អបអរទិវាអឺរ៉ុបនៅកម្ពុជា ដោយកម្មវិធីកម្សាន្តផ្សេងៗពេញមួយសប្ដាហ៍
ប្រតិភូសហភាពអឺរ៉ុបប្រចាំកម្ពុជា នឹងរៀបចំកម្មវិធីកម្សាន្តជាច្រើន ដើម្បីអបអរទិវាអឺរ៉ុបឆ្នាំ២០១៥។ កម្មវិធីកម្សាន្តទាំងនោះ ត្រូវបានរៀបចំពេញមួយសប្ដាហ៍តែម្ដង ចាប់ពីថ្ងៃទី៤ ដល់ថ្ងៃទី១០ខែឧសភាខាងមុខ។ នេះបើយោងតាមសេចក្ដីជូនដំណឹងរបស់ប្រតិភូសហភាពអឺរ៉ុបប្រចាំប្រទេសកម្ពុជា៕
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៥
ដើម្បីអបអរទិវាអឺរ៉ុបនៅឆ្នាំនេះ ប្រតិភូសហភាពអឺរ៉ុបប្រចាំកម្ពុជា បានរៀបចំព្រឹត្តិការណ៍ដ៏ធំមួយ ឲ្យឈ្មោះថា សប្ដាហ៍អឺរ៉ុបឆ្នាំ២០១៥ ដោយចាប់ផ្ដើមពីថ្ងៃទី៤ ដល់ថ្ងៃទី១០ខែឧសភា។កម្មវិធីកម្សាន្តជាច្រើនត្រូវបានរៀបចំនៅទីតាំងផ្សេងៗគ្នា ដែលក្នុងនោះរួមមាន ការប្រគុំតន្ដ្រីនិងការតាំងពិព័រណ៍អឺរ៉ុបនៅសួនច្បារមុខវត្តបទុមវត្តី ដំណើរទស្សកិច្ចរបស់ឯកអគ្គរដ្ឋទូតនៃសហភាពអឺរ៉ុប ទៅកាន់សាកលវិទ្យាល័យមួយចំនួនក្នុងក្រុងភ្នំពេញ វេទិកាឧត្តមសិក្សាលើកទី២ដែលនឹងត្រូវរៀបចំនៅវិទ្យាស្ថានជាតិអប់រំនិងកម្មវិធីជិះកង់ទេសចរណ៍ដើម្បីបរិស្ថានជាមួយប្រតិភូសហភាពអឺរ៉ុបប្រចាំកម្ពុជាជាដើម។
ជារៀងរាល់ឆ្នាំ ពលរដ្ឋសហភាពអឺរ៉ុបប្រមាណ៥០០លាននាក់ ប្រារព្ធទិវាអឺរ៉ុបនៅថ្ងៃទី៩ឧសភា ដើម្បីរំលឹកនូវសេចក្ដីថ្លែងការណ៍នយោបាយដ៏សំខាន់មួយ ដែលបានបិទបញ្ចប់សង្គ្រាម បើកទំព័រនៃដំណើរការកសាងសន្តិភាពនៅអឺរ៉ុប។
ដោយឡែក នៅកម្ពុជា កម្មវិធីសប្ដាហ៍អឺរ៉ុប ត្រូវប្រតិភូសហភាពអឺរ៉ុបប្រចាំកម្ពុជារៀបចំឡើងដើម្បីអបអរទិវាអឺរ៉ុបផង និងដើម្បីលើកកម្ពស់ការយល់ដឹងពីសហភាពអឺរ៉ុបផង។ កម្មវិធីកម្សាន្តនិងអប់រំជាច្រើនត្រូវបានរៀបចំធ្វើនៅក្នុងឆ្នាំកន្លងមក មានដូចជាការផ្សព្វផ្សាយតាមវិទ្យុ ការសំណេះសំណាលរវាងតំណាងស្ថានទូតសហភាពអឺរ៉ុបជាមួយនិស្សិតនិងមហោស្រពភាពយន្តជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ