លោកកែ គឹមយ៉ាន ជំរុញឲ្យបង្កើតគណៈកម្មការបង្ក្រាបគ្រឿងញៀននៅសង្កាត់ទឹកថ្លាជាបន្ទាន់
លោកឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានណែនាំឲ្យមានការបង្កើតជាបន្ទាន់នូវគណៈកម្មការត្រួតពិនិត្យ ធ្វើសកម្មភាព និងវាយតម្លៃ ការបង្ក្រាបគ្រឿងញៀន នៅសង្កាត់ទឹកថ្លា។ ជាការកត់សម្គាល់ សង្កាត់ទឹកថ្លា គឺជាកន្លែង ដែលមានករណីជួញដូរគ្រឿងញៀនច្រើនជាងគេ បើគិតក្នុងចំណោមសង្កាត់ផ្សេងៗនៅទូទាំងរាជធានីភ្នំពេញ ក្នុងឆ្នាំ២០១៦នេះ។ ការណែនាំរបស់លោកកែ គឹមយ៉ាន នេះ បានធ្វើឡើង ខណៈលោក រួមជាមួយនឹងតំណាងសាលារាជធានីភ្នំពេញ និងមន្ត្រីពាក់ព័ន្ធផ្សេងទៀត បានចុះទៅត្រួតពិនិត្យ ភូមិត្រពាំងឈូក សង្កាត់ទឹកថ្លា ខណ្ឌសែនសុខ នាព្រឹកថ្ងៃទី ៨មិថុនានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
តំបន់ត្រពាំងឈូក ដែលស្ថិតនៅក្នុងសង្កាត់ទឹកថ្លា រាជធានីភ្នំពេញ ត្រូវបានចាត់ទុកថាជាកន្លែង ដែលពេញនិយមដោយការជួញដូរគ្រឿងញៀន គ្មានការថមថយសោះ។ គ្រាន់តែនៅក្នុងរយៈពេលដើមឆ្នាំ ២០១៦នេះ ករណីជួញដូរគ្រឿងញៀន មានចំនួនច្រើនជាង ៣០០ករណី ហើយសមត្ថកិច្ច បានឃាត់ខ្លួនជនល្មើសជាង ៣០០នាក់។ នេះបើតាមការបញ្ជាក់ពីលោកមាស ភារិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន។
ដូច្នេះ លោកកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន រួមជាមួយនឹងសាលារាជធានីភ្នំពេញ និងមន្ត្រីពាក់ព័ន្ធផ្សេងទៀត បានចុះទៅពិភាក្សា និងពិនិត្យតំបន់នោះផ្ទាល់ ដើម្បីរកគន្លឹះ ដោះស្រាយ និងរៀបចំយន្តការ ដើម្បីរក្សាស្ថិរភាព សុវត្ថិភាពតំបន់នោះ ឲ្យបានរៀបរយ និងឲ្យល្អប្រសើរជាងមុន។
បើតាមលោកមាស ភារិទ្ធ ក្រោយការពិនិត្យនោះ ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានណែនាំឲ្យមានផែនការធ្វើសកម្មភាពរយៈពេល ១ឆ្នាំ ដោយអនុវត្តជា ៤ដំណាក់កាល គឺមានការត្រួតពិនិត្យ រៀងរាល់ ៣ខែម្តង។ ជាមួយគ្នានោះ ក៏បានជំរុញឲ្យមានការបង្កើតជាបន្ទាន់នូវគណៈកម្មការត្រួតពិនិត្យ និងធ្វើសកម្មភាព នៅតំបន់ត្រពាំងឈូក និងទូទាំងសង្កាត់ទឹកថ្លាទាំងមូល ហើយត្រូវមានគណៈកម្មការតាមដាន និងវាយតម្លៃពីវឍ្ឈនភាព នៃសកម្មភាពបង្ក្រាបគ្រឿងញៀន ថ្នាក់សង្កាត់នោះផងដែរ។ ចំណែកឯសមាសភាពរបស់គណៈកម្មការនោះ គឺជាការរួមបញ្ជូលគ្នាជាមួយនឹងសហគមន៍មូលដ្ឋាន។ តាមអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន ដោយសារតែកន្លងមកការអនុវត្តច្បាប់តែមួយមុខមិនបានជោគជ័យ ដូច្នេះទើបមានការតម្រូវឲ្យមានការប្រើប្រាស់គ្រប់កោសិកានៅសង្កាត់ទឹកថ្លានោះឲ្យចូលរួម។
សូមបញ្ជាក់ថា យន្តការក្នុងការប្រយុទ្ធប្រឆាំងនឹងគ្រឿងញៀនថ្នាក់ជាតិ មានអាជ្ញាធរជាតិប្រយុទ្ធប្រឆាំង គ្រឿងញៀនជាស្នូល បន្ទាប់មកនៅថ្នាក់ក្រោមជាតិ មានគណៈកម្មការត្រួតពិនិត្យ និងបង្ក្រាបគ្រឿងញៀនរាជធានី ខេត្ត ដែលបង្កើតឡើងដោយសេចក្តីសម្រេចរបស់រាជរដ្ឋាភិបាល។ ហើយគណៈកម្មការនេះ ត្រូវបង្កើតគណៈកម្មការត្រួតពិនិត្យគ្រឿងញៀន តាមខណ្ឌ ហើយខណ្ឌ ត្រូវបង្កើតនៅតាមសង្កាត់។ តាមអាជ្ញាធរជាតិប្រយុទ្ធប្រឆាំងគ្រឿងញៀន នៅក្នុងរាជធានីភ្នំពេញ សុទ្ធតែមានគណៈកម្មការរបៀបនេះនៅតាមខណ្ឌ ឬសង្កាត់ផ្សេងៗ ដោយឡែកនៅតែសង្កាត់ទឹកថ្លា ដែលនៅខ្វះសមាសភាព ក្នុងការបំពេញបន្ថែម ដើម្បីបង្កើតគណៈកម្មការនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ