អ្នកដឹកនាំសេដ្ឋកិច្ចគ្រួសារ គឺជាអ្នកមានឥទ្ធិពលលើសន្លឹកឆ្នោតសមាជិកឯទៀត?
ចុះផ្សាយនៅថ្ងៃ៖
ស្តាប់ - ០៤:១៩
ការបោះឆ្នោតជ្រើសរើសក្រុមប្រឹក្សាឃុំសង្កាត់នឹងចូលមកដល់នៅ ថ្ងៃទី៤ខែមិថុនាខាងមុខ។ ជាទូទៅការធ្វើសកម្មភាពរបស់សមាជិកនិងអ្នកគាំទ្រគណបក្សនយោបាយ នីមួយៗ ហាក់មិនសូវមានសកម្មភាពផុលផុសដូចជាការបោះឆ្នោតជ្រើសតាំង តំណាងរាស្ត្រឡើយ។ ដោយឡែកឥរិយាបទ ឬទំលាប់របស់ពលរដ្ឋម្ចាស់ឆ្នោតវិញក៏មានការប្រែប្រួលទៅតាមហ្នឹង ដែរគឺ ការសម្រេចចិត្តទំលាក់សន្លឹងឆ្នោតទៅក្នុងហិបត្រូវគេមើលឃើញថា អាចយោងទៅតាមអ្នកក្តោបក្តាប់សេដ្ឋកិច្ចគ្រួសារ ដែលភាគច្រើនជាពលរដ្ឋសកម្ម ឬជាយុវជន។
មកទល់នឹងថ្ងៃពុធនេះ គណបក្សដែលចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់អាណត្តិទី៤ ចំនួន១២ គណបក្ស អាចនឹងបានដឹងខ្លះៗហើយថា តាមរយៈយុទ្ធនាការឃោសនារបស់ខ្លួនជាងមួយសប្តាហ៍កន្លងទៅនេះ គួរទទួលបានលទ្ធផលកំរិតណា នៅថ្ងៃទី៤ខែមិថុនាខាងមុខ ដែលជាថ្ងៃបោះឆ្នោត។ វាគឺជាការស្ទាបស្ទង់ ដោយផ្ទាល់នូវកំលាំងពិតរបស់គណបក្សនីមួយៗ និងការគាំទ្រពីម្ចាស់ឆ្នោត។
ក៏ប៉ុន្តែនេះគឺជាការបោះឆ្នោតក្រុមប្រឹក្សាថ្នាក់ក្រោមជាតិ ដែលគេមិនអាចធ្វើការវាយតម្លៃដូចជាការបោះឆ្នោតជ្រើសរើសតំណាងរាស្ត្រ ឬការបោះឆ្នោតសកលបានទេ។ លើចំណុចនេះ ឥរិយាបទនៃការបោះឆ្នោត របស់ប្រជាពលរដ្ឋក៏មានលក្ខណៈខុសគ្នាដែរ។ ទាក់ទងទៅនឹងការជ្រើសរើសតំណាងរបស់ពួកគេនៅតាមមូលដ្ឋាន សម្រាប់បរិបទ កម្ពុជាបច្ចុប្បន្ន ត្រូវគេសម្គាល់ទៅលើកភាពខុសគ្នាពីអតីតកាលនូវចំណុចមួយចំនួន។ នោះគឺមានការប្រែប្រួលទៅតាមសេដ្ឋកិច្ចគ្រួសារ ដែលអ្នកកាច់ចង្កូតសេដ្ឋកិច្ច ជាអ្នកសម្រេចដ៏សំខាន់នៅក្នុងការបោះឆ្នោតលើកនេះ និងថ្ងៃខាងមុខ។
គេនៅចាំបានថា ពីអតីតកាល បន្ទាប់ពីប្រទេសកម្ពុជារួចផុតពីសង្គ្រាម ឪពុក ម្តាយ អាណាព្យាបាល ដែលជាចាស់ទុំ នៅក្នុងគ្រួសារគឺជាអ្នកមានឥទ្ធិពលទៅលើកូនចៅនៅក្នុងបន្ទុក ជាពិសេសយុវជនដែលគ្រប់អាយុបោះឆ្នោត។ ការណែនាំរបស់អាណាព្យាបាល ឳពុក ម្តាយ ដល់បុត្រធីតារបស់ខ្លួន ឲ្យគាំទ្រគណបក្សនយោបាយណាមួយ ដែលពួកគាត់ស្រលាញ់ពេញចិត្ត អ្នកនៅក្នុងបន្ទុកត្រូវតែតាមគាត់ ដោយសារតែគាត់ ជាអ្នកកាន់សេដ្ឋកិច្ចគ្រួសារនៅក្នុងដៃ ឬហៅម្យ៉ាងទៀតថាជាអ្នកកំណត់ជោគវាសនាអនាគត ដល់កូនចៅ។
ក៏ប៉ុន្តែសម្រាប់បច្ចុប្បន្ននេះ ចាស់ទុំនៅក្នុងផ្ទះភាគច្រើន បានក្លាយទៅជាបុគ្គលសម្រាប់ជាទីសក្ការៈរបស់កូនចៅ និងក្លាយទៅជាមនុស្សដែលលែងមានឥទ្ធិពលទៅលើបុត្រធីតារបស់ខ្លួនដ៏ពេញលេញដូចលើកមុន។ លែងមាន ដោយសារតែទីមួយ សេដ្ឋកិច្ចរបស់គ្រួសារត្រូវបានដឹកនាំដោយកូន ឬចៅ ដែលអ្នករកចំណូលដ៏ចំបង តាមរយៈការប្រកបអាជីវកម្មនានា ការធ្វើការជាមន្ត្រីរាជការ ជាបុគ្គលិកនៅតាមសហគ្រាសឯកជន និងជាកម្មករ នៅតាមរោងចក្រសហគ្រាស ទាំងនៅក្នុងប្រទេសកម្ពុជា និងពលករចំណាកស្រុកនៅឯក្រៅប្រទេស។
ទីពីរ សមាជិកគ្រួសារ ដែលជាកូន ជាចៅ ឬយុវជន ដែលពេញវ័យគ្រប់អាយុបោះឆ្នោត មានការវិវត្តខាងចំណេះដឹងខ្ពស់ជាងចាស់ៗ ដូច្នេះការសម្រេចចិត្តរបស់ពួកគេមានភាពឯករាជ្យក្នុងការ ជ្រើសរើសនិងផ្តល់ការជឿជាក់ទៅលើគណបក្សដែលគេទុកចិត្ត ដោយមិនចំណុះឲ្យការណែនាំរបស់មនុស្សចាស់ទៀតឡើយ។
ដូច្នេះទោះជាមានការស្ទាបស្ទង់ និងការរំពឹងទុកដូចសព្វមួយដងរបស់គណបក្សនីមួយៗពីកំលាំងពិតរបស់ខ្លួនក៏ដោយ ក៏អ្វីៗអាចនឹងមានការប្រែប្រួល ប្រសិនបើការយល់ឃើញពីបរិបទ របស់ប្រទេសនិងឥរិយាបទនៃអ្នកបោះឆ្នោតមានការវិវត្តទៅរករបត់មួយផ្សេងពីអតីតកាល។
មួយវិញទៀត ការបោះឆ្នោតនៅក្នុងក្របខ័ណ្ឌ ក្រុមប្រឹក្សាឃុំសង្កាត់ មិនអាចជាការឆ្លុះបញ្ចាំងទាំងស្រុងទៅលើការបោះឆ្នោតសកលបានទេ។ មិនអាចដោយសារ ការបោះឆ្នោតក្រុមប្រឹក្សាឃុំ សង្កាត់ គ្រាន់តែជាការបោះឆ្នោត ដែលមនុស្សវ័យចំណាស់មានការស៊ាំរួចទៅហើយ នៅឡើយតែក្រុមយុវជន ដែលទើបគ្រប់អាយុបោះឆ្នោតប៉ុណ្ណោះ ដែលពួកគេចង់បង្ហាញពីមោទនភាពចំពោះវ័យ ដែលគេអាចធ្វើការសម្រេចចិត្តជាលើកដំបូង ក្នុងការជ្រើសរើស ទោះជាការជ្រើសរើសនោះជាក្រុមប្រឹក្សាឃុំ សង្កាត់ក្តី ការជ្រើសរើសសមាជិកសភាក្តី។
ជាការពិត ក្នុងចំណោមប្រជាពលរដ្ឋនៅតាមមូលដ្ឋាននានា យុវជនពិតជាដើរតួនាទីសំខាន់ជាងមនុស្សវ័យចំណាស់ ក៏ប៉ុន្តែអ្វីដែលជាអត្ថប្រយោជន៍សម្រាប់ពួកគាត់ គឺជាការរំពឹងទុកពីការអភិវឌ្ឍមូលដ្ឋានដែលពួកគេរស់នៅប៉ុណ្ណោះ។ រីឯឱកាសការងារវិញ យុវជនតែងសម្លឹងទៅរកការបោះឆ្នោតថ្នាក់ជាតិច្រើនជាង ដោយសារថ្នាក់ជាតិគឺជាអ្នកកំណត់ដ៏ធំ ពីទីផ្សារការងារសម្រាប់ពលរដ្ឋខ្មែរ ជាពិសេសយុវជន។ ទោះយ៉ាងណាភាពប្រាកដប្រជា គេនឹងឃើញ ជាក់លាក់ តាមរយៈលទ្ធផលឆ្នោត ដែលនឹងប្រកាសក្រោយថ្ងៃទី៤ខែមិថុនាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ