ក្រុមប្រឹក្សាសហភាពអឺរ៉ុប ព្រមានចាត់វិធានការជាក់ស្តែងលើរដ្ឋាភិបាលកម្ពុជា
ក្រុមប្រឹក្សាសហភាពអឺរ៉ុប ដែលមានសមាជិករដ្ឋមន្ត្រីតំណាងឲ្យ២៨ប្រទេស បានចេញសម្រេចថ្មីមួយ កាលពីម្សិលមិញ ដោយព្រមានចាត់«វិធានការជាក់ស្តែង»លើរដ្ឋាភិបាលកម្ពុជា ប្រសិនបើស្ថានការណ៍នយោបាយនៅប្រទេសនេះនៅតែមិនល្អដូចបច្ចុប្បន្ន។ នេះជាសេចក្តីសម្រេចដែលធ្វើឡើងក្រោយពីកិច្ចប្រជុំនៅ ទីក្រុងប្រ៊ុចសែល ប្រទេសប៊ែលហ្ស៊ិក ថ្ងៃទី២៦ ខែកុម្ភៈនេះ។ តែរដ្ឋាភិបាលកម្ពុជានៅតែចាត់ទុកវិធានការនេះ ថាគ្មានប្រសិទ្ធភាពលើរដ្ឋាភិបាលកម្ពុជាដដែល។
ចុះផ្សាយនៅថ្ងៃ៖
ស្តាប់ - ០២:០៦
នៅក្នុងសេចក្តីសម្រេចចំនួន១១ចំណុច ពីទីក្រុងប្រ៊ុចសែល ប្រទេសប៊ែលហ្ស៊ិក ក្រុមប្រឹក្សាសហភាពអឺរ៉ុប នៅតែទទូចជាថ្មីទៀតឲ្យដោះលែង លោក កឹម សុខា និងបើកឲ្យគណបក្សសង្រ្គោះជាតិដំណើរការឡើងវិញ។ បើពុំដូចនោះទេ បណ្តុំប្រទេសចំនួន២៨នេះ ព្រមានថានឹងចាត់វិធានការជាក់ស្តែងមួយចំនួន ដើម្បីស្តារស្ថានការណ៍នយោបាយនៅកម្ពុជាបច្ចុប្បន្ន ឲ្យវិលត្រឡប់ទៅរកភាពប្រក្រតីឡើងវិញ នៅមុនពេលបោះឆ្នោតជាតិខាងមុខ។
សេចក្តីសម្រេចកម្រាស់ ៤ទំព័រនេះ ក្រុមប្រឹក្សាសហភាពអឺរ៉ុបក៏បានរំលឹកជាថ្មីម្តងទៀតថា សហភាពអឺរ៉ុប គឺជាទីផ្សារនាំចេញទំនិញដ៏ធំបំផុតរបស់កម្ពុជា ដែលកម្ពុជាទទួលបានការអនុគ្រោះពន្ធ ក្រោមកិច្ចព្រមព្រៀងទំនិញគ្រប់មុខលើកលែងតែអាវុធ។ ប៉ុន្តែក្រុមប្រឹក្សាសហភាពអឺរ៉ុបបានបញ្ជាក់ច្បាស់ៗថា ការអនុគ្រោះពន្ធអាចបន្តអនុវត្តទៅបាន លុះត្រាតែកម្ពុជា គោរពសិទ្ធិមនុស្ស សេរីភាពជាមូលដ្ឋាន និងសិទ្ធិការងារ។
នៅចុងបញ្ចប់ ក្រុមប្រឹក្សាសហភាពអឺរ៉ុប បានបញ្ជាក់ថា ពួកគេនៅតែបន្តតាមដានយ៉ាងយកចិត្តទុកដាក់បំផុតចំពោះការវិវឌ្ឍន៍នៃស្ថានភាពប្រទេសកម្ពុជា។
លោក ជុំ សុន្ទរី អ្នកនាំពាក្យក្រសួងការបរទេសកម្ពុជា បានថ្លែងថា កម្ពុជាមានជំហររក្សាទំនាក់ល្អជាមួយសហភាពអឺរ៉ុបឈរលើមូលដ្ឋានមិនជ្រៀតជ្រែកកម្ពុជាផ្ទៃរវាងគ្នានឹងគ្នា ហើយសង្ឃឹមថាEU ក៏មានជំហរបែបនេះដែរ។
យ៉ាងនេះក្តី ដោយភ្ជាប់នឹងសេចក្តីសម្រេចរបស់ក្រុមប្រឹក្សាសហភាពអឺរ៉ុបនេះ លោក សម រង្ស៊ី តាមរយៈទំព័រហ្វេសប៊ុករបស់លោក បានព្រមានថា ”បើលោក ហ៊ុន សែន នៅតែកាន់អំណាចបែបនេះទៀត ប្រជាពលរដ្ឋខ្មែរជាច្រើន នឹងបាត់បង់ការងារ បាត់បង់ជីវភាពរស់នៅ និងបាត់បង់សិទ្ធិសេរីភាពទាំងអស់”។
ប៉ុន្តែលោក កឹម សុខា តាមរយៈហ្វេសប៊ុករបស់លោក គឺគ្រាន់តែបញ្ជាក់ថា “ប្រសិនបើស្ថានភាពនយោបាយនៅកម្ពុជាមិនប្រសើរឡើងទេ សហគមន៍អឺរ៉ុបដែលជាទីផ្សារធំបំផុតរបស់កម្ពុជានឹងចាត់វិធានការទណ្ឌកម្មជាក់លាក់មួយចំនួន”។
ផ្ទុយទៅវិញ អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានអះអាងថា អ្វីដែលសហភាពអឺរ៉ុបទាមទារឲ្យដោះលែង លោក កឹម សុខា គឺមិនអាចទៅរួចនោះទេ។ ចំណែក ការទាមទារឲ្យគណបក្សសង្រ្គោះជាតិដំណើរការឡើងវិញ ក៏ដូចគ្នានេះដែរ ដោយលោកសំអាងថា ជាការអនុវត្តន៍ច្បាប់របស់កម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ