សហភាពអឺរ៉ុប ប្រកាសឲ្យនិស្សិតកម្ពុជាសរសេរអត្ថបទប្រជែងយកពានរង្វាន់ប្រចាំឆ្នាំលើកទី៣
សហភាពអឺរ៉ុប (EU) និងសមាគមយុវជនខ្មែរ (KYA) បានសហការគ្នារៀបចំកម្មវិធីប្រកួតនិពន្ធអត្ថបទ ដើម្បីប្រជែងយកពានរង្វាន់ប្រចាំឆ្នាំលើកទី៣របស់ខ្លួន ចាប់ពីថ្ងៃទី៣០កញ្ញា រហូតដល់ថ្ងៃទី៣០តុលាខាងមុខ។ កម្មវិធីនេះ បានបើកទូលាយដល់និស្សិតនៅតាមសកលវិទ្យាល័យទាំងអស់នៅក្នុងប្រទេសកម្ពុជា ដែលមានអាយុចាប់ពី១៨ ដល់២៦ឆ្នាំ។ ជ័យលាភីលេខ១ នឹងទទួលបានប្រាក់រង្វាន់ចំនួន៣០០ដុល្លារអាមេរិក។
ចុះផ្សាយនៅថ្ងៃ៖
ស្តាប់ - ០២:០៥
មានប្រធានបទសំខាន់ៗចំនួន៣ ដែលសហភាពអឺរ៉ុប (EU) និងសមាគមយុវជនខ្មែរ (KYA) បានសម្រេចដាក់ឲ្យនិស្សិតកម្ពុជាសរសេរដើម្បីប្រកួតប្រជែងគ្នានេះ។ ក្នុងនោះរួមមាន៖
ទី១. តើសមាគមអាស៊ានគួរមានលក្ខណៈដូចសហភាពអឺរ៉ុបដែរឬទេ?
ទី២. ថាតើហេតុអ្វីបានជាធម្មជាតិ គឺជាបញ្ហាដែលគួរយកចិត្តទុកដាក់?
ទី៣. ថាតើយុវជនគួរធ្វើអ្វីខ្លះ ដើម្បីកែប្រែអនាគតឲ្យមានភាពល្អប្រសើរ?
ក្នុងចំណោមប្រធានបទទាំង៣ខាងលើនេះ និស្សិតអាចជ្រើសរើសយកប្រធានបទណាមួយក៏បាន។ ហើយចំពោះការសរសេរវិញ គឺត្រូវធ្វើឡើងជាភាសាផ្លូវការណាមួយក្នុងចំណោមភាសាចំនួន៣ រួមមាន ភាសាអង់គ្លេស អាល្លឺម៉ង់ ឬភាសាបារាំង ហើយអត្ថបទរបស់បេក្ខជនម្នាក់ៗ តម្រូវមិនឲ្យសរសេរលើសពី១២០០ពាក្យឡើយ។ នេះបើតាមការបញ្ជាក់ពីគណៈកម្មការរៀបចំកម្មវិធី ដែលមកពីសហភាពអឺរ៉ុប និងសមាគមយុវជនខ្មែរ នៅក្នុងសន្និសីទកាសែតមួយ កាលពីព្រឹកថ្ងៃទី២៤ សីហា នៅឯទីស្នាក់ការកណ្តាលសហភាពអឺរ៉ុបក្នុងទីក្រុងភ្នំពេញ។
គួរជម្រាបជូនថា រង្វាន់ធំ (Golden Reward) ដែលមានតម្លៃស្មើនឹងទឹកប្រាក់ចំនួន៣០០ដុល្លារអាមេរិក នឹងត្រូវផ្តល់ជូនបេក្ខជន/បេក្ខនារីជ័យលាភីលេខ១ នៃប្រធានបទនីមួយៗ។ ចំណែករង្វាន់លើកទឹកចិត្ត ដែលមានទឹកប្រាក់ចំនួន២០០ដុល្លារ នឹងត្រូវផ្តល់ជូនបេក្ខជនជ័យលាភីលេខ២ និងលេខ៣ នៃប្រធានបទនីមួយៗ។
សូមបញ្ជាក់ដែរថា នេះគឺជាឆ្នាំទី៣ហើយ ដែលសហភាពអឺរ៉ុប (EU) និងសមាគមយុវជនខ្មែរ (KYA) បានដាក់ចេញកម្មវិធីប្រកួតប្រជែងផ្នែកតែងនិពន្ធអត្ថបទនេះ ដើម្បីជាការលើកកម្ពស់ទស្សនៈរបស់យុវជនកម្ពុជា ទៅលើប្រធានបទផ្សេងៗគ្នា និងដើម្បីអភិវឌ្ឍសមត្ថភាពស្រាវជ្រាវរបស់និស្សិតកម្ពុជា។ ប៉ុន្តែ អ្វីដែលជាបញ្ហាប្រឈមនាពេលកន្លងមក និស្សិតកម្ពុជាភាគច្រើននៅខ្វះ ឬស្ទើតែមិនយល់ពីរបៀបនៃការសរសេរ (ខ្លីហើយខ្លឹម) ការគិត រចនាបទ និងការវិភាគជាដើម។ យ៉ាងណាក៏ដោយ ទស្សនៈ ឬយោបល់ល្អៗរបស់ពួកគេ នឹងត្រូវបានដាក់បញ្ចូល ឬដកស្រង់ ដើម្បីយកទៅកែលំអគោលនយោបាយនាពេលអនាគត។ នៅក្នុងការប្រកួតប្រជែងពីរលើកកន្លងមក មាននិស្សិតកម្ពុជាប្រមាណជា៨០០ទៅ១ពាន់នាក់ បានផ្ញើអត្ថបទរបស់ពួកគេ ដើម្បីប្រកួតប្រជែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ