គជប ផ្តល់សុពលភាពបេក្ខជនឈរឈ្មោះបោះឆ្នោតឃុំសង្កាត់សរុបជាង ៩ម៉ឺននាក់ ខណៈបក្ស ខ្លះពិបាករកបេក្ខជនឈរឈ្មោះ
គណៈកម្មាធិការជាតិរៀបចំការបោះឆ្នោត (គជប) នៅព្រឹកថ្ងៃអង្គារនេះ បានប្រកាសទទួលស្គាល់ បេក្ខភាពសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ សរុបជាង ៩ម៉ឺននាក់ ក្នុងនោះស្រ្តីមានជាង ២ម៉ឺននាក់។ បើតាម គ.ជ.ប ដោយសារ គណបក្សនយោបាយខ្លះពិបាកស្វែងរកបេក្ខជនមកឈរឈ្មោះ ទើបធ្វើឲ្យចំនួន បេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់អាណត្តិទីបួននេះ មានតិចជាង បេក្ខជនឈរឈ្មោះអាណត្តិទីបី ដែលមានបេក្ខជនសរុបជាង ១១ម៉ឺននាក់។
ចុះផ្សាយនៅថ្ងៃ៖
ស្តាប់ - ០២:៤៧
គណៈកម្មាធិការជាតិរៀបចំការបោះឆ្នោត (គជប) នៅព្រឹកថ្ងៃទី១៨ ខែមេសានេះ បានប្រកាសទទួលស្គាល់បេក្ខភាពឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទីបួន សរុប ៩៤.៥៩៥ នាក់ ក្នុងនោះបេក្ខនារី មានសរុប ២៥.៧៨៨ នាក់។ តួលេខនេះ គឺតិចជាង បេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៣ ឆ្នាំ២០១២ ដែលកាលនោះ មាន ១០ គណបក្សនយោបាយចូលរួម និងមាន បេក្ខជនឈរឈ្មោះ ជាង ១១ម៉ឺននាក់។
ក្នុងចំណោមគណបក្សទាំង ១២ ដែលចូលរួមបោះឆ្នោតឆ្នាំ២០១៧នេះ មានតែ ពីរគណបក្សនយោបាយប៉ុណ្ណោះ គឺ គណបក្សប្រជាជនកម្ពុជា និងគណបក្សសង្រ្គោះជាតិ ដែលមានសមត្ថភាព ចុះបញ្ជីបេក្ខជនឈរឈ្មោះបោះឆ្នោតនៅ គ្រប់ឃុំសង្កាត់ទូទាំងប្រទេស។ ខណៈ គណបក្សជនជាតិដើមប្រជាធិបតេយ្យកម្ពុជា ដាក់បេក្ខជនឈរឈ្មោះ១៧ឃុំសង្កាត់ និង បក្សសាធារណរដ្ឋប្រជាធិបតេយ្យ ដាក់បេក្ខជនឈរឈ្មោះត្រឹម ១៤ ឃុំ សង្កាត់ប៉ុណ្ណោះ ។ បេក្ខជនទាំងនេះ នឹងត្រូវចូលរួមបោះឆ្នោតប្រជែង យកតំណែង ប្រធាន អនុប្រធាន និងសមាជិកក្រុមប្រឹក្សាឃុំសង្កាត់ សរុប ១១៥៧២ អាសនៈ ដែលមាននៅក្នុងចំណោមឃុំសង្កាត់ សរុប ១៦៤៦ ទូទាំងប្រទេស។
អ្នកនាំពាក្យ គណៈកម្មាធិការជាតិរៀបចំការបោះឆ្នោត (គជប) លោក ហង្ស ពុទ្ធា បានបញ្ជាក់ប្រាប់វិទ្យុបារាំង នៅថ្ងៃអង្គារនេះថា គណបក្សនយោបាយមិនសូវល្បីឈ្មោះមួយចំនួន មានការពិបាកស្វែងរកបេក្ខជនមកឈរឈ្មោះបោះឆ្នោតតំណាងឲ្យគណបក្សរបស់ខ្លួន។ លោកបន្ថែមថា អំឡុងចុះបញ្ជីបេក្ខជន មានបេក្ខជនឈរឈ្មោះបោះឆ្នោតជាង ១០នាក់ បានសុំលាឈប់ ដោយសារមានការមិនពេញចិត្តនឹង លេខរៀងបាតតារាងក្នុងបញ្ជីផ្ទៃក្នុងគណបក្សនយោបាយរបស់ពួកគេ ហើយមានបំណងលោតទៅឈរឈ្មោះក្នុងបញ្ជីបេក្ខជនគណបក្សផ្សេងដែលនៅលេខរៀងល្អ អាចជាប់ឆ្នោតជាសមាជិកក្រុមប្រឹក្សាឃុំសង្កាត់។ យ៉ាងណាក៏ដោយ គជប បានបដិសេធន៍ លុបឈ្មោះបេក្ខជនទាំងនោះសិន ដើម្បីចៀសវាងភាពច្របូកច្របល់ ដល់ការរកបេក្ខជនជំនួស ឬនាំឲ្យខូចបញ្ជីឈ្មោះបេក្ខជនទំាងស្រុង នៅមុនពេលផ្តល់សុពលភាពបញ្ជីបេក្ខជនគណបក្សនយោបាយ។ ការចុះបញ្ជីបេក្ខជនឈរឈ្មោះបោះឆ្នោតអាណត្តិនេះ មានបណ្តឹងតែ ១០ គត់ប្តឹងមក គជប ទាក់ទងនឹង គណបក្សនយោបាយ បំពេញឯកសារយឺត មិនទាន់ពេលវេលាកំណត់ ។
គួរជម្រាបថា តាមប្រតិទិននៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណតិ្តទី៤ ឆ្នាំ២០១៧ បន្ទាប់ពីប្រកាសផ្តល់សុពលភាពបញ្ជីបេក្ខជនឈរឈ្មោះបោះឆ្នោតក្រុមប្រឹក្សាឃុំសង្កាត់ផ្លូវការ គជប នឹងផ្តើមចែកបណ្ណព័ត៌មានអ្នកបោះឆ្នោត នៅតាមភូមិ ក្នុងឃុំសង្កាត់ ចាប់ពីថ្ងៃទី១៧ ខែមេសា ដល់ថ្ងៃទី១៦ ខែឧសភា។ បើលើសរយះពេលនេះ ពលរដ្ឋក៏អាច ទៅទទួលយក បណ្ណព័ត៌មានអ្នកបោះឆ្នោត ដែលមានទិន្នន័យ ឈ្មោះអ្នកបោះឆ្នោត លេខកូដ និងទីតាំងការិយាល័យ នៅ តាមសាលាឃុំសង្កាត់ រហូតដល់ថ្ងៃទី០២ ខែមិថុនា ឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ