លោក ឌី វិជ្ជា៖ ការស្លាប់របស់ឪពុកលោកក្នុងឧបទ្ទវហេតុធ្លាក់ឧទ្ធម្ភាគចក្រកាលពី១០ឆ្នាំមុន គឺដោយសារកត្តាអាកាសធាតុ
លោកឧត្តមសេនីយ៍ឯក ឌី វិជ្ជា កូនប្រុសច្បងរបស់លោក ហុក ឡងឌី អតីតអគ្គស្នងការនគរបាលជាតិ បានបញ្ចេញប្រតិកម្មជាលើកដំបូងចំពោះការអះអាងរបស់លោក សម រង្ស៊ី ថា ឳពុករបស់លោកបានស្លាប់ដោយការរៀបចំធ្វើឃាតដោយលោកនាយករដ្ឋមន្ត្រី ហ៊ុន សែន តាមរយៈការដាក់គ្រាប់បែកឲ្យផ្ទុះនៅលើឧទ្ធម្ភាគចក្រ កាលពីឆ្នាំ ២០០៨។ ប៉ុន្តែ លោក ឌី វិជ្ជា បានចាត់ទុកការលើកឡើងរបស់លោក សម រង្ស៊ី ថា ជាការផ្សព្វផ្សាយព័ត៌មានប្រឌិត ញុះញង់ និងធ្វើឲ្យមតិជាតិនិងអន្តរជាតិមានការភ័ន្តច្រឡំ។ ពាក់ព័ន្ធនឹងករណីនេះ លោក ឌី វិជ្ជា បានអះអាងថា លោកកំពុងឲ្យមេធាវីរបស់លោក សិក្សានិងពិនិត្យមើលឯកសារ ដើម្បីប្ដឹងលោក សម រង្ស៊ី។
ចុះផ្សាយនៅថ្ងៃ៖
គឺជាប្រតិកម្មលើកដំបូងរបស់លោក ឌី វិជ្ជា ដែលជាកូនប្រុសបង្កើតរបស់លោកនាយឧត្តមសេនីយ៍ ហុក ឡងឌី អតីតអគ្គស្នងការនគរបាលជាតិ។ ប្រតិកម្មនេះ បានធ្វើឡើងបន្ទាប់ពីលោក សម រង្ស៊ី ប្រធានស្តីទីអតីតគណបក្សសង្គ្រោះជាតិ បានចោទប្រកាន់លោកនាយករដ្ឋមន្ត្រី ហ៊ុន សែន ថា បានលួចធ្វើឃាតលោក ហុក ឡង់ឌី អតីតអគ្គស្នងការនគរបាលជាតិ តាមរយៈការដាក់គ្រាប់បែកឲ្យផ្ទុះលើឧទ្ធម្ភាគចក្ររបស់លោក ហុក ឡង់ឌី កាលពីថ្ងៃទី ០៩ វិច្ឆិកា ឆ្នាំ២០០៨។ ប៉ុន្តែ លោក ឌី វិជ្ជា ដែលកូនប្រុសបង្កើតរបស់លោកនាយឧត្តមសេនីយ៍ ហុក ឡងឌី បានចេញមកអះអាងថា ការស្លាប់របស់ឪពុកលោកក្នុងឧបទ្ទវហេតុធ្លាក់ឧទ្ធម្ភាគចក្រ កាលពីជាង១០ឆ្នាំមុននោះ គឺដោយសារកត្តាអាកាសធាតុ។
តាមរយៈបណ្តាញផ្សព្វផ្សាយព័ត៌មានក្នុងស្រុក កាលពីថ្ងៃ០៩ មិថុនា លោក ឌី វិជ្ជា ដែលបច្ចុប្បន្ន គឺជាអគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិ និងជាកូនប្រសាររបស់លោកនាយករដ្ឋមន្ត្រី ហ៊ុន សែន បានចាត់ទុកការលើកឡើងរបស់លោក សម រង្ស៊ី ថា ជាការផ្សព្វផ្សាយព័ត៌មានប្រឌិត ញុះញង់ ដែលធ្វើឲ្យមតិជាតិនិងអន្តរជាតិមានការភ័ន្តច្រឡំ ជុំវិញការស្លាប់របស់ឪពុកលោក។
លោក ឌី វិជ្ជា បានលើកឡើងថា លោក សម រង្ស៊ី បានយកការស្លាប់របស់ឪពុកលោកក្នុងឧបទ្ទវហេតុធ្លាក់ឧទ្ធម្ភាគចក្រ ដោយសារកត្តាអាកាសធាតុនេះ ទៅធ្វើជាឧបាយកលទុច្ចរិត ក្នុងការបម្រើមហិចតានយោបាយរបស់ខ្លួន ដើម្បីប្រឌិតរឿងបំបែកបំបាក់ផ្ទៃក្នុងនៃថ្នាក់ដឹកនាំរដ្ឋាភិបាល ក៏ដូចជាក្រុមគ្រួសាររបស់លោកផ្ទាល់ផងដែរ។ បើតាមលោក ឌី វិជ្ជា នេះមិនមែនជាលើកទីមួយទេ ដែលលោក សម រង្ស៊ី បានប្រឌិតព័ត៌មានមិនពិត និងបង្កើតព័ត៌មានញុះញង់ ដើម្បីបំផ្លាញស្ថិរភាពសង្គម និងសាមគ្គីភាពជាតិ តាមរយៈការបង្កើតគណនីហ្វេសប៊ុកក្លែងបន្លំឈ្មោះថ្នាក់ដឹកនាំរដ្ឋាភិបាល ការវាយប្រហារទៅលើប្រមុខរដ្ឋាភិបាល និងញុះញង់ឲ្យយោធាធ្វើសកម្មភាព ផ្ដួលរំលំរដ្ឋាភិបាលជាដើម។ ពាក់ព័ន្ធនឹងករណីនេះ លោក ឌី វិជ្ជា បានអះអាងថា លោកកំពុងឲ្យមេធាវីរបស់លោក សិក្សានិងពិនិត្យមើលឯកសារ ដើម្បីប្ដឹងលោក សម រង្ស៊ី ទៅកាន់តុលាការ។
គួរជំរាបជូនថា នៅក្នុងសំណុំរឿងដូចគ្នានេះ លោកនាយករដ្ឋមន្ត្រី ហ៊ុន សែន កាលពីថ្ងៃទី ០៧ មិថុនា កន្លងទៅ ក៏បានប្រកាសឲ្យមេធាវីរបស់លោករៀបចំឯកសារ ដើម្បីប្តឹងលោក សម រង្ស៊ី ទៅកាន់តុលាការប្រទេសបារាំងផងដែរ។ ជាពាក្យបណ្តឹងចំពោះការចោទប្រកាន់របស់លោក សម រង្ស៊ី ថា លោកនាយករដ្ឋមន្ត្រី ហ៊ុន សែន ជាអ្នកសម្លាប់ លោក ហុក ឡង់ឌី តាមរយៈការដាក់គ្រាប់បែកឲ្យផ្ទុះក្នុងឧទ្ធម្ភាគចក្រ នៅពេលដែលកំពុងតែហោះហើរលើខេត្តស្វាយរៀង កាលពីថ្ងៃទី ០៩ ខែវិច្ឆិកា ឆ្នាំ ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ