មន្ត្រីជំនាញសង្ស័យពីការរាលដាលនៃជំងឺប៉េស្តជ្រូកកើតមាន នៅមួយស្រុកទៀតក្នុងខេត្តរតនគិរី
មន្ត្រីជំនាញនៃក្រសួងកសិកម្មនៅថ្ងៃព្រហស្បតិ៍នេះ បានបង្ហាញការសង្ស័យពីការរាលដាលនៃជំងឺប៉េស្តជ្រូកអាហ្វ្រិក ដែលកើតមាននៅស្រុកអូរជុំ ក្នុងខេត្តរតនគិរី ដដែល។ ការសង្ស័យរបស់មន្ត្រីជំនាញដូច្នេះបន្ទាប់ពីជំងឺប៉េស្តជ្រូកអាហ្វ្រិកបានកើតរួចហើយក្នុងភូមិសោមកានិញ ស្រុកអូរយ៉ាដាវ។ ប៉ុន្តែយ៉ាងមិញ មន្ត្រីជំនាញអះអាងថា ខេត្តផ្សេងទៀតមិនមានការសង្ស័យឬផ្ទុះឡើងនៃជំងឺប៉េស្តជ្រូកនេះទេ។
ចុះផ្សាយនៅថ្ងៃ៖
ស្តាប់ - ០១:៥៦
ថ្លែងប្រាប់វិទ្យុបារាំងអន្តរជាតិRFI នៅថ្ងៃព្រហស្បតិ៍នេះ លោក តាន់ ផាន់ណារ៉ា មន្ត្រីជំនាញខាងសុខភាពសត្វនៃក្រសួងកសិកម្មថា ការសង្ស័យពីការរីករាលដាលនៃជំងឺប៉េស្តជ្រូកអាហ្វ្រិកក្រោយមន្ត្រីជំនាញ រកឃើញសត្វជ្រូកមួយចំនួនបានងាប់ នៅស្រុកអូរជុំ ក្នុងខេត្តរតនគិរី។ ប៉ុន្តែសម្រាប់មន្ត្រីជំនាញមិនហ៊ានសន្និដ្ឋានថា សត្វដែលងាប់ទាំងនោះបណ្ដាលមកពីជំងឺប៉េស្តជ្រូកអាហ្រ្វិកទាំងស្រុងឡើយអាចបណ្ដាល មកពីអាកាសធាតុក្ដៅគួបផ្សំផង។
សូមជម្រាបថា ការសង្ស័យពីការរីករាលដាលនៃជំងឺប៉េស្តជ្រូកអាហ្វ្រិកនៅស្រុកអូរជុំដែលបណ្ដាលឲ្យសត្វជ្រូកមួយចំនួនងាប់នេះ បានកើតមានតាំងតែពីថ្ងៃទី១២មេសាមកម្លេះ។ ប៉ុន្តែយ៉ាងមិញគិតមកដល់ពេលនេះ មន្ត្រីជំនាញនៅថ្នាក់ខេត្តកំពុងតែអង្កេតនិងស្រាវជ្រាវរកមូលហេតុពិតដែលធ្វើឲ្យសត្វជ្រូកទាំងនោះងាប់។
គួររំឭកថា ជំងឺប៉េស្តជ្រូកអាហ្វ្រិក បានផ្ទុះឡើងជាលើកដំបូងក្នុងភូមិសោមកានិញ ឃុំសោមធំ ស្រុកអូរយ៉ាដាវ ខេត្តរតនគិរី បន្ទាប់ពីមានសត្វជ្រូកប្រហែល ៤០០ក្បាល បានងាប់កាលពីថ្ងៃទី ២២ខែមីនា ខណៈជ្រូក១៩៣ក្បាលផ្សេងទៀតត្រូវសម្លាប់ក្រោយរកឃើញជំងឺប៉េស្តជ្រូកអាហ្វ្រិក។ ដើម្បីទប់ស្កាត់ជំងឺប៉េស្តជ្រូកអាហ្វ្រិក អាជ្ញាធរខេត្តបានចាត់វិធានការ តាមរយៈការផ្អាកជាបណ្តោះអាសន្ន រាល់សកម្មភាព ចិញ្ចឹម ទិញ លក់ និងដឹកជញ្ជូនសត្វ សាច់ និងផលិតផលមានដើមកំណើរពីជ្រូក រហូតដល់ប្រកាសរំសាយ។ក្នុងនោះអាជ្ញាធរមានសិទ្ធិ បំផ្លាញចោលចំពោះសត្វជ្រូកគ្រប់ប្រភេទ ក្នុងតំបន់ផ្ទុះជំងឺទៅតាមវិធានការបសុព្យាបាល។
ទោះបីជាជំងឺប៉េស្តជ្រូកអាហ្វ្រិកនេះ មិនឆ្លង និងប៉ះពាល់ដល់មនុស្ស ប៉ុន្តែជំងឺនេះ បណ្តាលឲ្យជ្រូកឈឺ និងងាប់មានអត្រាខ្ពស់ រហូត ១០០ភាគរយ ដែលបង្ករការខាតបង់ធ្ងន់ធ្ងរ ដល់អ្នកចិញ្ចឹមជ្រូក។ ក្រសួងកសិកម្មទទួលស្គាល់ថា ការឆ្លងជំងឺនេះ មកកម្ពុជា គឺដោយសារតែការលួចនាំជ្រូកចូលពីវៀតណាម។ ប្រទេសវៀតណាម ដែលឆ្លងជំងឺនេះ ពីប្រទេសចិន កាលពីខែកុម្ភៈកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ