នកនាំពាក្យក្រសួងមហាផ្ទៃលោក ខៀវ សុភ័ក បានប្រាប់ RFI ថាក្រសួងបានកំណត់ចំនួនមន្ត្រីនគរបាលជាង៣០នាក់ ដែលមានជាប់ពាក់ព័ន្ធគោរមងារជាឧកញ៉ា។ សូមបញ្ជាក់ថាប្រទេសកម្ពុជាមានចំនួនឧកញ៉ាសរុបប្រមាណជាជិត១ពាន់នាក់ ហើយជារឿយៗ មានបុគ្គលមួយចំនួន ដែលពាក់គោរមងារឧកញ៉ា បានប្រព្រឹត្តខុសច្បាប់នៅក្នុងសង្គម ដែលនាំឲ្យមានការរិះគន់ និងធ្វើឲ្យប៉ះពាល់ដល់តំលៃឧកញ៉ាទូទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ