លទ្ធផលនៃប្រឡងបាក់ឌុប៖ បេក្ខជនជាង៧ម៉ឺននាក់ប្រឡងជាប់ តែចំនួនអ្នកបាននិទ្ទេសAបានធ្លាក់ចុះបើធៀបនឹងឆ្នាំមុន
លទ្ធផលនៃការប្រឡងបាក់ឌុបសម្រាប់ឆ្នាំ២០១៨ បានចេញផ្សាយជាផ្លូវការហើយ នៅព្រឹកថ្ងៃទី ៩ ខែកញ្ញានេះ ដោយមានបេក្ខជនសរុបជាង៧ម៉ឺននាក់ស្មើនឹង ៦៦.២១% បានប្រឡងជាប់ ក្នុងចំណោមបេក្ខជនសរុបជាង១១ម៉ឺននាក់។ ក្នុងនោះ បេក្ខជនប្រឡងជាប់និទ្ទេស A មានចំនួន២៩០នាក់។ អ្វីជាការកត់សំគាល់ ចំនួនអ្នកប្រឡងជាប់ឆ្នាំនេះមានការកើនឡើង តែចំនួនអ្នកបាននិទ្ទេសA បានធ្លាក់ចុះ បើធៀបនឹងឆ្នាំមុន។ មូលហេតុ ដោយសារតែក្រសួងបានបង្កើនស្តង់ដាប្រធានវិញ្ញាសាប្រឡងខ្លាំងជាងមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
បើផ្អែកតាមលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប សម្រាប់ឆ្នាំ២០១៨ ដែលបានផ្សព្វផ្សាយឲ្យដឹងនៅព្រឹកថ្ងៃទី ៩ កញ្ញា មានបេក្ខជនសរុប ៧៥ ០៥៩ នាក់ ស្មើនឹង ៦៦.២១% បានប្រឡងជាប់។ ក្នុងនោះ បេក្ខជនដែលទទួលបាននិទ្ទេស A មានចំនួន ២៩០នាក់ និទ្ទេសB ចំនួន ១៥៣២នាក់ និទ្ទេស C ចំនួន ៤៦៣១នាក់ និទ្ទេសD ចំនួន ១៣ ៩៩៩នាក់ និងនិទ្ទេស E ចំនួន ៥៤ ៦០៧នាក់។
អ្វីជាការកត់សំគាល់ ចំនួនអ្នកប្រឡងជាប់សញ្ញាបត្រមធ្យមសិក្សាទុតិយភូមិ ឬ បាក់ឌុប សម្រាប់ឆ្នាំ២០១៨នេះ គិតជាភាគរយមានការកើនឡើងពី ៦៣.៨៤% នៅឆ្នាំ២០១៧ ដល់ ៦៦.២១% នៅឆ្នាំ២០១៨ ។ ប៉ុន្តែចំនួនបេក្ខជនដែលប្រឡងជាប់និទ្ទេស A បានធ្លាក់ចុះបើប្រៀបធៀបនឹងឆ្នាំមុន ពោលគឺ ពី៤២៤នាក់នៅឆ្នាំ២០១៧ មកនៅត្រឹម ២៩០នាក់ នៅឆ្នាំ២០១៨ ។ មូលហេតុ ដោយសារតែក្រសួងអប់រំ យុវជន និងកីឡា បានបង្កើនស្តង់ដាប្រធានវិញ្ញាសាប្រឡងខ្លាំងជាងមុន ក្នុងគោលដៅពង្រឹងគុណភាពអប់រំ និងជំរុញបេក្ខជនឲ្យខិតខំរៀនសូត្រឲ្យកាន់តែមានចំណេះដឹងជ្រៅជ្រះថែមទៀត។ នេះបើតាមការបញ្ជាក់ពីក្រសួងអប់រំ យុវជន និង កីឡា។ ការប្រកាសលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ ត្រូវបានប្រកាសលើបណ្ដាញសង្គមផ្លូវការរបស់ក្រសួងអប់រំ យុវជន និងកីឡា MoEYS Cambodia facebook.com/moeys.gov.kh នៅរសៀលថ្ងៃនេះ សម្រាប់មណ្ឌលប្រឡងរាជធានីភ្នំពេញ-ខេត្តកណ្ដាល។ ចំណែកឯមណ្ឌលប្រឡងបណ្ដាខេត្តផ្សេងៗទៀត នឹងត្រូវផ្សព្វផ្សាយនាព្រឹក ថ្ងៃទី ១០ ខែកញ្ញា ឆ្នាំ២០១៨ ។
គួរជំរាបជូនថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលបានប្រព្រឹត្តទៅកាលពីថ្ងៃទី ២០-២១ ខែសីហាឆ្នាំ២០១៨ មានមណ្ឌលប្រឡងនៅគ្រប់រាជធានី ខេត្ត សរុប ១៩៦មណ្ឌល ដោយមានបេក្ខជនសរុប ១១៥ ២៦៨នាក់ ដែលក្នុងនោះ ៩០ ១២០នាក់ ជាបេក្ខជនចំណេះទូទៅ ១៧០៣១នាក់ ជាបេក្ខជនស្វៃរិន ៤៤២៥នាក់ ជាបេក្ខជនបំពេញវិជ្ជា និង ៣៦៩២នាក់ ជាបេក្ខជនស្វៃរិនបំពេញវិជ្ជា។ បេក្ខជនអវត្តមានមានចំនួន ១៩០។ យ៉ាងណាក៏ដោយ ក្រសួងអប់រំយុវជន និងកីឡា បានវាយតម្លៃជាទូទៅថា ដំណើរការនៃការប្រឡងសញ្ញាបត្របាក់ឌុបឆ្នាំនេះ បានប្រព្រឹត្តទៅដោយជោគជ័យ និងពុំមានឧបសគ្គអ្វីគួរឲ្យកត់សំគាល់នោះឡើយ រាប់ទាំងដំណើរការនៃការប្រឡង ដំណើរការនៃសំណេរ កំណែ និងការស្រង់បូកពិន្ទុតាមរយៈប្រព័ន្ធកុំព្យូទ័រជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ