ស្ថានទូតខ្មែរប្រចាំព្រុយសែលចាត់ទុកសេចក្តីសម្រេចរបស់សភាអឺរុប ថាលំអៀងនិងបំផ្លើស
ភ្លាមៗក្រោយសភាអឺរុបបោះឆ្នោតអនុម័តលើសេចក្តីសម្រេចចិត្ត ពីស្ថានការណ៍នៅកម្ពុជា ស្ថានទូតនៃព្រះរាជាណាចក្រកម្ពុជា ប្រចាំទីក្រុងព្រុយសែល បានឆ្លើយតបដោយសោកស្តាយថា សភាអឺរុប អនុម័តសេចក្តីសម្រេចនោះ ក្នុងស្មារតីលំអៀង និងបំផ្លើស។ តំណាងស្ថានទូតខ្មែរប្រចាំទីក្រុងព្រុយសែល បានបញ្ជាក់ថាមិនអាចទទួលយកសេចក្តីសម្រេចនោះបានទេ ព្រោះក្នុងខ្លឹមសារនៃសេចក្តីសម្រេចនោះ មានតែការស្រង់យកប្រភពពីខាងបក្សប្រឆាំង និងអង្គការក្រៅរដ្ឋាភិបាល មកធ្វើជាសំអាង ដើម្បីថ្កោលទោសលើការអនុវត្តច្បាប់នៅកម្ពុជាតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៥៦
សំណួរដែលបញ្ជាក់ ពីការទាត់ចោលនូវសេចក្តីសម្រេចរបស់សភាអឺរុបនោះ រួមមាន «បើសេចក្តីសម្រេចរបស់សភាអឺរុប មិនអាចធ្វើឲ្យមានស្តង់ដាក្នុងការលើកកម្ពស់សិទ្ធិមនុស្ស និងលទ្ធិប្រជាធិតេយ្យក្នុងរដ្ឋជាសមាជិកអឺរុបផង តើសភាអឺរុប អាចមករំពឹងយ៉ាងម៉េចថាសេចក្តីសម្រេចនោះ អាចល្អឥតខ្ចោះក្នុងប្រទេសកម្ពុជា?» ចំណែកសំណួរទី ២ គឺ «បើសភាអឺរុប តែងតែអនុវត្ត ស្តង់ដារ ២ បូករួមនឹងការបំផ្លើសផង តើកម្ពុជា អាចផ្តល់តម្លៃដល់សេចក្តីសម្រេចចិត្តនោះដោយរបៀបណា?»
សូមរម្លឹកជូនថា ក្នុងសេចក្តីសម្រេចរបស់សភាអឺរុប ដែលមាន ១៣ចំនុច មានការអំពាវនាវឲ្យប្រទេសអឺរុបទាំងអស់ កុំគាំទ្រដល់ការបោះឆ្នោតនៅកម្ពុជា ហើយត្រូវតែធ្វើយ៉ាងណាជម្រុញឲ្យរដ្ឋាភិបាលកម្ពុជា វិលត្រលប់ទៅអនុវត្តតាមគោលការណ៍ប្រជាធិបតេយ្យ និងការគោរពសិទ្ធិមនុស្ស ដើម្បីជាប្រយោជន៍សម្រាប់ការបោះឆ្នោតនៅអណត្តិក្រោយៗទៀត។
សម្រាប់សភាអឺរ៉ុប ការបោះឆ្នោតសភានៅកម្ពុជានាចុងខែកក្កដាកន្លងមក ដែលគណបក្សប្រជាជនកម្ពុជាទទួលបានអសនៈទាំង ១២៥នោះ ជាការបោះឆ្នោតមិនសេរី និងមិនយុត្តិធម៌។ ក្នុងសេចក្តីសម្រេចនោះ ក៏មានផងដែរ ការស្នើដល់រដ្ឋាភិបាលក្រុងភ្នំពេញ ឲ្យទម្លាក់គ្រប់បទចោទប្រកាន់ និងដោះលែងលោកកឹម សុខាឲ្យមានសេរីភាពពេញលេញឡើងវិញ។ ក្រៅពីករណីប្រធានអតីតគណបក្សសង្រ្គោះជាតិ លោកកឹម សុខា សភាអឺរ៉ុបក៏បានទាមទារឲ្យមានការទម្លាក់បទចោទប្រកាន់លើថ្នាក់ដឹកនាំនយោបាយផ្សេងទៀតរបស់អតីតគណបក្សសង្រ្គោះជាតិ មានទាំងលោកសម រង្ស៊ី ផង និងគ្រប់សកម្មជនសិទ្ធិមនុស្សទាំងអស់ បូករួមទាំងផលិតករភាពយន្តឯកសារជនជាតិអូស្ត្រាលី លោក James Ricketson ដែលទើបត្រូវបានកាត់ទោសឲ្យជាប់ពន្ធនាគារ រយៈពេល ៦ឆ្នាំ កាលពីពេលថ្មីៗនេះ។
លោកស្រីប្រមុខការទូតអឺរ៉ុប ហ្វេដេរីកា ម៉ូហ្កេរីនី បានទាមទារឲ្យរដ្ឋាភិបាលកម្ពុជា គិតគូរឡើងវិញពីបញ្ហានេះ និងព្រមានទុកជាមុនថា បើគ្មានការផ្លាស់ប្តូរឥរិយាបទណាមួយ ពីរដ្ឋាភិបាលកម្ពុជាទេ នោះក្រុមប្រឹក្សាអឺរ៉ុប នឹងចាត់វិធានការឲ្យសក្តិសមបំផុត។
ប៉ុន្តែជាការឆ្លើយតប តំណាងរដ្ឋាភិបាលកម្ពុជា អះអាងថា ខ្លួនមានភស្តុតាងបញ្ជាក់ពីភាពស្អាតស្អំនៃការអនុវត្តច្បាប់ទៅលើកឹម សុខា និងជនជាប់ចោទផ្សេងទៀត នាពេលកន្លងមក។ ស្ថានទូតកម្ពុជាប្រចាំទីក្រុងព្រុយសែលដដែល បានសម្តែងការសោកស្តាយចំពោះការគម្រាមដាក់ទណ្ឌកម្មរបស់សភាអឺរុប ដែលមិនមានភាពយុត្តិធម៌ ខណៈប្រទេសដទៃ ដែលមានអំពើឧក្រិដ្ឋកម្មធ្ងន់ធ្ងរជាងកម្ពុជាទៅទៀតនោះ នៅតែអាចបន្តកិច្ចព្រៀមព្រៀងលើកលែងពន្ធពាណិជ្ជកម្ម (EBA) ជាមួយអឺរុប ដោយគ្មានការគម្រាមកំហែងនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ