ចរន្តអគ្គិសនីជាហេតុផលចំបងបង្កអគ្គិភ័យខណៈការបង្ការបស់ប្រជាជននៅមានកម្រិត
ចុះផ្សាយនៅថ្ងៃ៖
ស្តាប់ - ០៥:១២
អគ្គិភ័យកាន់តែមានកំណើនច្រើនទៅៗពីមួយឆ្នាំទៅមួយឆ្នាំ ដែលនេះបង្កជាសោកនាដកម្មបន្ថែមទៀតទៅលើគ្រួសារខ្មែរ ដែលខ្លះមានជីវភាពលំបាកស្រាប់។ កំណើនអគ្គិភ័យត្រូវគេរកឃើញថាភាគច្រើនបណ្តាលមកពីការឆ្លងចរន្តអគ្គិសនី និងការធ្វេសប្រហែសពីប្រជាពលរដ្ឋម្ចាស់លំនៅឋាន។កង្វះខាតនៃការផ្សព្វផ្សាយពីការបង្ការ និងការអនុវត្តច្បាប់ ជាកត្តាមួយធ្វើឲ្យប្រជាជនមួយចំនួនធំមិនចាប់អារម្មណ៍ពីសារៈសំខាន់ ក្នុងការការពារភ្លើងទុកជាមុន។ ទោះយ៉ាងនេះក្តី ប្រជាជនមួយចំនួនជាពិសេសនៅទីប្រជុំជនមានការយល់ដឹងជាបណ្តើរៗហើយ។
ជាមធ្យមអគ្គិភ័យបានកើតឡើងរវាងពី២ទៅ៣ថ្ងៃម្តង នៅរាជធានីភ្នំពេញ ហើយលើកយកស្ថានភាពខែមេសាឆ្នាំ២០១៥នេះជាតឹកតាង ដោយមិនទាន់គិតអគ្គិភ័យដែលបានកើតឡើងនៅទូទាំងប្រទេស។ ស្ថិតិបែបនេះនរណាក៏លាន់មាត់ដែរថា មានភ្លើងឆេះផ្ទះឬសហគ្រាសផ្សេងៗស្ទើររាល់ថ្ងៃ។ នៅភ្នំពេញ គ្រាន់តែរយៈពេលមិនដល់៥ខែផង អគ្គិភ័យបានកើតឡើង ៦៥ករណី គិតមកទល់នឹងករណីចុងក្រោយ ឆេះនៅម្តុំឬស្សីកែវកាលពីយប់ថ្ងៃទី២៦ឧសភា។ ជាសរុបមនុស្សចំនួន៥នាក់ បានស្លាប់នៅក្នុងអណ្តាតភ្លើង។
ជាការកត់សម្គាល់ ភាគច្រើននៃអគ្គិភ័យបណ្តាលមកពីឆ្លងចរន្តអគ្គិសនី ឬនិយាយសាមញ្ញទុស្សេខ្សែភ្លើង។ ការធ្វេសប្រហែស ដោយការប្រើប្រាស់និងទុកដាក់ហ្គាស ប្រេងសាំង ឬវត្ថុឆេះឯទៀត គឺជារឿងមួយត្រូវតែយកចិត្តទុកដាក់ដែរ ក៏ប៉ុន្តែបញ្ហាខ្សែភ្លើងដែលមានភាពរញ៉េរញ៉ៃ និងស្មុគ្រស្មាញនៅក្នុងលំនៅឋាននោះ គឺជាបញ្ហាដ៏ចំបងដែលពិបាកនឹងដោះស្រាយ។
ការត្រៀមលក្ខណៈរបស់ប្រជាពលរដ្ឋក្នុងការបង្ការនិងប្រឆាំងភ្លើងបឋមមិនត្រូវបានយកចិត្តទុកដាក់ជាទូទៅ។ មានន័យថាប្រជាពលរដ្ឋតិចតួចនៅឡើយដែលមានការចាប់អារម្មណ៍នឹងគ្រោះមហន្តរាយដោយអគ្គិភ័យ ហើយបានទិញបំពង់ពន្លត់អគ្គិភ័យសម្រាប់ការពារជាមុន បង្ការក្រែងមានអគ្គិភ័យកើតឡើងជាយថាហេតុ។
ប្រជាជនរស់នៅជាមួយនឹងប្រព័ន្ធខ្សែភ្លើងដែលមានអាយុកាលយូរឆ្នាំ ប្រព័ន្ធការពារចរន្ត ឬ ផ្តាច់ចរន្ត មិនមានគុណភាព ខណៈដែលសម្ភារៈប្រើដោយចរន្តអគ្គិសនី មានការកើនឡើងជាលំដាប់។ ការត្រួតពិនិត្យមើលគុណភាពនៃការប្រើប្រាស់អគ្គិសនីមិនមាន និងការតម្លើងបណ្តាញក្នុងផ្ទះដោយមិនគោរពតាមបទដ្ឋានត្រឹមត្រូវជាហេតុផល អាចបង្កអគ្គិភ័យជាញឹកញយ។
តាមទម្លាប់ប្រជាពលរដ្ឋខ្មែរមានការចាប់អារម្មណ៍និងស្វះស្វែងរកវិធីបង្ការនិងការពារអគ្គិភ័យនៅពេលដែលមានហេតុការណ៍អគ្គិភ័យនៅតំបន់ដែលខ្លួនរស់នៅឬនៅក្បែរគេហដ្ឋានរបស់ខ្លួនប៉ុណ្ណោះ។ ដោយឡែកអាជីវករដែលមួយថ្ងៃៗដែលលក់ដូរនៅឯផ្សារ ឬក៏គេច្រើននិយាយថាយកផ្សារធ្វើផ្ទះនោះ នោះលំនៅឋានរបស់ពួកគេមិនសូវជាយកចិត្តទុកដាក់ការពារអគ្គិភ័យទេ។
ទោះយ៉ាងនេះក្តី អាជីវករដែល ប្រកបអាជីវកម្មរបស់ខ្លួននៅតាមផ្ទះ ពោរពេញទៅដោយអីវ៉ាន់ និងសម្ភារៈជាច្រើននោះ ភាគច្រើនមានការយល់ដឹង និងត្រៀមបំពង់ពន្លត់អគ្គិភ័យ បានស្ទើរគ្រប់ផ្ទះ។
ផ្ទុយទៅវិញការយល់ដឹងបែបនេះមិនសូវមានទេ ក្រៅពីទីប្រជុំជន នៅតាមជនបទ។ កត្តាសេដ្ឋកិច្ច អាចជាការជម្រុញដល់អារម្មណ៍ប្រជាជន មិនរវីរវល់នឹងការការពារអគ្គីភ័យ ដោយសារវិធានការទាំងអស់នោះ ទាក់ទងទៅនឹងការចំណាយថវិកា ហើយការចំណាយថវិកាណាមួយដែលមិនមែនជាគោលដៅបំរើដល់ការរស់នៅប្រចាំថ្ងៃ ជាពិសេសការចំណាយទៅលើអាហារហូបចុក ពួកគាត់មិនចាប់អារម្មណ៍ឡើយ។
កង្វះខាតព័ត៌មានធ្វើឲ្យប្រជាជន ដែលមិនសូវចាប់អារម្មណ៍ស្រាប់នោះ កាន់តែធ្វើមិនដឹងមិនឮបន្ថែមទៀត។ ជាមួយគ្នានេះច្បាប់ស្តីពីការបង្ការនិងទប់ស្កាតអគ្គិភ័យ ដែលបានអនុម័តដោយរដ្ឋសភាកាលពីឆ្នាំ២០១៣ កន្លងទៅហាក់ដូចជាមិនទាន់មានប្រសិទ្ធិភាពនៅក្នុងការ អនុវត្តនៅឡើយ។
ជាការពិត សុភាសិតខ្មែរតែងពោលថា«សូវស្លាប់បាកុំឲ្យស្លាប់មេ សូវលង់ទឹកកណ្តាលទន្លេកុំឲ្យភ្លើងឆេះផ្ទះ»។ តាមរយៈសុភាសិតនេះ បុព្វបុរសខ្មែរប្រដៅថា តែកាលណាភ្លើងឆេះផ្ទះហើយអត់សល់អ្វីទេ។ ដូចនេះគេគួរតែមានការចាប់អារម្មណ៍ឡើងវិញពីបញ្ហាភ្លើង ផ្សែងនេះដោយហេតុថា វាកាន់តែមានទំហំនៃការខូចខាតធំទៅៗ ពីមួយឆ្នាំទៅមួយឆ្នាំ។
ដើម្បីចៀសវាងការខូចខាតនិងសោកនាដកម្មបណ្តាលមកពីអគ្គិភ័យបន្តទៅទៀត បើមានលទ្ធភាពគួរតែទិញបំពង់ពន្លត់ភ្លើង យ៉ាងហោចណាស់ក៏មានមួយ ឬពីបំពង់ដែរទុកនៅតាមគេហដ្ឋាននីមួយៗ ខណៈដែលបំពង់ពន្លត់ភ្លើងបច្ចុប្បន្នមានការធូរថ្លៃច្រើន ធៀបទៅនឹងប៉ុន្មានឆ្នាំមុន។
កែសម្រួលប្រព័ន្ធខ្សែភ្លើងអគ្គិសនីនៅតាមលំនៅឋានឡើងវិញដែលផ្ទះសម្បែងមួយចំនួនជាពិសេសនៅទីក្រុងភ្នំពេញបានធ្វើឡើងកាលពី១០ឬ២០ឆ្នាំមុន មិនមានគុណភាពនិងបច្ចេកទេសត្រឹមត្រូវ។ ត្រូវមានការយកចិត្តទុកដាក់ចំពោះ ភ្លើង ផ្សែង វត្ថុងាយឆេះ ប្រេង ខ្លាញ់ បំពង់ហ្គាស ។ល។ រក្សាទុកឲ្យឆ្លាយពីកំដៅ។ យកល្អគួរតែមានបំពង់ពន្លត់ភ្លើងមួយសម្រាប់ផ្ទះបាយទាំងមូល។
ប្រជាពលរដ្ឋខ្លួនឯងផ្ទាល់ត្រូវមានការយល់ដឹងនិងកែប្រែទម្លាប់ព្រងើយកន្តើយ ពោលគឺត្រូវធ្វើរបងឲ្យរឹងម៉ាំ មុននឹងក្របីបាត់។ ជាមួយគ្នានេះអាជ្ញាធរមានសមត្ថកិច្ចទទួលបន្ទុកអគ្គិភ័យក៏ត្រូវតែបង្ហាញពីភាព ច្បាស់លាស់ដែរនូវឆន្ទៈជួយសង្គ្រោះពិតប្រាកដ ខណៈដែលរលកនៃការរិះគន់ពីអំពើពុករលួយនៅពេលអន្តរាគមន៍ពន្លត់ភ្លើង នៅតែបន្តកើតមាន។
ម៉្យាងទៀត ការផ្សព្វផ្សាយជាលក្ខណៈពាណិជ្ជកម្ម ដើម្បីពន្យល់ពីវិធីបង្ការនិងកាត់បន្ថយអគ្គិភ័យក៏គួរតែមានការផ្សព្វផ្សាយឲ្យបានទូលំទូលាយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ