សមត្ថកិច្ចចាប់បានគ្រឿងញៀនជាង១០០គីឡូក្រាម ត្រឹមតែរយៈពេលមិនដល់មួយសប្តាហ៍
សមត្ថកិច្ចកម្ពុជា បានរឹបអូសគ្រឿងញៀនសរុប ១២០គីឡូក្រាម ពីទីតាំងចំនួនពីរផ្សេងគ្នា ដែលករណីទាំងនេះ គឺជាការបង្កា្របគ្រឿងញៀនទ្រង់ទ្រាយធំ ដែលមិនដែលធ្លាប់មាន តែក្នុងមួយសប្តាហ៍ប៉ុណ្ណោះ។ ទំហំគ្រឿងញៀនក្នុងបរិមាណច្រើន ដែលពួកឧក្រិដ្ឋជនធ្វើការជួញដូរ ហើយដែលប៉ូលីសចាប់បាននេះ ជាសក្ខីភាពមួយ តែអ្នកតាមដានសង្គមមើលឃើញថា កម្ពុជាកំពុងប្រឈមនឹងស្ថានភាពគ្រោះថ្នាក់នៅឡើយដោយគ្រឿងញៀន។
ចុះផ្សាយនៅថ្ងៃ៖
ស្តាប់ - ០២:០២
សមត្ថកិច្ចប៉ូលីសខេត្តសៀមរាប និងគយ ប្រចាំច្រកទ្វារនៃព្រលានយន្តហោះអន្តរជាតិខេត្តសៀមរាប កាលពីយប់ថ្ងៃទី២៤ តុលា បានចាប់បានគ្រឿងញៀនចំនួន២៧,៣០គីឡូក្រាម និងធ្វើការឃាត់ខ្លួនស្រ្តីពីរនាក់ជាជនជាតិថៃ ខណៈពួកគេបានព្យាយាមនាំចេញទៅកាន់ប្រទេសហ្វីលីពីន។
ប៉ូលីសឲ្យដឹងថា សមត្ថកិច្ចបានរកឃើញ គ្រឿញៀនប្រភេទជាម៉្សៅក្រាមពណ៌សថ្លា ជាប្រភេទមេតំហ្វេតាម៉ីន រុំដោយថង់ប្លាស្ទីក ខ្ចប់ក្រដាសអាលុមីញ៉ូមចំនួន២៧ដុំ ទម្ងន់សរុប ២៨,៣០គីឡូក្រាម តែទម្ងន់គ្រឿងញៀនសុទ្ធ ២៧,៣០គីឡូក្រាម ត្រូវបានគេលាក់ទុកនៅក្នុងកាបូបធ្វើដំណើរ។
ការចាប់បានគ្រឿងញៀន នៅក្នុងទ្រង់ទ្រាយធំដូច្នេះ គឺជាលើកទី៣ហើយ នៅមិនដល់មួយសប្តាហ៍ត្រឹមត្រូវផង។ កាលពីថ្ងៃទី២១ខែតុលា ប៉ូលីសខេត្តកំពង់ធំ រួមនឹងមន្ទីរប្រឆាំងគ្រឿងញៀនក្រសួងមហាផ្ទៃ បានបើកប្រតិបត្តិការចាប់បានគ្រឿងញៀនចំនួន៤០គីឡូក្រាម ហើយពីរថ្ងៃក្រោយមក ប៉ូលីសក៏រឹបអូសបាន៥៣គីឡូក្រាមថែមទៀត នៅក្នុងខេត្តកំពង់ធំដដែល ដោយពេលនោះ សមត្ថកិច្ចឃាត់ខ្លួនជនសង្ស័យជាបុរសចំនួន៤នាក់ ក្នុងនោះម្នាក់ជាជនជាតិថៃ។
ជុំវិញការចាប់បានគ្រឿងញៀន និងជនសង្ស័យជាឧក្រិដ្ឋជនជួញដូរគ្រឿងញៀនដ៏ក្រាសក្រែល សរុបចំនួន១២០គីឡូក្រាម ដូច្នេះ ក្រុមអ្នកតាមដានសង្គម បានបង្ហាញពីការព្រួយបារម្ភ ថាប្រទេសកម្ពុជានៅតែញ៉ាំញីដោយសារគ្រឿងញៀន និងកាន់តែធ្ងន់ធ្ងរ តាមរយៈករណីជួញដូរនីមួយៗ ដែលមានរូបភាពធំដុំ។ ក៏ប៉ុន្តែអាជ្ញាធរជាតិប្រយុទ្ធប្រឆាំងគ្រឿងញៀន បានលើកឡើងថាគឺជារូបភាពជួញដូរដែលមានអង្គការចាត់តាំងច្បាស់លាស់ ហើយយុទ្ធសាស្ត្រធំៗនៃការជួយដូរនេះ ជនកម្ពុជានៅមិនទាន់មានសមត្ថភាពធ្វើជាខ្នងបង្អែកបាននៅឡើយ។
សូមបញ្ជាក់ថារយៈពេល៩ខែ ឆ្នាំ២០១៩ សមត្ថកិច្ចកម្ពុជាចាប់គ្រឿងញៀន បានចំនួនជាង៥០០គីឡូក្រាមហើយ ដែលនេះជាកំណើនមួយដ៏ខ្លាំងធៀបទៅនឹងឆ្នាំ២០១៨ សម្រាប់រយៈពេលដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ