សភាអឺរ៉ុបទាមទារឲ្យដោះលែងលោក កឹម សុខា ខណៈលោកហ៊ុន សែន បញ្ជាឲ្យពង្រីកការស៊ើបអង្កេតលើបាតុកម្មឆ្នាំ២០១៣
សមាជិកសភាសហភាពអឺរ៉ុប បានបើកកិច្ចប្រជុំមួយ កាលពីថ្ងៃទី ១៤ កញ្ញា ដើម្បីត្រៀមអនុម័តវិធានការណ៍១០ចំណុច ស្តីពីកម្ពុជា។ ក្នុងនោះ ក៏មានការទាមទារឲ្យមានដោះលែងលោក កឹម សុខា ប្រធានគណបក្សប្រឆាំងផងដែរ។ ដោយឡែកនៅឯកម្ពុជាឯណេះវិញ លោកនាយករដ្ឋមន្ត្រី ហ៊ុន សែន នៅថ្ងៃទី ១៥កញ្ញានេះ បានបញ្ជាឲ្យអាជ្ញាធរក្រសួងមហាផ្ទៃ ពង្រីកការស៊ើបអង្កេតលើបាតុកម្មកាលពីឆ្នាំ ២០១៣។ ជាបាតុកម្មដែលបណ្តាលឲ្យមនុស្ស៤នាក់ស្លាប់ និងម្នាក់បាត់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៣
កិច្ចប្រជុំដែលបានធ្វើឡើងនៅក្នុងទីក្រុង Strasbourg ប្រទេសបារាំង កាលពីថ្ងៃទី១៤ កញ្ញា នេះ សមាជិកសភាសហភាពអឺរ៉ុប បានពិភាក្សាជាសំខាន់លើស្ថានការណ៍នយោបាយ និងលទ្ធិប្រជាធិបតេយ្យនៅកម្ពុជា។ ក្នុងនោះសមាជិកសភាអឺរ៉ុប ក៏បានទាមទារឲ្យមានការដោះលែងលោក កឹម សុខា ប្រធានគណបក្សសង្គ្រោះជាតិផងដែរ។
លោកស្រី Federica Mogherini តំណាងជាន់ខ្ពស់នៃសភាសហភាពអឺរ៉ុបទទួលបន្ទុកគោលនយោបាយការបរទេស និងសន្តិសុខ និងជាអនុប្រធានគណៈកម្មការសហភាពអឺរ៉ុប បានថ្លែងនៅចំពោះមុខសភាអឺរ៉ុបកាលពីថ្ងៃទី១៤កញ្ញា ដោយបានហៅស្ថានភាពនយោបាយនៅកម្ពុជានាប៉ុន្មានសប្តាហ៍ចុងក្រោយនេះថា គឺជាសប្តាហ៍ដ៏សោកសៅសម្រាប់លទ្ធិប្រជាធិបតេយ្យនៅកម្ពុជា។ ជាសប្តាហ៍នៃទុក្ខសោកសម្រាប់សេរីភាពសារព័ត៌មាន និងក៏ជាសប្តាហ៍ដ៏សោកសៅនៃប្រជាជនកម្ពុជា ក្រោយពីការចាប់ខ្លួនប្រធានគណបក្សប្រឆាំងលោក កឹម សុខា និងការបណ្តេញអង្គការក្រៅរដ្ឋាភិបាលនិងសារព័ត៌មានជាភាសាអង់គ្លេស The Cambodia Daily រួចមក។
គួរជំរាបជូនថា ក្នុងចំណោមវិធានការ១០ចំណុច ដែលសភាសហភាពអឺរ៉ុបបានលើកយកមកពិភាក្សា កាលពីថ្ងៃទី ១៤ កញ្ញា ក្នុងនោះ សភាសហភាពអឺរ៉ុបបានដាក់ការព្រួយបារម្ភចំពោះការធ្លាក់ចុះសេរីភាពនៅកម្ពុជា ដែលប៉ះពាល់ទៅលើអ្នកនយោបាយប្រឆាំង សកម្មជនសិទ្ធិមនុស្ស និងសកម្មជនសង្គម, ថ្កោលទោសចំពោះអំពើហិង្សាផ្នែកនយោបាយនៅកម្ពុជា, ទាមទារឲ្យទម្លាក់ចោលរាល់ការចោទប្រកាន់ទៅលើអតីតមេដឹកនាំគណបក្សប្រឆាំង លោក សម រង្ស៊ី រួមទាំងមន្ដ្រីគណបក្សប្រឆាំង មន្ដ្រីសិទ្ធិមនុស្សនិងសមាជិកសភាផង។ បន្ថែមលើនេះ សភាសហភាពអឺរ៉ុប ក៏បានជម្រុញទៅរដ្ឋាភិបាលកម្ពុជា ត្រូវធានាឱ្យបាននូវសិទ្ធិបញ្ចេញមតិ និងសេរីភាពសារព័ត៌មាននៅក្នុងប្រទេស ហើយត្រូវលុបចោលការបង់ពន្ធរបស់កាសែត Cambodia daily និងអនុញ្ញាតឱ្យបើកការផ្សាយឡើងវិញនូវស្ថានីយ៍វិទ្យុមួយចំនួនដែលត្រូវបានបិទ ព្រមទាំងវិទ្យាស្ថានជាតិប្រជាធិបតេយ្យ NDI របស់អាមេរិកផងដែរ។ បន្ថែមលើនេះ វិធានការទាំង១០ចំណុចនេះ សភាសហភាពអឺរ៉ុប ក៏បានព្រមានមិនទទួលស្គាល់ចំពោះភាពស្របច្បាប់នៃការបោះឆ្នោតជាតិនៅពេលខាងមុខនេះដែរ។ យ៉ាងណាក៏ដោយ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានចាត់ទុកវិធានការទាំងនេះថា គ្រាន់តែជាការបញ្ចេញមតិរបស់សមាជិកសភាអឺរ៉ុបប៉ុណ្ណោះ ហើយថា វិធានការនេះ មិនមែនជាច្បាប់ដែលចាប់បង្ខំឲ្យកម្ពុជាត្រូវតែអនុវត្តតាមនោះទេ។
សូមបញ្ជាក់ថា ខណៈដែលសមាជិកសភាអឺរ៉ុបបានទាមទារឲ្យមានការដោះលែងលោក កឹម សុខា ជាបន្ទាន់និងឥតល័ក្ខណ្ឌនេះ នៅថ្ងៃទី១៥កញ្ញានេះដែរ ប្រមុខរដ្ឋាភិបាលកម្ពុជា លោក ហ៊ុន សែន ក៏បានបញ្ជាឲ្យសមត្ថកិច្ចក្រសួងមហាផ្ទៃពង្រីកការស៊ើបអង្កេតទៅលើបាតុកម្មនៅផ្លូវវេងស្រេង កាលពីឆ្នាំ២០១៣។ ជាបាតុកម្មរបស់កម្មករដើម្បីទាមទារតម្លើងប្រាក់ខែ ហើយបានឈានទៅដល់ការប៉ះទង្គិចគ្នារវាងកម្មករនិងសមត្ថកិច្ច ដែលបានបណ្តាលឲ្យមនុស្ស ៤នាក់ស្លាប់ និងម្នាក់បាត់ខ្លួន។ បើតាមលោកនាយករដ្ឋមន្ត្រី ដើម្បីរកអ្នកដែលបាត់ខ្លួននោះ ទាល់តែប្រមូលមេបាតុកម្មទាំងអស់ យកមកសួរចម្លើយទើបដឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ