បក្សនយោបាយបកប្រែលទ្ធផលនៃការបោះឆ្នោតតាមការចង់បានរៀងខ្លួន
ចុះផ្សាយនៅថ្ងៃ៖
ស្តាប់ - ០៣:៥៩
៥ថ្ងៃក្រោយការបោះឆ្នោតនិងខណៈដែលមិនទាន់មានលទ្ធផលផ្លូវការពីគជប គណបក្សនយោបាយធំៗជាងគេនៅកម្ពុជា បានបន្តបកប្រែលទ្ធផលក្រៅផ្លូវការនៃការបោះឆ្នោត ទៅតាមការចង់បានរៀងៗខ្លួន។ ទាំងគណបក្សប្រជាជនកម្ពុជា និង ទាំងគណបក្សសង្គ្រោះជាតិ សុទ្ធតែបានអះអាងថា គណបក្សខ្លួនឈ្នះនៅក្នុងការបោះឆ្នោតដែលទើបតែកន្លងទៅនេះ។
សង្គ្រាមប៉ាកាអំពីថាតើគណបក្សណាជាអ្នកទទួលជ័យជំនះនៅក្នុងការបោះឆ្នោតក្រុមប្រឹក្សាឃុំសង្កាត់ នៅតែបន្តកើតមាន ទាំងរវាងគណបក្សនយោបាយ និង ទាំងរវាងអ្នកគាំទ្ររបស់គណបក្សនយោបាយនីមួយៗ។
សម្រាប់គណបក្សសង្គ្រោះជាតិ។ គណបក្សនេះអះអាងថា ខ្លួនទទួលជ័យជំនះ។ ជាជ័យជំនះដែលផ្អែកទៅលើការប្រៀបធៀបនឹងលទ្ធផលបោះឆ្នោតក្រុមប្រឹក្សាឃុំសង្កាត់កាលពីអាណត្តិទី៣ ឆ្នាំ២០១២។ បើតាមការប្រៀបធៀបនេះ គណបក្សសង្គ្រោះជាតិឈ្នះឆ្នោតបានតំណែងមេឃុំនៅឃុំសង្កាត់ជិត៥០០ កើនឡើង១២ដងបើធៀបនឹងការបោះឆ្នោតឆ្នាំ២០១២ ដែលកាលណោះ ឈ្នះតែ៤០ឃុំសង្កាត់ប៉ុណ្ណោះ។ បន្ថែមពីលើនេះ ចំនួនសមាជិកក្រុមប្រឹក្សាឃុំសង្កាត់របស់គណបក្សសង្គ្រោះជាតិ ក៏បានកើនឡើងជិតពាក់កណ្ដាលផងដែរ។
ផ្ទុយពីគណបក្សសង្គ្រោះជាតិ គណបក្សប្រជាជនឯណោះវិញ បានប្រៀបធៀបលទ្ធផលនៃការបោះឆ្នោតឃុំសង្កាត់អាណត្តិនេះ ទៅនឹងលទ្ធផលបោះនៃការបោះឆ្នោតជាតិឆ្នាំ២០១៣។ នៅក្នុងការបោះឆ្នោតជាតិឆ្នាំ២០១៣ គណបក្សកាន់អំណាចទទួលបានសន្លឹកឆ្នោតគាំទ្រជាង៣លាន២សែនសំឡេង។ ចំណែកនៅក្នុងការបោះឆ្នោតឃុំសង្កាត់អាណត្តិនេះវិញ សំឡេងឆ្នោតគាំទ្រសរុប មានចំនួនប្រមាណ៣លាន៥សែនសំឡេង។ បើតាមការប្រៀបធៀបនេះ គណបក្សប្រជាជនទទួលបានសំឡេងឆ្នោតកើនឡើងជាង៣០ម៉ឺនសំឡេង។
ផ្អែកតាមការបកស្រាយដូច្នេះ គេកត់សម្គាល់ឃើញថា គណបក្សនយោបាយទាំងពីរ ព្យាយាមទាញសម្មតិកម្មគ្រប់យ៉ាងដើម្បីសន្និដ្ឋានឲ្យបានថា គណបក្សខ្លួនជាអ្នកឈ្នះ នៅក្នុងការបោះឆ្នោតក្រុមប្រឹក្សាឃុំសង្កាត់លើកនេះ។ ក្នុងនោះ បក្សប្រឆាំងយកលទ្ធផលបោះឆ្នោតក្រុមប្រឹក្សាឃុំសង្កាត់អាណត្តិមុននិងអាណត្តិនេះមកប្រៀបធៀបគ្នា។ ចំណែក បក្សកាន់អំណាច យកលទ្ធផលបោះឆ្នោតឃុំសង្កាត់លើកនេះ ទៅប្រៀបជាមួយលទ្ធផលបោះឆ្នោតជាតិឆ្នាំ២០១៣។
ជាការពិត វាជារឿងធម្មតា ដែលគណបក្សនយោបាយចង់ឈ្នះនៅក្នុងការបោះឆ្នោត ហើយប្រឹងប្រែងបកស្រាយលទ្ធផលនៃការបោះឆ្នោតនោះ ទៅតាមនិន្នាការរបស់ខ្លួន។ ប៉ុន្តែទន្ទឹមគ្នានេះ គេគួរកុំភ្លេចដែរអំពីខ្លឹមសារពិតប្រាកដនៃការបោះឆ្នោតក្រុមប្រឹក្សាឃុំសង្កាត់។ ជាការបោះឆ្នោតដែលជ្រើសរើសអ្នកដឹកនាំថ្នាក់មូលដ្ឋាន ដើម្បីទទួលអំណាចពីរដ្ឋាភិបាលតាមរយៈការអនុវត្តនយោបាយវិមជ្ឈការនៃអំណាចថ្នាក់ជាតិ។
តាមរយៈលទ្ធផលបឋមដែលចេញផ្សាយដោយគណៈកម្មាធិការជាតិរៀបចំការបោះឆ្នោត សំឡេងគាំទ្រនៅតាមឃុំសង្កាត់នៃគណបក្សនយោបាយធំទាំងពីរ គឺមានភាពប្រកៀកប្រកិតគ្នាណាស់។ បើទោះបីជាគណបក្សកាន់អំណាចឈ្នះឆ្នោតនៅឃុំសង្កាត់ជាង២ភាគ៣នៅទូទាំងប្រទេសក៏ដោយ ក៏គួរកុំភ្លេចថា សមាជិកក្រុមប្រឹក្សាឃុំសង្កាត់របស់គណបក្សប្រឆាំង ក៏មានវត្តមាននៅក្នុងឃុំសង្កាត់ទាំងនោះដែរ។ តំណាងរបស់គណបក្សប្រឆាំងបានជ្រាបទៅគ្រប់ឃុំសង្កាត់ទូទាំងប្រទេស ទាំងក្នុងនាមជាក្បាលម៉ាស៊ីនដឹកនាំ និងក្នុងនាមជាក្រុមប្រឹក្សាឃុំសង្កាត់។ នេះគឺជាប្រវត្តិសាស្ត្រដែលទើបតែកើតមានជាលើកដំបូងនៅក្នុងប្រវត្តិការបោះឆ្នោតឃុំសង្កាត់ស្រុកខ្មែរ និងដែលមានន័យថា គ្មានឃុំសង្កាត់ណាដែលត្រូវដឹកនាំផ្ដាច់មុខដោយគណបក្សកាន់អំណាចទៀតឡើយ។
សរុបមកវិញ ការបកស្រាយអំពីលទ្ធផលនៃការបោះឆ្នោតទៅតាមនិន្នាការរបស់គណបក្សនីមួយៗ គឺជាធម្មជាតិនៃអ្នកនយោបាយ។ ប៉ុន្តែ បើទោះបីជាគណបក្សណាឈ្នះបានតំណែងមេឃុំចៅសង្កាត់ច្រើនជាងក៏ដោយ សច្ចភាពមួយដែលគេមិនអាចប្រកែកបានគឺថា ចាប់ពីពេលនេះតទៅ តុល្យភាពអំណាចនៅថ្នាក់មូលដ្ឋាន នឹងមានភាពប្រសើរជាងមុន តាមរយៈវត្តមានសមាជិកក្រុមប្រឹក្សាឃុំសង្កាត់មកពីចម្រុះគណបក្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ