អឺរ៉ុបអំពាវនាវជាថ្មីឲ្យដោះលែងលោកកឹម សុខានៅចំពោះមុខក្រុមប្រឹក្សាសិទ្ធិមនុស្សអង្គការសហប្រជាជាតិ
ជាថ្មីម្តងទៀត សហភាពអឺរ៉ុបបានអំពាវនាវឲ្យមានការដោះលែងលោកកឹម សុខា ជាបន្ទាន់ពីពន្ធនាគារ។ ការអំពាវនាវនេះ ធ្វើឡើងដោយតំណាងសហភាពអឺរ៉ុបនៅក្នុងកិច្ចប្រជុំជាមួយក្រុមប្រឹក្សាសិទ្ធិមនុស្សអង្គការសហប្រជាជាតិនៅក្នុងទីក្រុងហ្សឺណែវ កាលពីថ្ងៃទី១៤ មីនា។ ការអំពាវនាវនេះទៀតសោត ធ្វើឡើងស្របពេលដែលក្រុមមេធាវី កំពុងខ្នះខ្នែងស្នើនាំយកលោកកឹម សុខា ទៅព្យាបាលជំងឺនៅឯមន្ទីរពេទ្យ។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងសេចក្តីថ្លែងការណ៍មួយថ្លែងទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិកាលពីថ្ងៃទី១៤ មីនា សហភាពអឺរ៉ុបបានអះអាងថា ខ្លួននៅតែព្រួយបារម្ភខ្លាំងអំពីការបន្តធ្លាក់ចុះនៃស្ថានភាពសិទ្ធិមនុស្ស និងនយោបាយនៅក្នុងប្រទេសកម្ពុជា និងការបង្រ្កាបរឹងរឹតតែខ្លាំងឡើងទៅលើគណបក្សប្រឆាំង សង្គមស៊ីវិល និងប្រព័ន្ធផ្សព្វផ្សាយ។ ជាមួយនឹងការព្រួយបារម្ភ សហភាពអឺរ៉ុបក៏បានអំពាវនាវឲ្យមានការដោះលែងជាបន្ទាន់ មេដឹកនាំអតីតបក្សប្រឆាំងលោកកឹម សុខា ពីពន្ធនាគារ។ ចំពោះការរំលាយគណបក្សសង្រ្គោះជាតិវិញ សហភាពអឺរ៉ុប បានអះអាងថា ការរំលាយដោយបង្ខំនេះ គឺជាការដើរខុសគន្លងមាគ៌ាប្រព័ន្ធពហុបក្ស និងលទ្ធិប្រជាធិបតេយ្យដែលមានចែងនៅក្នុងរដ្ឋធម្មនុញ្ញរបស់ប្រទេសកម្ពុជា។
សម្រាប់រដ្ឋាភិបាលកម្ពុជា ក៏ដូចជាគណបក្សប្រជាជនកម្ពុជា ការចាប់ខ្លួនលោកកឹម សុខា និងការរំលាយគណបក្សសង្រ្គោះជាតិ គឺជាការអនុវត្តទៅច្បាប់របស់កម្ពុជាក្នុងបុព្វហេតុការពារផលប្រយោជន៍ខ្មែរហើយជាពិសេសនោះ គឺការពារសន្តិភាព។ គឺនៅក្រោមហេតុផលសន្តិភាពនេះហើយដែលលោកកឹម សុខា ត្រូវបានចាប់ខ្លួនក្រោមការចោទប្រកាន់ពីបទក្បត់ជាតិ ខណៈគណបក្សសង្រ្គោះជាតិវិញ ត្រូវបានរំលាយដោយចោទថា បានរៀបចំធ្វើបដិវត្តពណ៌នៅកម្ពុជា។
ថ្នាក់ដឹកនាំអតីតបក្សប្រឆាំងបានទាមទារឲ្យដោះលែងលោកកឹម សុខា និងទាមទារឲ្យគណបក្សសង្រ្គោះជាតិដំណើរការឡើងវិញ ដើម្បីបានចូលរួមការបោះឆ្នោតជ្រើសតាំងតំណាងរាស្រ្តនៅពេលខាងមុខនេះ។ ពួកគេថែមទាំងព្រមានទៀតថា បើសិនគ្មានវត្តមានបក្សប្រឆាំងចូលរួមទេ នោះការបោះឆ្នោតនឹងគ្មានការទទួលស្គាល់ពីសហគមន៍អន្តរជាតិឡើយ។ នៅក្នុងសេចក្តីថ្លែងការណ៍ទៅកាន់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ សហភាពអឺរ៉ុបក៏យល់ឃើញដូចគ្នានេះ។ សហភាពអឺរ៉ុប បានគូសបញ្ជាក់ថា ការបោះឆ្នោតដែលគ្មានវត្តមានបក្សប្រឆាំង គឺជាការបោះឆ្នោតមិនស្របច្បាប់។
ប្រឈមនឹងបញ្ហានេះ សហភាពអឺរ៉ុប បានអំពាវនាវជាថ្មីទៀតឲ្យមានការដាក់ឲ្យដំណើរការគណបក្សសង្រ្គោះជាតិឡើងវិញឲ្យបានរហ័ស ព្រមទាំងផ្តល់ភាពជាតំណាងរាស្រ្តនិងក្រុមប្រឹក្សាឃុំ សង្កាត់ដល់សមាជិកគណបក្សសង្រ្គោះជាតិឡើងវិញ។ ទន្ទឹមគ្នានេះ សហភាពអឺរ៉ុបក៏សង្ឃឹមថា រដ្ឋាភិបាលកម្ពុជាក៏នឹងអនុញ្ញាតឲ្យអង្គការសង្គមស៊ីវិលបំពេញតួនាទីស្របច្បាប់របស់ពួកគេបានពេញលេញផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ