Facebook ជាទីលានថ្មីនៃការប្រជែងអំណាចរបស់អ្នកនយោបាយនៅកម្ពុជា
ចុះផ្សាយនៅថ្ងៃ៖
ស្តាប់ - ០៤:១៦
Facebook បានក្លាយជាទីលានថ្មីនៃការប្រកួតប្រជែងអំណាចរបស់អ្នកនយោបាយនៅក្នុងប្រទេសកម្ពុជា។ កាលពីថ្ងៃទី២ កុម្ភៈ ២០១៦ លោកនាយករដ្ឋមន្រ្តី ហ៊ុន សែន បានប្រកាសថា ទំព័រហ្វេសបុកផ្លូវការរបស់លោកមានចំនួនអ្នកចុច (Like) ជាង 2,099,740 នាក់។ ចំនួននេះ មានន័យថា ទំព័រហ្វេសបុកផ្លូវការរបស់លោកនាយករដ្ឋមន្រ្តី ហ៊ុន សែន បានយកឈ្នះលើចំនួនអ្នកចុច (Like) នៅលើទំព័រហ្វេសបុកផ្លូវការរបស់ប្រធានគណបក្សប្រឆាំងលោក សម រង្ស៊ី ។ តែយ៉ាងណាក៏ដោយ និន្នាការនៃការប្រជែងគ្នាលើបណ្តាញសង្គមមួយនេះ គឺជាសញ្ញាណវិជ្ជមានមួយ។
បច្ចុប្បន្ននេះ Facebook កំពុងក្លាយជាទីលាននៃការប្រកួតប្រជែងថ្មីមួយរវាងអ្នកនយោបាយនៅក្នុងប្រទេសកម្ពុជា ពិសេសរវាងគណបក្សកាន់អំណាច និងគណបក្សប្រឆាំង និយាយជារួម និងនិយាយដោយឡែក គឺរវាងលោកនាយករដ្ឋមន្រ្តី ហ៊ុន សែន និងលោក សម រង្ស៊ីប្រធានគណបក្សប្រឆាំង។ មេដឹកនាំនៃគណបក្សដែលមានសំឡេងនៅក្នុងរដ្ឋសភាទាំងពីរ បានដឹងយ៉ាងច្បាស់ថា បណ្តាញទំនាក់ទំនងសង្គមដ៏មានប្រជាប្រិយភាពមួយនេះ កំពុងជួយគៀងគរសម្លេងឆ្នោតរបស់ពួកគេបានយ៉ាងច្រើននៅក្នុងការបោះឆ្នោតនៅពេលខាងមុខនេះ។
សម្រាប់បណ្តាញទំនាក់ទំនងសង្គមហ្វេសបុករបស់លោកនាយករដ្ឋមន្រ្តី ហ៊ុន សែន កាលពីថ្ងៃទី២ កុម្ភៈ ២០១៦ នេះ ទើបតែបានប្រកាសថា ទំព័រហ្វេសបុកផ្លូវការរបស់លោកមានចំនួនអ្នកចុច (Like) ជាង 2,099,740នាក់។ ចំនួននេះ គឺបានយកឈ្នះលើចំនួនអ្នកចុច (Like) នៅលើទំព័រហ្វេសបុកផ្លូវការរបស់ លោក សម រង្ស៊ី ប្រធានគណបក្សប្រឆាំង។ ការប្រជែងគ្នានេះ រហូតមានការលើកឡើងថា លោកនាយករដ្ឋមន្រ្តី ហ៊ុន សែន បានដណ្តើមតំណែងនាយករដ្ឋមន្រ្តីហ្វេសបុកពីលោក សម រង្ស៊ី ផង ខណៈតំណែងជានាយករដ្ឋមន្រ្តីផ្លូវការក៏ជារបស់លោក។
សម្រាប់ក្រុមអ្នកវិភាគ និន្នាការនៃការប្រជែងគ្នាលើបណ្តាញទំនាក់ទំនងសង្គមមួយនេះ គឺជាសញ្ញាណវិជ្ជមានមួយ។ ព្រោះចង់មិនចង់ តាមរយៈបណ្តាញសង្គមមួយនេះ អ្នកនយោបាយកំពូលទាំងពីរ ហាក់កំពុងតែយកចិត្តយកថ្លើមចំពោះប្រជាពលរដ្ឋជាខ្លាំង។ នោះហើយ គឺជាសញ្ញាណវិជ្ជមានមួយ។ ជាក់ស្តែង នៅក្នុងរយៈពេលចុងក្រោយនេះ លោកនាយករដ្ឋមន្រ្តី ហ៊ុន សែន បានចំណាយពេលច្រើនដើម្បីប្រើប្រាស់បណ្តាញសង្គមហ្វេសបុកនេះ នៅក្នុងការដោះស្រាយបញ្ហានិងជួបជាមួយមហាជននៅតាមទីសាធារណៈជាដើម។ តួយ៉ាង ដូចជាលោក បានចំណាយពេលវេលាក្នុងការអង្គុយជជែកលេង ជាមួយនឹងក្រុមអ្នកធាក់ស៊ីក្លូក្នុងក្រុងភ្នំពេញ ហើយគេក៏បានឃើញលោកនាយករដ្ឋមន្រ្តី ហ៊ុន សែន ស្រោចទឹកផ្កានៅលើសួនច្បារសាធារណៈ និងក៏បានឃើញលោកនាយករដ្ឋមន្រ្តី ចុះជួបសួរសុខទុក្ខនិងថតរូបភាព ប្រជាពលរដ្ឋនៅតាមសួនច្បារសាធារណៈនានាក្នុងក្រុងភ្នំពេញ ស្ថិតក្នុងសំលៀកបំពាក់យ៉ាងសាមញ្ញបំផុត។ បន្ថែមលើនេះ តាមរយៈបណ្តាញសង្គមហ្វេសបុកដដែល គេក៏បានឃើញនាយករដ្ឋមន្រ្តីកម្ពុជា ដោះស្រាយបញ្ហាជូនប្រជាពលរដ្ឋជាបន្តបន្ទាប់។
ចំណែកឯលោក សម រង្ស៊ី ប្រធានគណបក្សប្រឆាំង ដែលពេលនេះ កំពុងរស់នៅដោយនិរទេសខ្លួននៅបរទេសនោះ បើទោះបីជាមិនបង្ហាញសកម្មភាពជួបជុំជាមួយប្រជាពលរដ្ឋថ្មីៗនេះក្តី តែជារើយៗគេបានឃើញទំព័រហ្វេសបុកផ្លូវការរបស់លោក បានបង្ហោះសកម្មភាពដែលបានជួបជាមួយនឹងប្រជាពលរដ្ឋនៅក្នុងយុទ្ធនាការនៃការឃោសនាបោះឆ្នោត និងជួបជាមួយនឹងប្រជាពលរដ្ឋនៅពេលដែលលោកបានចុះទៅកាន់ខេត្តក្រុងមួយចំនួននៅក្នុងប្រទេសកម្ពុជា។
បណ្តាញទំនាក់ទំនងសង្គម Facebook ត្រូវបានគេបង្កើតឡើងនៅឆ្នាំ២០០៤ ដោយជនជាតិអាមេរិកកាំង និងត្រូវបានប្រើប្រាស់នៅក្នុងប្រទេសកម្ពុជាប្រហែលនៅក្នុងឆ្នាំ២០០៦។ វាបានក្លាយជាមធ្យោបាយផ្តល់ព័ត៌មាន និងបណ្តាញទំនាក់ទំនងសង្គមដ៏ទូលំទូលាយនិងប្រកបដោយប្រជាប្រិយភាពមួយនៅក្នុងប្រទេសកម្ពុជានាពេលបច្ចុប្បន្ននេះ។ យោងតាមរបាយការណ៍សិក្សាមួយបានបង្ហាញថា ប្រជាពលរដ្ឋកម្ពុជាចំនួន ២៤.៩% បានប្រើប្រាស់បណ្តាញទំនាក់ទំនងសង្គមហ្វេសបុក រឺអ៊ីនធ័រណែត ដើម្បីទាញយកព័ត៌មាន ឬចែករំលែកព័ត៌មាន ខណៈដែលមនុស្ស ៣១.៨% បានបន្តមើលទូរទស្សន៍ និងមនុស្សចំនួន ១៧.៨% បន្តស្តាប់វិទ្យុ។ ការកើនឡើងនេះ គឺជាការផ្លាស់ប្តូរសង្គមដ៏ធំមួយ នៅក្នុងប្រទេសកម្ពុជា ពិសេសនៅក្រោយការបោះឆ្នោតជាតិឆ្នាំ២០១៣ ដែលគេបានឃើញអ្នកនយោបាយខ្មែរ បានចាប់ផ្តើមប្រើប្រាស់បណ្តាញសង្គមហ្វេសបុក (Facebook)នេះ ដើម្បីជាមធ្យោបាយទាក់ទាញប្រជាប្រិយភាពរបស់ខ្លួន។
សម្រាប់ក្រុមអ្នកវិភាគ Facebook កំពុងក្លាយជាទីលានថ្មីនៃការប្រកួតប្រជែងរបស់អ្នកនយោបាយដើម្បីទាក់ទាញការគាំទ្ររបស់ខ្លួន។ ព្រោះថា ចង់មិនចង់ Facbook ពេលនេះ បានក្លាយជាវេទិកានៃការបញ្ចេញមតិ, ជាទីកន្លែងនៃការទំនាក់ទំនងដោយត្រង់រវាងប្រជាពលរដ្ឋ ទៅកាន់នាយករដ្ឋមន្រ្តី និងពីនាយករដ្ឋមន្រ្តីទៅកាន់ប្រជាពលរដ្ឋ ដោយមិនចាំបាច់ឆ្លងកាត់អ្នកនាំពាក្យ ឬមន្រ្តីខុទ្ទកាល័យនោះទេ និងខណៈដែលម៉ាស៊ីនឃោសនាមហាជនដូចជា កាសែត វិទ្យុ និងទូរទស្សន៍ត្រូវការពេលវេលាដើម្បីផ្សព្វផ្សាយនោះ។
យ៉ាងណាក៏ដោយ សម្រាប់ក្រុមអ្នកវិភាគ បើទោះក្នុងគោលបំណងអ្វីក៏ដោយ តែអ្វីដែលនាយករដ្ឋមន្រ្តីកម្ពុជា និងប្រធានគណបក្សប្រឆាំង កំពុងតែធ្វើនៅពេលនេះ គឺជាកាយវិការដ៏ល្អប្រពៃមួយ ហើយជាអ្វីដែលមេដឹកនាំនៃប្រទេសប្រជាធិបតេយ្យនៅលើពិភពលោកកំពុងអនុវត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ